اللي بتحب المنسف الاردني تدخل

المنسف الاردني اكلة الاردن الاولى بلا منازع انا بصراحة بدي اكتب طريقة مخلوطة بين طريقة بيت حماي وهم كركية يعني المنسف اصلي عندهم وبين طريقة اهلي

المكونات بتكفي لسدر منسف يعني 4او 5 اشخاص
3-4 كيلو لحمة خروف قطع كبيرة مع عظمها
راس جميد حجم وسط
2 كيلو لبن شنينة او مخيض بكون سائل طعمه مالح شوي و حامض بنستعمله لتخفيف دسم الجميد ممكن ما تستخدميه
كيلو رز مصري نوع ممتاز
للتزيين مكسرات لوز وصنوبر اساسي
طبعا عند الكركية راس الخروف اهم شي بسدر المنسف حسب الرغبة
الطريقة
اول شي بتنقعي راس الجميد وبتكسريه قبل بيوم
يوم ما بدك تعملي بتسلقي اللحمة تلات ارباع استواء يعني ما تستوي 100% بتشيلي عنها الزفرة بدون ما تحطي بصل ولا اشي الا ازا بدك ورق غار
بطنجرة تانية بتطحني الجميد بابريق الخلاط المولينكس وبتصفيه على الطنجرة الفاضية طبعا بتطحنيه مع ميته
اللي نققعتيه فيها بعدين بتحطي عالنار وبس يدفى شوي قبل ما يغلي بتحطي عليه اللبن الشنينة وبتحركي حتى يغلي بس يغلي بتنزلي اللحمة عليه وبتحركي وبتشوفي ازا شفتيه جمد زيدي عليه من مرق اللحمة بس صفيها وخليه يغلي نصف ساعة وكل ما شفتيه جمد زيدي مرقة بس صفيها حتى يصير طعمه مناسب الك ولا تزيدي ملح لانه مالح بدون ملح واخر شي حطي ملعقتين سمنة بلدية عليها وخليها تغلي مرة واحدة
طريقة الرز
بتنقعي الرز منيح بعدين بتجيبي الطنجرة وبتحطي سمنة بلدية يعني ازا بتحبي كله سمنة او ممكن تخلطي بزيت قلي حتى يخف وما يكون دسم كتير بعدين بتحمصي الرز منيح وبتغلي مرق اللحمة وبتصفيه وبتحطي لكل كاسة رز كاسة وربع مرق و بتخليه بعد ما يغلي عنار هادية لحد ما يستوي وازا شفتيه محتاج مرق زيديه شوي لحد ما يستوي
طريقة تحضير السدر بتجيبي السدر بعدين بتفردي فيه خبز شراك او ممكن تسموه خبز لبناني اللي بكون رقيق كتير بتشربيه بشوية لبن من الجميد يعني حطيلك بمعلق السكب الكبيرة لبن على داير الخبز وبعدين اسكبي الرز وافرديه منيح و حطي فوقيه اللحمة بطريقتك الحلوة بعدين زينيه بالمكسرات و الاكل طبعا بالايدين بتصبي شوية لبن على الجهة اللي بتاكلو منها
هلا ازا بدك تحطي الراس اشتري الراس من اللحام وخليه ينظفلك اياه منيح منيح واسلقيه بطنجرة على جنب مش مع اللحمة عشان المرق تبع الراس ما بنستعملها بنرميها وبتحطي الراس على الجميد بتغليه غلوة واحدة بعدين بتحطيه بنص السدر
كان نفسي احطلكم صور بس يا خسارة ما بعرف لا انزل صور ولا احطهم عالمنتدى اعذروني ارجوكم وصحتين