السيده رمانه @alsydh_rmanh

عضوة فعالة

اللي تنصح بالطلاق.... تدخل.....

بسم الله الرحمن الرحيم
اول شي اسمحوا لي الموضوع مو مرتب ولا منسق فكرته تدور ببالي من زمان بس من كثر ما استفزتني بعض الردود قبل شوي عزمت اني اكتبه
اول شي اعرفكم بنفسي
عشان تعرفون منين جبت كلامي
انا وحده من المجتمع عندي كميه هائله من المشاكل وعندي مساحه كبيره من السعاده
تزوجت مثل كل بنت مريت بصدامات مع زوجي كبيره وقويه لكن فيه اساس للزواج قوي زوجي يحبني وزوجي فيه صفات رجوليه لكن فيه اختلافات كبيره فكرت بالطلاق كثير وطلبت الطلاق كم مره لاسباب اشوف انها كبيره هنا ناس بالمنتدى تشتكي منها وانا ما ابغى اذكرها لاني ما ابغى اعيد لنفسي جو المشاكل الحمد الله اهم شي اني صفيت راسي من القلق ليه اعيده
المهم كان لي صديقه لمن اقول لها انا خلاص ابغى طلاقي تقول ايه والله تلقي مو معقوله هذي عيشه احس انك مكبوته وين كنتي وكيف صرتي انا زوجي دايم يسالني يقول لي صديقتك هذي بنت الفلان وش جابها تسكن بهالحي طبعا هي قصدها انو مستوى زوجي اقل من مستواي
طبعا مشاكلي معه مو ماديه بس هي تذكرني بهالشي
كنت احس لحظتها اني اكره زوجي
يعني شين وقوي عين ولمن يجي للبيت كانت تزيد المشاكل
في المقابل لي صديقه ثانيه لمن اشكي لها علطول تنط بوجهي كلللللللللللل الرجال كذا
اذا تطلقتي من بتتزوجين واحد احسن منه؟
ما راح تتزوجين الا اقل منه
كلامها ادري انه مو صحيح وان المطلقه ممكن تبدا حياتها من جديد لكن هي عشان تكرهني بالطلاق
وكلامها كل الرجال كذا هي صادقه
يعني بنات عمي وبنات خالي بيجون يقولون ازواجنا يسوون كذا محد يدري عن الحياه الداخليه للناس وش يصير جوا البيوت
كانت صديقتي الله يوفقها ويسخر لها زوجها يا رب رغم ان مشاكلها الكبيره تجلس تهديني لحد ما يجي زوجي واستقبله بعد الهوشه اللي كانت بيننا بهدوء ويتفاهم معي ونتراضى ولا كان شي صار
انا لو اشرح لكم مشاكلي ماراح تصدقون مريت بكل انواع المشاكل بس الصبر و الحكمه هي اللي تخلي الحياه تمشي وبعض الاحيان يكون الصمت حكمه مواقف كثيره هدتني فيها واسكت ما اتكلم وهو يندم ويجي ما اقول يراضيني لكن يسمح خاطري
بعد كم سنه من زواجي الوضع المادي تغير كثيييير ووضعي تغير كثير ما انتهت المشاكل بدت مشاكل من نوع ثاني بس الشكل العام لحياتي طبيعي واحسن من طبيعي انا احسن من كثير من قريباتي جلست افكر كيف كان زوجي وكيف صار ؟
كيف لو كنت فرطت فيه وشتت عيالي مريت بظروف صعبه لكني ما ابغى اقول صبرت
لا
اقول صبرتني صديقتي
ولحد الان ادعي لها من كل قلبي
اكرر مشاكلي مو ماديه مشاكلي لو كتبتها لكم هنا اتوقع كثير قال
لو مكانك ما اجلس معه ولا دقيقه
لان هالكلمه استفزتني كثير بردودكم على المشاكل
حرام عليكم تجي وحده محتره من زوجها وبينها وبينه طفل او اطفال وتقولون تطلقي
محد فكر فيكم وش كبر هالكلمه وايش عواقبها العيال هذولا بارقاب مين؟
انتي ياللي تقولين تطلقي حطي نفسك بموقف واحد انك فبيت اهلك وعيالك بعيد عنك كيف تحطين راسك على المخده وتنامين
اذا عيالك معك
طيب بكره بيقولون وين بابا
يرضيك تشوفين عيون عيالك يطالعون عيال اخوانك مع ابوانهم وهم بعيدين عن ابوهم مهما كان هذا الاب
الطلاق شي بيد صاحبه المشكله ولا تقرره الابعد الاستخاره مره ومرتين وعشرين وميه مره تستخير
تجي بلحظه غضب وتسمع كلامك قبل تسمع لعقلها وتطلب الطلاق
انا مره قريت فمنتدى وحده تقول تطلقت والسبه انتم وكانت تلوم بنات المنتدى
اللي ما تدخل بمحضر خير لا تدخل
تبغين تكتبين شي ادعي لها باللي فيه الخيره سواء طلاق او رجوع
واللي يقهرني
تجي وحده تشتكي ان زوجها يخونها
تجي وحده تقول تراه يحبها
يعني وحده مقهوره وانتي يعني تقهرينها زياده
لعلمكم انو اي وحده تقول مشكلتها مستحيل تقول كل التفاصيل الصغيره والاشياء الدقيقه يعني الحب شي ما ينعرف الا اذا كنتي تشوفين الشخص وتشوفين عيونه وحركاته
وهذا الشي اللي تغفل عنه صاحبه المشكله ويمكن ما تدقق فيه
ادري انكم تنصحون عن حسن نيه وهذا يكون تعاطف مع المشكله لكن لا تتسرعون وتنسون العواقب
واخيرا احنا هنا خوات نكمل بعض وانا اعتب فقط عليكم لان العتب للاحبه ووالله اني اتمنى لكل وحده زي ما اتمنى لنفسي
وما انسى بالاخير اشكر صديقتي اللي ساعدتني بحياتي من بعد الله وهي محتاجه لدعائكم
الله يفرج لي ولكم

