اللي تلاقي ضيقه وكتمه عند قراءة القرآن 🤍

اللي خلاني اكتب الموضوع اني اشوف كثيير بنات فيهم خير وودهم يقرأون القرآن ويلتزمون بالاذكار ويغيرون حياتهم مع رب العالمين بس مو قادرين..



يحسون بضيقه وغلقه ويحسونه شي ثقيل على القلب، ويدخل لهم الشيطان من مدخل التسويف وانه بكرا تتغيرين بكره تتوبين بكره تكونين افضل وتمر الايام والسنين والغلقه تزيد ومافي تغيير..


اذا انت من هالفئه فحياكِ في موضوعي وعسى انك تلاقين فائده..

ولا اتمنى منك سوى دعوه بظهر الغيب 🤍..
محدثتكم كنت هاجره للقرآن بكل اسف، اصلا ماكنت اقرأه الا في المدرسه، وفي رمضان بدايته لما اكون متحمسه ومااقدر اخلص جزئين على بعضها..



احس بضيقه شديده لما اقرأ القرآن، وماودي اقول لكن حتى سماع القرآن كان يضايقني للأسف الشديد..

ولا اعرف وش السبب..


وطبعاً كان ممكن اقول معيونه او محسوده او مرض روحي لكن في الحقيقه ماحاولت اعرف..

لكن بحمدالله ومنته ماانقطعت من الدعاء رغم تقصيري،

كنت ادعي لنفسي بالهدايه والثبات في كل مره ارفع يدي فيها..



بعيده عن رب العالمين

ادعي

منقطعه عن الصلاه

ادعي لنفسك بالهدايه والرجوع

عندك ذنوب لها اول مالها اخر
ادعي
ولاتقطعي اي وصل بينك وبين الله، ولو كان بسيطاً،. ولو كانت دعوه صادقه او دمعه ..

تذكري قوله تعالى(قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ)


مافي دموع رققي قلبك وتباكي في مواطن الاجابه،

مستحيل انك تحاولين وربي يخذلك،

لا ورب الكعبه انه كريم عظيم رحيم بعباده،

لو حاولتي ودعيتي وبكيتي بتلاقين ثمرة محاولاتك ولو بعد حين..


الدعاء اول الطريق وآخره واوسطه..



جاتني فتره احاول اقرا القرآن، والله اني استحي اقول بس من الضيق كنت أبكي وانا اقرأ 😣
مكتومه احس كنه احد جالس على صدري ومتضايقه مرره، مع كذا كنت أقرأ واغصب نفسي..



مافي شي يجي بالساهل يابنات المجاهده المجاهده..

تخيلي عندك هدف انك تاخذين الماجستير،

وعندك بيت واطفال ومشغوله لكن هدفك وحلم حياتك هذا الماجستير، صدقيني انك تقدرين، وتلاقين الوقت وتتركين الجوال واي شي ممكن يهدر وقتك..

لانه عندك هدف واضح، تبغى توصلين لشي معين..



فكيف لما يكون هدفك رضا الله والقرب منه 😭..
تراه أعظم هدف في حياتك ممكن تسعين له..
فلازم تغصبين نفسك وتجاهدين ولو وصل معاك الضيق للبكا والدموع..

صراحه حتى لما وصل معاي الموضوع للبكاء ماوقفت صرت في تحدي بيني وبين الشيطان علشان ادحره..


طبعا اغلب الناس لما تتضايق عند قراءة القرآن تعلقها بشماعة العين والحسد..

لكن بما اني جربت هذا الشي فاقولك غالبا هالشي ماله علاقه بالعين..
كل ماكنتِ بعيده عن رب العالمين وقلبك قاسي وعندك ذنوب ولاهيه بالدنيا..

كل مازاد ضيقتك وغلقتك عند قراءة القرآن،


ممكن في بعض الحالات يكون عين لكن غالبا السبب هو غفلة القلب 😔..

لذا خليكِ في جهاد دائم ودعاء دائم وبإذن الله تلاقين الفتح في العبادات..
لعلنا انا وانتِ نكون من المشمولين في هذه الايه الكريمه (وَآخَرُونَ اعْتَرَفُوا بِذُنُوبِهِمْ خَلَطُوا عَمَلًا صَالِحًا وَآخَرَ سَيِّئًا عَسَى اللَّهُ أَن يَتُوبَ عَلَيْهِمْ ۚ إِنَّ اللَّهَ غَفُورٌ رَّحِيمٌ
اذا جاهدتي نفسك وصدقتي مع رب العالمين راح تلاقين لذه في العباده وتصيرين انت تقتنصين الأوقات علشان العباده..

قال أحد السلَف: “جاهدت نفسي بقيام الليل عشرين عامًا حتى استقامت، ثم تلذذت بها عشرين عامًا، والله إني لأدخل في الصلاة وأنا أحمل هم خروجي منها”.


هذا تخيلو عشرين سنه يجاهد نفسه واستاذ فيها عشرين سنه..

واحنا نجاهد نفسنا يومين ونتكاسل الله يغفر لنا 😢
لو جاهدتي بتلاقين بعد كذا لذه للعباده ولذه للقرب من الله ويصير هالشي اهم شي بحياتك..

بس اصدقي النيه وجاهدي 🤍



اخر شي تخيلي انه اهلك او زوجك قالولك انه في سفره ممكن تجي في اي وقت

جهزي شناطك وفي أي وقت ممكن نقول يالله رايحين، خليك مستعده..

اكيد راح تجهزين شنطه وتحطين فيها اللي تحتاجيه وزياده علشان ماتجي السفره على غفله وانت مو مستعده وتتورطين..



وهذا حال الدنيا..
قال عليه الصلاة
والسلام (كُنْ في الدُّنْيا كأَنَّكَ غريبٌ، أَوْ عَابِرُ سبيلٍ)



الموت ماراح يستأذن، ويشوفنا مستعدين او لا..

الموت ممكن يجي على غفله فهل انا وانت مستعدين مجهزين نفسنا له في لحظه؟

ماتشوفون كيف كثر موت الفجأه للصغير قبل الكبير..



كل يوم تصبحين فيه تخيليه اخر يوم وتفكري كيف ممكن تقابلي رب العالمين فيه..

هل قرأتي قرآن اليوم او ذكرتي الله او تصدقي او قمتي الليل أو صمتي؟

هل جهزتي نفسك للسفره؟..


تراني في غفله اكثر منكم لكن ارجو من الله ان يغفر لي ذنوبي ويقربنا جميعاً اليه ويحسن خواتيمنا 🤍


اللي قرت الموضوع كامل اهنيك لأنك عندك اراده وهدف وبإذن الله توصلين لها 🤍