اللي بمثل وضعي كيف تعرف إنها خلاص بتولد؟!

بسم الله الرحمن الرحيم
السلام عليكم ورحمة الله وبركاته
صباح الخير ع الجميع


بدون مقدمات
مثل ماهو مكتوب بالعنوان أبي أعرف كيف ومتى أروح المستشفى للولادة ؟ صح هذا ثالت حمل لي ماشاءالله بس أنا قصتي قصه في الولادة مايجيني طلق ولا تنزل علي موية ولااااا أي شي معتاد ومتوقع يصير وقت الولادة

بتسألوني طيب كيف ولدتي ولاداتك السابقة ؟!
بقولكم صدفة !!

إي والله مثل ماأقولكم .. في ولادتي الأولى كنت رايحة موعد عادي وكشفت علي الدكتورة وسوت لي سونار وقالت كل شي تمام وأعطتني موعد ثاني بس قالها زوجي عن شي أنا استحيت أقولها عليه ورجعتني مره ثانية ع السرير وكشفت علي من تحت وقالت والله بالحرف الواحد " اي ده دنتي ولاده على طول دا الرحم فاتح سبعه سانتي " !! وأنا فاتحه فمي عشرة سانتي <<< بكرية ماأدري وشي السبعة والتسعة ..
وفي غرفة الولادة قعدت حوالي الساعة يبون الطلق يجي وأنا كل شوي أقولهم ماأحس بشي حتى كيس الجنين مقفل اضطروا بعدين يفتحونه وبعد ماجا الطلق استغربت مني الدكتورة قالت كذا خطر ع الجنين تأخرتي مره وأعطتني طلق صناعي وهي تضحك وتقول اللحين تحسي الطلق ،، وعينك ماتشوف إلا النور ... الحمدلله ولدت طبيعي بس بطلوع الروح ..

وفي الثاني نفس المأساة ،، رحت المستشفى عشان آخذ ابرة الدم لأن كان معي فقر دم شديد ،، مدري ليش كشفت علي من تحت مع إني كنت لسا في الثامن قالت الرحم مفتوح ولادة!! زوجي مسك راسه وقال لي : إنتي دايم كذا ....
المهم شافت التحويل اللي معي وإلا له اسبوع واشتغلت فيني تهزيئ قالت الرحم مفتوح عندك من اسبوع وتوك اللي تجيني !!
وحطوني في الملاحظة‎ ‎أربع وعشرين ساعة عشان خافوا ع الجنين لأن الرحم ظل مفتوح مدة طويله ..
وبس لماوصل أربعة سانتي قالوا لازم نتدخل وسوا لي مثل الأول فتحوا الكيس وطلق صناعي ..


والآن أنا في آخر الثامن واليوم أجهدت نفسي حبتين وأحس بآلام قوية بأسفل ظهري وأحس حركة الجنين تحت عظمة العانة !! مكان غريب مره ، أحط يدي عليه وأحسه يتحرك بس طبعا بدون طلق ولا موية ، وماأقدر أمشي أحس بثقل فضيع أسفل البطن مع ألم خفيف في فتحة المهبل ... خايفة مره أكون ولادة بعد وأنا ماأدري !!

اللي تعاني نفس معاناتي أو تعرف لحالتي بالله تعلمني كيف أعرف إني بأولد مع العلم إني متعوده أولد بداية التاسع أو قبله .. واليوم ناويين نسافر إن شاء الله وش أسوي مع زوجي هو مشاوف مره لهاالسفره ويوم شافن تعبت من التجهيز أجلها للظهر لأننا كنا بنمشي اللحين بعد صلاة الفجر ...

ياليت تردون علي تعبانه بالحيل وياليت يكون رد منطقي ومقنع والله يخليكم لاأحد يقول لي روحي المستشفى لأن مو معقول كل ماحسيت نفسي تعبانه رحت المستشفى وقلت شوفوني يمكني بأولد أنا مايجين طلق !!

أنتظركم