رفع لعيونك

السلام عليكم

انا لسا ماسويت العمليه
لكن بحكم قرائتي ودوراني في المواقع الطبيه وتجارب البنات راح اتكلم بشكل عام عن العمليه وانواعها
وبلييييييييييز اعذروني اذا فيه معلومات غلط ولا ااحد يعتمد على كلامي اسالوا دكاترتكم افضل

راح اركز على عمليات الفك العلوي لاني اعاني منه

اولا

لازم الاسنان تتهيأ بالبريسز لمده معينه تختلف من حالة للثانيه اقل شي 4 شهور الى سنتين
في بعض الاحيان لازم تخرب الاسنان مثلا لما يتفق دكتور البريسز والجراح على خطة معينه تقتضي ان الجراح محتاج فراغ مكان القص اللي راح يسويه بعظم الفك فيجي دكتور البريسز ويحط الاسنان بترتيب معين بوجود فراغات بالمكان اللي يبيه الجراح
او في حال بروز الفك العلوي يخلي الاسنان السفليه داخله على جوا اكثر من الازم وتبين ان الاسنان العلويه بارزه
بعد الجراحه يكون تطابق العضة ممتاز وبعد الجراحة فيه تكملة للبريسز من 6 شهور الى سنه عشان تترتب الاسنان بشكل افضل
بعض الناس اللي عندهم ضيق بالفك العلوي مثلا بعد العمليه راح تكون عندهم فراغ (فلجه) بين السنين الاماميين وهو مكان القص بس راح يتعدل بالبريسز

مرحلة البريسز هي اللي ترفع الضغط لانها تاخذ وقت طوييييييل نصيييييييييحه اللي مفكره تسوي هالعمليه لازم تبدا بدري

