اللي تبي تهون عليها مصيبتها تدخل وتقرا مصيبتي..يارب انصرني على من ظلمني..

السلام عليكم ورحمة الله وبركاته..امسيكم بالخير يااغلى اخوات في الدنيا,,
والله ثم والله اني ماكتبت حروفي هذي الابعد ماضاقت فيني الدنيا لعلي اجد عند وحده منكم دعوه او كلمه طيبه تخفف عني ما انا فيه..
انا تزوجت قبل سنه ونصف وشرطت قبل الزواج بيت مستقل لكن زوجي قال اول الزواج بنسكن عند اهله كم شهرلظروف خاصه وبعدين وعد رجل اني بطلعهاوكان فيه بيت يعمر جنب اهله وهوينتظر هالبيت يخلص عشان ياخذه..انا وافقت على هالكلام رغم معارضة اهلي للسكن عند حموله خصوصا اني بنت جميله ومتعلمه ولاهو غرور لكن الكل كان يثني علي ويتمنى مثلي لولده لكن انا اصريت على هالشاب لاني ارتحت له هو بالذات من بد اللي خطبوني وكل ما اصلي استخاره ارتاح اكثر عشان كذا توكلت على الله وتزوجته.. زوجي انسان هادي ومايحب المشاكل ويحب اهله بشكل موطبيعي ويشهد علي الله اني اعنته على هالشي وكنت دايم اشجع فيه هالنقطه واحثه عليهم زود عمري ماغرت من محبته او اهتمامه اومدحه لهم بالعكس كنت امدح معه وانبهه لاشياء اهو ماينتبه لها اقوله سفرهم معنا اذا رحنا عمره اوغير لهم جو في الشرقيه اوحتى طلعهم مطعم اومنتزه في الرياض كنت اشجعه يقضي حاجاتهم حتى لو على حساب حاجاتي هم كانوا كويسين معي في البدايه كانت تحدث منهم مواقف غيره اودق في الكلام لكن كنت افوت اجازي الاساءه بالاحسان كانوا منبهرين بطيبتي وتواضعي معهم كانوا يقولون انتي مو مرة ولد انتي مثل الاخت ماتوقعنا بتجينا زوجة اخ مثلك عافه وكافه ان ماجا مني خير مايجي مني شر عمري ماتدخلت في خصوصياتهم اونشرت اسرارهم اوقلت ليه ماعزمتوني او ليه ماعلمتوني اوماسويتوا او مافعلتوا..اخته انخطبت ولادريت الافي نفس يوم الملكه رغم اني ساكنه معهم في نفس البيت ولازعلت انا حملت وبلغتهم اول ما دريت حتى ماصبرت لين اتأكد وحملوا ثنتين منهم ولادريت الا في الشهر السادس ورغم هذا مازعلت ولاشرهت بالعكس اضحك وابارك واهني اول من يقوم بالواجب انا واول من يهدي انا في المناسبات والعزايم اشارك معهم بأنواع الحلويات والسلطات والاطباق اركض معهم مثل بنتهم حتى وانا حامل وثقيله وتعبانه مااقصر اركض ولا احن عمري,, ملابسي ومجوهراتي يمونون عليها والله اني افرح اذا طلبوا مني شي وكأن المنه علي ..الى هنا مافيه مشكله
بعدالزواج بست شهور وانا حامل في الشهر الاول قررنا انا وزوجي اننا نخبر امه ان طلعتنا قربت لانه مابقى الاكم شهر ويخلص الدور اللي جنبهم طبعا هي لما عرفت جن جنونها واخلفت وعدها وقالت مافيه طلعه..تخيلوا خواته عشراربع متزوجات وست ماتزوجوا كلهم اكبر مني وساكنين معي في البيت وامه الاحدعشر يعني البيت مليان حريم والسلايف والبنات المتزوجات يجون ينومون كل خميس وجمعه وهات ياصجة البزران والحوسه وانا مالي حق اطلب بيت مستقل ارتاح فيه واحس بستقلاليتي..يعني لو مافيه الاامه بس ومعها وحده من خواته كان قلت مايخالف بسكن عندها واحتسب الاجر لكن البيت مليان مافيه اي استقلاليه مالي الاغرفه وحده وحمام والله ما اقدر اكل على كيفي ولا البس على كيفي حتى اذا جيت اطلع احسب حساب صح هم مايتدخلون فيني لكن انا انحرج مهما كان حرية الانسان واستقلايته وخصوصيته حق الله فرضه من فوق سابع سماء المفروض مايمنعونه الخلق..
المهم خالتي ام زوجي زعلت وسوت سالفه تدخلوا اخوانه وخواته يحاولون يقنعونها وفي الاخير وافقت اننا نطلع في هذا البيت اللي جنبهم لكنها تغيرت علي 180درجه..
