اللي تحس عندها حكمه تدخل تنصحني!

السلام عليكم


كيفكم حبايبي؟!

اليوم سالفتي مو مصيبه كبيره او مشكله مالها حل .. 

أبدا.. لكن هذي أسس ابي ابني حياتي عليها بالشكل الصحيح.. 

انا متزوجه لي سنه ونص ورزقني الله بولد .. 

لاحظت من اول زواجي تصرف من اهل زوجي ماعرفت كيف افسره ولكني اليوم نوعا ما توضحت الصوره ..

فيهم طبع يحبون اي احد يدخل حياتهم من اووول يوم لازم تصيرين تمونين عليهم ويمونون عليك كأنك العمر كله معاهم..

يعني اول ماتزوجت كانوا يبون اجلس معاهم والبس قميص وبدون تكاليف ومكياج واساعد واشتغل وكأني اعرفهم من زمان ومايبون حدود ابددد..!

انا احب اكون مع الشخص بساطه وبدون تكلف لكن احب يكون فيه حدود .. وفيه خصوصيات.. وفيه احترام..

مرت هذي الفتره وانا في حرب صامته عشان احافظ ع خصوصياتي والحمد لله نجحت في كثير اشياء.. 


اللي ضايقني من بنت اخت زوجي مراهقه( في اولى ثانوي) 

احنا انتقلنا لمنطقه فتره ومؤقته وبنرجع وهذي المنطقه فيها اخته وطلبوا نبقى معاهم هذي اليومين اللي بندور فيها ع بيت..

والله اخته عسسسل وما اظلمها وتحتتترم خصوصياتي الله يسعدها.. 

المشكله ف البنت .. ف البدايه اعتبرتها مثل اختي الصغيره وهي احسها تنبسط معاي ، وانا ماحبيت احرمها من اني ما اصاحبها واحسسها اننا مثل الاخوات بس من وقت لوقت احسسها انو فيه حدود !
بالذات هي لسا مراهقه وانا بحكم اني متزوجه واخاف تفلت مني كلمه من هنا او هنا وماتناسب عمرها..

هي الله يصلحها زودتها .. انا اعطيتها اريحيه معاي لكن مو بانفتاح مرررره فيه حدود شوي..

لا هي اخذتها بمواااانه مره .. تاخذ جوالي تقلب فيه ،، تحمل اللي تبغا بدون اذني ولا شوري يعني لو ما اخذه ماراح ينفك من يدها مع العلم اني لاحظت ان امها تتضايق مرره اذا جلست بنتها ع الجوال ( والله ماااا الومها) لانها اذا جلست عليه تزودها ولاعاد تساعد امها ولاشي .. فصرت اخلي الجوال ف يدي وابعده عنها قد ما اقدر .. بس بتاخذه مني مع اني حسستها اني اتضايق ،، فصرت احزم عليها واقفله واخبيه ف شنطتي..
تحملت بعض التصرفات تاخذ اغراضي بعضها انا اسمح لها وبعضها ماتستشيرني اببد القاه ف يدها..! 
انحرج اني اخذه منها وانقهر ع اغراضي اخافظ عليها والقاها مرماه وف يد الصغار ، والمشكله مااالي عندهم الا يومين مايمدي هذي الموانه كلها.. تحملت وحاولت ابعد شوي شوي ..

اللي كان يحرجني انها تجلس معاي وامها ف حاجتها وتدعيها تساعدها وهي تقوم معاها شوي ثم ترجع عندي، وكم مره اقولها قومي مع امك ماعليك مني انا ماراح اطفش .. لان اصلا تفكيري واهتماماتي مختتتلفه عنها وانحرج من امها ..!

المهم الحمد لله لقى زوجي بيت وانتقلنا .. وبعدها ف نهاية الاسبوع نادتنا اخته عندها ،، انا لبست واسشورت وتمكيجت يعني بدون مبالغه .. طبعا يوم كنا عندهم كنت بللقميص ورافعه شعري وبدون ما اتمكيج بس مرتبه شكلي .. اللي استغربت منه مرره وضايقني ، يوم دخلت متصلحه وهم كانوا لابسين قمصان وبدون تصليح بس مرتبين تخيلو نظرااااات استغراااااب منهم مررررره ويطالعون فيني وف لبسي وكأنهم يقولون يعني ماله داعي حتى حماتي كانت عندها نفس النظره بس يشهد الله انها ماضايقتني بكلمه ، هو مو من حقها تقول شي بس هي فعلا انسانه عاقله.. 

بس حسسوني اني سويت شي ماله داعي .. 

المهم بنتها اشتغلنتي طوول اليوم تقوللي ليش لابسه ، ليش تمكيجتي! ليش اسشورتي ولفيتي شعرك بالفير!!!
عشاني اسشورت ولفيت بعض الخصل بالفير زي الكير لي ماافيه اي مبالغه .. المهم قلت لها انا كذا حتى ببيتي ولحالي متصلحه ما احب اجلس كذا بدون زينه..!

وقلت امزح معاها : احيانا اروح عند خالتي واتصلح واخذ معاي قميصي اذا طولت السهره بدلت عشان اريح.. قالت ( البنت) طيب ليش ماجبتي معاك قميص ،، بعطيك قميص وغيري !!

انا هنا انننققهرت قلت مو شغلك !! ع كيفي بس طبعا قلتها بدون رفع صوت وبأدب..

شويات جالسه طول اليوم تقوللي لمي شعرك مو حلوو!!! 

طالعت فيها قلت يمكن تمزح ، هو شوي مع العبايه نزلت بعض الخصل بس ماخرب مره شي بسيط..

المهم تكررت منها الحركه ، آخر شي قامت فتحت شنطتي قالت عندك شباصه! 

قلت ليش؟! 

قالت شعرك قاهررني ! 

طاالعت فيها قلت وش احرق رزك انتي شعري وانا حره ..! 
قلت وانتي ليه ماتلمين شعرك ! قالت لا انا شعري حلو .. ! 

بعدين قالت كذا ابغاك تلمينه عشانه عاجبني تفييرته.. المهم طفففشتتتني وخليته الليين حسيت اني احتريت ورفعته فوق بطريقه مرتبه .. وهجدت بعدها. . 

اعرف ان تصرفها سخيف وكان بامكاني انفخ فيها اكرهها فيني ، وحاولت بالتلميح والتصريح احط احترام بيننا والموانه بحدود ، وتقديرا لمشاعر امها لاني اعرف ان الام يمكن تتضايق شوي اذا بنتها المراهقه تجالس متزوجه.،

ابي رأيكم .. كيف اتصرف بحكمه مع اشياء زي كذا،، هي تافهه ف نظر البعض لكن هي اساسيات يمكن ماننتبها لها..

مع العلم ان اغلب العايله يحبون يمونون بقووه بس لمن المح لهم خلاص يوقفون عند حدهم ،، وراح اكون مختلطه معاهم لفتره طويله ،، وماودي اخسر اخت زوجي وف نفس الوقت ابي لخصوصياتي احترام