افضل عمر للعمليه من 19 الى 25 سنه تقريبا وطبعا مو شرط

نجي للعمليه

بالنسبه للفك العلوي فيه كذا نوع لمكان القص اتوقع 3 انواع فيه نوعين يمكن ينعملوا للتشوهات والحوادث
بس النوع اللي راح اتكلم عنه هو Lefort 1
هو تقريبا بنصف الوجه تحت فتحات الخشم مباشرة هذي الطريقه راح تحرك الفك عموديا صعودا او نزولا او افقيا للامام او الخلف
للناس اللي مثل حالتي عندهم gummy smile ابتسامه بلثة راح يعملوا لهم maxillary impaction او رفع للفك العلوي فيشيلوا العظم الزايد اللي مسبب هالمشكله وتلقون هالناس عندهم طول بالوجه او الوجه يكون نحيف او المنطقة اللي من طرف الانف الى طرف الذقن طويله فبعد ماينشال العظم الزايد هذا راح يعطي امتلاء للوجه وتختفي مشكلة اللثه
كبش الفداء اللي راح يصير هو تغير بشكل الخشم
بحكم مكان القص وتحريك العظم راح ينفرش الخشم شوي والفتحات راح تكبر نوعا ما ومع الرفع راح يميل الحاجز الانفي
انتوا تخيلوا معكم سترو(المصاص تبع العصير) وحاولوا تقصروا من طوله بالضغط من جهتين وش راح يصير راح يكون مايل تقريبا كذا يصير للحاجز
بس بشرى ساااره الدكتور الناجح والدقيق راح يحل مشكلة الخشم واذا صار فيه تغيير راح يكون تغيير بسيط بنسبة 1ملم بالنسبه للفتحات يعني ماراح يلاحظه الا انتي هذا اذا صرتي مره دقيقه والناس ماراح تلاحظه راح يثبت طرفين الانف بالعظمه وراح يقص جزء من الحاجز الانفي ويعدل ميلانه (septoplasty)
تذكروا مثال السترو مو لما ضغطنا كيف شكله قصوه وشيلوا الجزء الزايد وبيصير مستقيم<< رااايقة كانها تدرس اولى ابتدائي
اعذروني عالتشبيه اللي ماادري وش يبي بس ابيكم تدخلون جو مع هالعمليه خخخخخخخخخخ
راح يتثبت العظم بـ screws & plates صفائح صغيره مصنوعه من التيتانيوم<<ان شاء الله مو غلط علي
المهم هالبليتس ممكن تجلس طول العمر وبعض الناس ممكن تضايقهم يتقززون من ملمسها مثلا مع انها مو باينه بس مو حابينها او ممكن عشان الالم او التنميل لانها ممكن تضغط على اعصاب معينه فممكن تنشال بعملية بسيطه ماتتجاوز الساعه ونص
بالنسبه للفك السفلي
بصراحه ماعندي خلفيه كبيره عنه بس راح اقول اللي اعرفه
للناس اللي عندهم بروز بالفك السفلي نفس الشي لازم بريسز وتختلف المده من حالة للثانيه
ممكن يعملوا BSSO < اسم العملية اختصار لكلمات بس مو متاكده منه يعني يرجعوا الفك السفلي لورا وتنحل مشكلة البروز
بعضهم يحتاجوا العمليه للفكين العلوي والسفلي عشان يعدلوا العضة بشكل صحيح فيقدمون الفك العلوي لقدام والسفلي يرجعوه لورا
طريقة القص يمكن ماتوضح الا بصورة يشيلوا العظمة الزايده من الفك السفلي من الجهتين ويرجعونه بعدين يثبتون العظم بالبليتس
للناس اللي عندهم تراجع بالفك السفلي retrognathic mandible او الـ weak chin
فيه طريقتين على حسب الحاله
الاولى ممكن يكون التراجع بالفك السفلي نفسه ففي هالحاله راح يقدمونه ويسمونها mandibular advancement
الحالة الثانية تراجع الذقن بس فيعملوا genioplasty اللي هوتقديم لعظمة الذقن بس وممكن تنعمل على طول بدون بريسز ووجع راس وممكن جراح تجميل يعملها وكثير من الفنانات يسوونها بس الافضل جراح وجه وفكين
وفيه بعض الحالات للتراجع تنعمل الطريقتين
بالنسبه للـ TMJ المفصل الفكي
الجراحة لعلاج حالات التهاب المفصل الفكي ماعندي اي خلفية عنها بس اللي اعرفه انها نوعا ما صعبه لكن الطب تطور
وفي الغاااااالب اخر شي يلجأون له هو الجراحه اذا الحالة تطورت كثير لانهاا التهاب مفصل واحتكاك معناتها دسك لان الماده الهلامية اللي تسهل حركة المفصل قلت فيسبب احتكاك وتاكل بالعظم<هذي من معلوماتي المتواضعه فمو متاكده منها
بعض الناس عند النوم يضغطوا عالاسنان بشكل كبير ولما يصحوا من النوم يحسوا بالام فظيعه بالمفصل في هالحاله يستخدم مثل القطعه البلاستيكيه اثناء النوم فقط تمنع العض بقوة
بعض الناس لما يتثاوبون بذمة خخخخخخخخ يعني يفتحوا الفم على مصراعيه يعلق ويصير الفم مفتوح مايقدرون يسكرونه