يلزم عليك تسجيل الدخول أولًا لكتابة تعليق.

تسجيل دخول

رافينا2010 • 13 سنة

صحيح كلامك
والدليل شوفي المطلقات في هذا المنتدى كيف يدعون يتزوجون مره ثانيه وهم اكيد ماتطلقو الا ان زواجهم كان فيه مشاكل ؟؟
بس استغرب ليه يتمنون الزواج مره ثانيه
اكــــــــــــيد عشان الطلاق مو حل وان لو كل وحده ماتقرر الا بعد شهر من الزعل كان انحلت كل الامور

(&عسسسسسسسسسوله&) • 13 سنة

الله يجزاك خير يااختي ,,وفعلا قل خيرا او اصمت

ليدي كووول • 13 سنة

كلامك صحيح وعين العقل وانا والله اذاقريت مشكله وحبيت انصحها انى اعيد وازيد فى الكتابه وارجع امسحها وادعيلها لان الحياه الزوجيه مشاكل واحنا قاعدين نسمع طرف واحد ولو سمعنا الاخر يمكن نشوف انه مظلوم وهيه غلطانه فلازم نتروى فى الرد وارجع واقولك مشكوره على الموضوع ومافى احد مرتاح خلق الانسان فى كبد

في دنيتي من اكون • 13 سنة

اقول ياءختي الله يسعدك وين مارحتي وتراء الكلام الاي قلتية عين العقل الله يفرج همك ويارب يارب ان زوجك مايشوف غيرك ويسخرة لك والله ياختي عجبني كلامك بقووووووة وتمني ان من كل قلبي لك السعادة والهناء تصبحين علي خيير

أميرة النحاس • 13 سنة

كلامك عين العقل ..

من زمان اتمنى القى واحده تكتب عن صبرها وكيفية تغلبها على المشاكل بس مافيه ... ما تدري الواحده ممكن بكلامها يتصلح بيوت وتكسب اجر عظيم وترفع معنويات اخرى وتشجعها على الصبر بحياتها ..اكل للي اشوف بهالقسم مشاكل في مشاكل ..

كلامك مررره حلو ,, والله محتاجين لمثل هالكلام ..
يعطيك الف عااااااااااافيه ..