حبيبتي النورس 00
روحي من الرياض للبحرين سياره واطلعي من هناك لعمان تكون التذكره ارخص 00
واحنا سوينا كذا ومره لعمان ومره لدبي00
ويوم دبي تدرين من الرياض والشرقيه كان سعر التذكره الوحد بحدود 1200 ومن البحرين 600 يعني انا وزوجي رحنا بسعر تذكره وحده من الشرقيه 0

مشكورة ريماز على الفكرة هذي بس احنا ودنا نشحن السيارة بعد وتعرفين بتاخذلها وقت عشان توصل .
حمودي وعبودي وان اضم صوتي لصوتك ..يالله ساعدونا الله يساعدكم .

:time:الصراحه بعد ماقريت مواضيعكم عن صلاله تحمست اروح بس هل تكفي خمس أيام . . . .
وأشكركم على الشرح الوافي ولامكاتب سياحيه كفيتو ووفيتوا جعله الله في موازين حسناتكم. .:32:

انا اروح عن طريق البحرين عبر طيران الخليج لانه ارخص كثير 00 ومنها تمشيه 0

تقريبا الحين رحت صلاله 4 مرات سنويا نصيف هناك ،،

وش اقولكم
البلد بإختصار جنه الله على ارضه
طبيعيه خياليه
كل منطقه بعمان لها جوها
امممم بخصوص الرحله ،، انا افضلها بالسياره من ناحيه انك راح تتمتعين بكل شبر تمرين فيه على ارض عمان ،، واحبها بالطياره لان بجد الرحله متعبه خاصه لاصار معك اطفال ..

احنا مشينا من الدمام اين الامارات ونمنا في ابوظبي .. هذي تقريبا 9 ساعات ،،
ثاني يوم لما نطلع نروح من ابوظبي للعين ومن العين للحدود الامارتيه العمانيه ،، وهذي مشوارها سهل بعد لانك بتمشين في ارض الامارات وخبركم ماشاء الله الله لايغير عليهم الدروب عندهم حلوه محطات وراحه ودلع فمابتحسون بالوقت ،، اصلا لما تدخلين العين شوي بتحسون براحه لان العين حلوه ،، بعدين لازم اذا بتصرفين فلوسك اصرفيها بالعين احسن لان بعمان اعتقد يختلف المبلغ .. ماني متأكده بس اشوف اخوي دايم يتكلم عن هالشي ويحرص عليه ..

المهم..

لما تدخلين عمان طبعاً اول الرحله بتكون حلوه نوعاً ما وكل شوي بتمرين بمدينه او قريه وعلى هالحال .. وبعض المدن بصراحه تجنن مثل نزوى وبهلاا <<< اثار واشياء تجنن .. غير ان البلد اصلا طبيعتها تختلف بقوه عن السعوديه ..

اذكر العام كنا بالطريق وكان الوضع حلو ،، بس قربنا من محطه بترول قبل نزوى ولقينا سياره فيها شباب امارتيين كانو يخبرون اخوي يقولون له انتبه لان بنزوى امطار قويه ،، وبالفعل وربي مانساها وبنفس الوقت غيمت الدنيا وكل مامشينا لقدام نحس بالتغيير في الجو ،، وبدت تمطر وتوقف وقضينا مشوار طويل على هالحال وكان الوقت ممتع .. كنا بعززززززززززززز الصيف تخيلوا تطلعين من الحر وتدخلين بجو الامطار والخير شي روعه ..

بعد مسافه عدينا بهلااا وعدينا مدينه تجنن انا احبها مع ان مافيها شي بس سمعت ان هالمدينه فيها غزلان او مدري شسالفتها المهم هالمدينه بمدخلها تماثيل غزلان ..

طبعاً الدرب طويل ولاتتوقعون من كلامي انه قصير لا جداً طويل لكن يعتمد على النفسيه ان كنتي مرتاحه بتعدين كل شي وانتي مبسوطه

المهم نمنا واصبحنا في مدينه الغزلان هذي .. والصبح مشينا قاصدين ثمريت .. وثمريت اقرب ميدنه لصلاله وجوها خرافي مع انها في وسط الصحرا لكن تجيها امطار وغيوم صلاله بس بدون رطوبه
بس جووووو بارد وامطار ووناسه قوه لكن من غير رطوبه تقريبا

بعد ثمريت بستين كيلووو راح تدخلين على تغيرات بالتضاريس واضحه <<<<<<< عجبتني هذي ههههههههههههههه

المهم بتدخلون على ارض تبدا فيها الارتفاعات .. تشوفون كأن جبال صغيره حولكم وهي ماهي جبال بس اماكن صغيرون مرتفعه تشبه للجبل وبتبدى تكثررررررر لين ترتفع اكثر واكثر وبتحسون انكم كل ماتقدمتوووووو اكثر كل ماصار الارتفاع اكثر " سبحان الله " تدرج رهيب في الطبيعه عندهم


طيب الحين نجي للجد .. تعرفون بالجغرافيا درسنا منطقه ظل الجبل ،، واللي هي عباره عن جبال رفيعه مررررررررررررررررررررررره الغيوم تحاول تتجاوزها وماتقدر فترتد هالغيوم على المنطقه وتنزل فيها امطار وعاده تكون هالارض قطعه لونها اخضر ..

وهذا اللي بيصير في صلاله .. جبالها ارتفاعها كبير جدا
والغيوم تعجز تتعداها
فترتد وتنزل امطار وتحلو الارض عندهم بوسط الصيف ..


مدخل صلاله من ناحيه الطبيعه خرااااااااااااااااااافه بجد

يشرح النفس والله لو كانت همومك قد الجبال
بتشوفين كل شي عجيب هناك .. بس انتبهو في المدخل عادة يكون الرذاذ لاعب دور فيها فتصير الشوارع تزلق كثيرررررررررررر كثير وتكرمون هناك المواشي " البقر والجمال واصحاب الأمااااااااااااااااع ههههههههههههه " كثيره وتشوفونها تعبر الطريق بشكل مجنون ومتهور .. فأنتبهو لاتجي بطريقكم فجاءه ..

غير كذا انتبهووووووووو حسكم عينكم تدخلون صلاله في الظلام .. المنطقه والله خطرة حيل .. ادخلوها بالنهار .. نامو بثمريت وبعدين دخلو البلد منها فرجه اكثر ومنها حذر ..

في اول الطريق في منطقه في الجبال بتلقون فيها دوريات وووو حقات امن الطرق ،، في هالنقطه بتحسون وش كثررررررر العمانيين مضيافين وناس طيبه ،، بيرحبون فيكم بشكل جميل وبيسئلونكم عن زيارتكم هل هي الاولى او لا ومابتمشون من عندهم الا وهم موصينكم على انفسكم وبيعطونكم نشرات وموجز بحاله الجو داخل وبكل شي ممكن تصادفونه ..

بعد هالنقطه بتحلى الدنيا بعيونكم هههههههههههههه

والحين انا تعبت من الكتابه بروح ارتاح وبعدين اكمل لكم عن احلى الاماكن بصلاله .. وعن السكن والمطاعم وكل شي

:)

ملاحظه : مهما شفتو صور لصلاله او شفتو برامج بالتلفزيون ترا ماتعطي البلد ربع حقها .. لانها اجمل بكثير ..