(فاصل)
وحده من صديقاتي صارت لها هالمشكله وجت وحده الله يقلع ابليسها قالت ياعمري فكك يهنق معك اضغطي (ctrl+Alt+Delete)
وسوي انهاء المهام هههههههههههههههه<< سماااجه ادري
المهم
اذا علق الفك اتوقع يسوون تمارين معينه ويحطون كريمات الين يرجع بس بعد كذا يحاولوا مايفتحوا فمهم بذمه اثناء الاكل والتثاوب
والام المفصل ممكن تخف بالمهدئات وفيه وحده اذكرها تقول صرفوا لي مهدأ لمدة 6 شهور بس ينحححف مره <يابخت اللي تسوي دايت ههههههه
بعد العملية
طبعا يختلف من شخص الى اخر وفيه اشياء مررررره نادره يعني لاتخافون
احلى شي بعد العملية انك ماراح تحسين بأي الم راح يعطونك ابر مسكنه طول ماانتي بالمستشفى وغير انو الاعصاب الحسية تكون متأثره بعد تحريك العظم يعني تاخذ وقت على بال ماترجع لحالتها الطبيعيه
من اثاار البنج الدوخة-الغثيان- الانتفاخ فشي طبيعي تحسين بهالاشياء لانك تحت البنج اكثر من 4 ساعات وطبعا مو كل الحالات ممكن اقل وممكن اكثر بس اللي اعرفه حاليا مو اكثر من 7 ساعات للفكين اجمالا مع مدة التخدير
راح تطلعين من غرفة العمليات الى العناية لمدة ساعة او ساعتين حتى يتاكدوا ان كل شي مستقر
الوجه راح يكون ملفوف كله الاسنان مربوطة ببعض بمطاطات واساسا ماتقدرين تفتحين فمك
مع الغثيان ممكن الواحد يرجع دم الله يكرمكم يمكن صعب شوي مع تقفيل الفم بس ربي يعين واكيد الدكاترة ماخذين احتياطاتهم
للناس اللي بيسوون الفك العلوي التنفس بالبداية يمكن راح يكون صعب لان الانف مليان دم والفم مسكربس يمكن اول يومين وبعدها يتحسن
الجلوس بالمستشفى كثيييير قالوا لي يومين وفيه ناس يجلسوا 5
التورم راح يغير ملامح الوجه هذا شي اكيد والشفايف او البراطم بمعنى اصح تغطي على براطم شيماء علي واللي خلفوها بعد خخخخخ بتصير وش كبرها الله الله بالفازلين او الكريم اللي بيعطونكم اياه
يمكن اللي مايعرف شي راح ينصدم ويندم لانه سوى العملية بس مو هذي النتيجة النهائية التورم راح يبدا يخف بعد اسبوعين بس الوجه كل يوم له شكل لمدة 3 شهور
النفسية راح تنعدم يعني لازم يتهيا الواحد نفسيا للتغيرات يعني راح يواجه تورم +تعب+صعوبة في النوم+صعوبة بالاكل كل شي سوائل الله يديم النعمة+ انعزال عن المجتمع فاكيد النفسية زفت
تقدرين تطلعين للناس بعد شهر ونص او شهرين يكون التورم خف بنسبة كبيرره
بالنسبة لفقدان الاحساس بعد العملية للناس اللي بيسوون الفك العلوي راح يرجع اسرع من اللي مسوين السفلي تقريبا بعد شهر يبدا يرجع الاحساس
بس للسفلي ممكن يطول اكثر من شهرين الى 6 لان على جوانب الفك السفلي فيه العصبين الرئيسيين ولو انقطع لا قدر الله ممكن مايرجع الاحساس في الشفايف السفلية والذقن والاسنان السفلية واجزاء من اللسان بس هذا شيء نااااادر جدددددا لان الاعصاب هذي واضحه وكبيرة
الاكل راح يكون مطحون لمدة شهر الى شهر ونص وتقفيل الفم اسبوعين تقريبا الى شهر ونص
مممممم شو كمان
ايوا تذكرت تقريبا اول اسبوعين راح يكون اللعاب غزير وماتقدرين تتحكمين فيه ينزل من غير ماتدرين حتى الاكل ممكن تلعوزين نفسك بدون ماتحسين لان الاحساس حوالين الفم معدوم بس مع الوقت كل شي راح يرجع لطبيعته باذن الله
اول يومين داومي على كمادات الثلج وبعدها كمادات الموية الدافية لانها تخفف التورم كثير
فيه اشياء كثيرة ومضاعفات تعتبر ناااادرة جدا ولا واحد بالمليون ممكن تحصل وهذي لقيتها بالمواقع الطبية ومو حابة اتكلم عنها
عالعموم ان شاء الله عطيتكم نبذة بسيطة من معلوماتي المتواضعة
على فكرة استخدمت بعض المصطلحات الطبية عشان تبحثون بانفسكم وان شاء الله استفدتوا
انا حاليا ركبت البريسز عند الدكتور عادل الهدلق وباسوي العملية عند الدكتور عثمان الطويرقي مشواري طوييييل ادعوا لي بتيسير اموري وربي يوفقني وتنجح العملية