ابفهم ليه ماادري كل بناتها وعيالها في بيوت مستقله وفي ارقى احياء الرياض وانا استكثرت علي دور جنب بيتها والله مابين بابي وبابها الاخطوتين او اقل طبعا قلبت علي وصارت تكشر في وجهي كل ماشافتني ولاترد علي اذا سلمت وتتجاهل وجودي طبعا انا كنت مازلت ساكنه عندها انتظر هالدور يخلص تخيلي ساكنه في بيت وحده تناظرك من فوق لتحت وتحقرك وتعامل الكل احسن منك حاولت اتقرب لها رغم اني ماغلطت انا كنت شارطه سكن مستقل والله يجزاني خير اللي سكنت عندها حول السنه رغم هذا حاولت اكسبها بالكلام الطيب والمعامله الحسنه لكن مافيه فايده اهديتها تحملت نظراتها والله انها كانت اذا دخلت غرفه قدام الكل تقوم وتطلع منها واذا جوا حريم عيالها تهلي وترحب وتقرب الكل منها وانا محقوره في اخر المجلس ماتسأل عني ولاعن اللي في بطني حتى فنجال القهوه ماتمده لي مريت بظروف مررره شينه ووحامي كان جدا قاسيه كل يوم دايخه وموديني زوجي للمستشفى الضغط عندي نااااازل وهي مستمره في قسوتها ومعاملتها السيئه لي..طبعا اللي يحبني ضاق صدره واللي يكرهني ويغار تشممممت لييين قال آمين

المهم تعبت نفسيتي من الحقران وسوء المعامله وتعبت العلاقه بيني وبين زوجي كلن كان يقولي ارحمي نفسك عشان هاللي في بطنك وش ذنبه تعذبينه كذا ..كلن حن قلبه الا اهي مارحمت على الاقل ولد ولدها اللي في بطني
المهم وانا في الشهر السادس خلص دورنا بعد ماطلعت روحي ولما جايوم طلعتنا من البيت دخلت عليها ابي اسلم عليها وقامت وطلعت من المجلس بعد ماعطتني نظره ابموت مانسيتها فشلتني قدام بناتها طلعت من بيتهم وانا اصيح وتعبانه زعلت علي وعلى زوجي وصارت ماتسلم حتى عليه رغم انه ابر اخوانه فيها تخيلوا تقول لبناتها قولوا لها لاعاد تطب بيتي ولاعاد تجيني وحتى يوم ولدت مازارتني الا في المستشفى دقيقه وحده ولاحتى قالت مبروك دخلت وهي مكشره وطلعت راحت تزور وحده قريبتهم في نفس المستشفى اما في بيت اهلي مازارتني ولاشالت ولد ولدها وحتى يوم طلعت من النفاس روشت ولدي وطيبته وقلت لابوه وده يسلم على جدته وبعد كم يوم رحت انا ازورها ودخلت عليها وهي جالسه تتقهوى هي ومرة ولدها وسلمت عليها وسلمت بدون نفس ولاحتى مدت لي فنجال قهوه ولاعبرتني بعينها..الكل تشمت فيني ابي افهم ليه تسوي معي كذا والله اني احسن حريم عيالها معها والله اني كنت اعاملها احسن مما يعاملونها بناتها ماطلبت الاحقي وانا شارطه والمؤمنون على شروطهم احس اني بموت من القهر حياتي انا ورجلي صارت جحيم اربعه وعشرين ساعه هواش ومشاكل بسبة هالموضوع نفسيتي مندمره ما احب احد يحقرني ويعاملني بها لمعامله والله ماودي اقطع فيها ولاازورها ما احب القطاعه ولا العزله واذا زرتها اهانتني ونكدت علي والله زوجي من طلعنا كل يوم يمرهم مالايقل عن نصف ساعه وانا كل يوم انادي بناتها عندي واكرمهم واحسن معاملتهم والزم عليهم حتى ينومون عندي يعني ماضريتها بشي ولاغيرت ولدها ولاابعدته عنها كأننا ماطلعنا بيتنا لازق في بيتها ورجلي كل يوم عندها ليش تسوي فيني كذا انا تعبت جربت كل شي دعيت وتصدقت صرت مثل المجنونه كل ماشفت احد قلتله ادع لي والله اني ماسكه بزران خواتي اقوله ادعوا لي..
ابغى رأيكم بكل صراحه وكل وحده قبل تكتب حرف تتخيل نفسها مكاني ارجوكم داخله على الله ثم عليكم تدعون لي عند فطركم وفي قيامكم ان الله يسخر لي زوجي وامه ويهدي مابيني وبين زوجي الله ينصرني على من ظلمني وياثرني على من حقرني اللهم ان كنت عالم اني ماطلبت الاحق من حقوقي فرضته لي من فوق سابع سما واني مانويت بشر ولاقطاعه انك تأثرني وتنصرني وتنزل الحسافه والندامه في قلبها ياااارب انت حسبي ونعم الوكيل ارجووووكم ادعوا لي والله ان الظلم له مراره مايعلمها الامن ذاقهاجعلكم ماتذوقونها,,