للرررررررفع

اولا شكرا شكرا شكرا يا (innocence ) على الشرح الوافي وجعله في موازين حسناتك..
وثانيا:انتي معاي بالماسنجر بس لان ماسنجري خربان له اسبوع عشان التحديثات الي صايره هالايام.(عجزانه اوديه اصلحه)
في سؤال بليز الله يخليك ضروري نردين علي ؟؟
انا الان مركبه بريسيز وبسوي العمليه ان شاء الله بس الدكتور قالي للفك السفلي راح نقدمه على قدام عشان
تتطابق اسنانك وبالنسبه اللثه المكشوفه بالفك العلوي راح نطلع الاسنان نخليها بارزه وراح تختفي وهذا يسمى التقويم الجراحي؟؟؟
المشكله فعلا طلع اسناني وبرزها مره مره لدرجه صار شكل اسناني تحوم الكبد وكثير اسالوني قالو ليه اول اسنانك داخله ليه خربتيها؟؟ وطلعتيها ؟؟بس انا ماااحب اشرح للي معاي بالدوام لين اشوف وش يصير لي..
هالحين الدكتور يقول راح نقدم الفك السفلي الى قدام فيصير مافي برووز لاسنانك؟؟
المشكله ماعرف احد قدم فكه السفلي على قدام وانا بصراحه وجهي خلقه طويل ونحيف اخاف اذا قدمو فكي السفلي
يطول زياده؟؟؟؟؟؟؟؟؟ظ
هل تعرفين احد نفس عمليتي وهي تقديم الفك السفلي الى قدام؟؟(راح يكسرون الفك طبعا ويقدمونه على قدام)
ثانيا انا عجزت ابغا اسوي العمليه عند الطويرقي بس ماحصلته تخيلي لي سنه وانا احوس ماحصلته؟؟
وين الاقيه ؟؟تعرفين رقم جواله تكفين ابغا اسوي العمليه عنده ..
لان انا سويت البريسزز عند دكتور الادريس بسيقال والدكتور الي بيسوي لي العمليه ان شاء الله هو
ناصر النوح وبصراحه ودي استشير كمان
الطويرقي لان كلن يمدحه..
كلمت الحرس ولا عطوني علم عن الطويرقي كلمت امج وعيادات سعد الخرسه وكمان مركز الاعمال
تخيلي كلهم يقولون مو بعندنا عثمان الطويرقي؟؟وين احصله بليز لاتي تعبت ابغا بس استشاره عشان اطمئن..
والمشكله ماعندي ملف بالحرس ولا ابغا اصلا حكومي..

اذا تقدرين تعطيني رقم مستشفى خاص او عياده اكيد اكيد يكون موجود فيها عثمان الطويرقي والله والله ادعي لك بظهر الغيب..
لاني من جد قرفت رحت لكل الدكاتره بس باقي عثمان ابغاه للضروره..
ومره مره شكرا يا innocence

هلا اختي

المسن بالغالب ادخله للايميلات يعني ارسلي ايميل اضمن :biggrin:

بالنسبه لتقديم الفك السفلي يمكن بالاساس انتي عندك تراجع في الفك السفلي وهذا اللي معطي لاسنانك العلوية بروز
ويمكن الفك العلوي طبيعي وسليم
طبعا الدكتور ادرى وشايفك وشايف الاشعة لان فيه قياسات طبيعية للفك ومع الاشعه راح يبان الخلل وين
بالنسبة للثة انا ماادري وش راي دكتورك اذا شايف انك ماتحتاجين شي للفك العلوي مثل ماقلت لك هو ادرى
وعلى فكرة الدكتور ناصر النوح ممتاز وكثير مسوين عنده عمليات ومبسوطين

فيه حلول ثانيه لانكشاف اللثه ببنج موضعي ووقت قليل
1- ابر البوتكس وهذا حل مؤقت يدوم من 4 شهور الى 6 وانا لما شفت النتايج احس يعطي الابتسامه شكل مو طبيعي
2- قص جزء من اللثه بس في حالة اذا كانت مغطية جزء كبير من الاسنان وطالعة الاسنان صغيرة يعني تقريبا تقدرين تسمينها تجميل للثة اللي مو مرتبة او عشان الاسنان صغيرة
3- استطالة الشفة او lip lengthening or lip repositioning
وهالعملية ببنج موضعي بالعيادة طريقتها
يقصون اجزاء من العضلات والانسجة اللي تحت الشفة العلوية بعدين يخيطون وتكون الشفة مرتاحة وماترتفع مع الضحك
وشكل الشفة العلوية بدال ماتكون مقوسة :(<< مثل هالمملوح تكون مستقيمة مثل هالاطخم :ohplease:

وفيه حالات تستخدم الطريقة 2 و 3

ناقشي دكتورك واساليه عن هالحلول للثه

بالنسبة للدكتور عثمان الطويرقي انا مااخذت معه موعد الدكتور عادل لما تاكد اني باسوي العملية نسق معاه يجي لمركز امج وصار عندي موعد وشافني بنفس العيادة
جربت اكلم عيادة الدكتور سعد الخرسة بس الظاهر نفس الشي وقالوا لي كلمي سكرتيرته بس والله الرقم ضاع مني
انتي اتصلي على عيادة سعد واطلبي رقمها هم اللي معطيني اياه