اللي خايفة من الولادة تدخل

بسم اللـــــــه أبداا موضوعي
عسى الله يهون علي وعلى كل حامل بالولادة الميسرة والابن المعافى آمييييين
بقولكم قصتي مع الخوف من الولادة انشالله تعتبرون منها
انا بكرية وإلى الحين حامل بالأسبوع 27، كنت في بداية حملي فرحانة وما أفكر بالولادة كلللش، لكن مع تقدم الحمل قمت أقرا واااايد بالمنتديات قصص الولادة بداعي الفضول، وغيره وغيره من كلام البنات، كل وحدة تكتب قصة ولادتها وتهول شوي وتحط عليها بهارات شوي عشان تكون متناسقة، ممكن صج وممكن مبالغة... اللي حصل ان هالشي انعكس على نفسيتي من غير لا أحس، صار عندي رعب من شي اسمه ولادة، قمت أتحلم بالولادة طول الليل والله وأقعد فجأة من النوم وأحس قلبي بيوقف، وكل يوم يمر يضيق صدري زيادة لأني أدري ان ماكو مفر من الولادة، وقمت أفكر بطرق أهرب فيها من الآلام مثل ابرة الظهر أو الولادة القيصرية، وصار هالموضوع شغلي الشاغل ومكدر خاطري وماخذ بالي..
عااااااد في يوم كنت أسولف فيه مع زوجة خالي (الله يجزيييها كل خير ويوفقها دنيا وآخرة قولوو آمين)، المهم سولفت لها عن كل مخاوفي، وكل شي أقراه من قصص البنات أحسه بيصير فيني، يمكن يجيني نزيف.. يوقف نبض البيبي.. أولد ولادة مبكرة......وووو أعوووذ بالله من الوساوس اللي كانت ببالي، المهم أقنعتني بالتالي وانشالله تستفيدون لأني من يومها تغيرت نفسيتي واااايد، بالعكس صرت ناطرة اليوم اللي أولد فيه وأشوف ضناي وتقر عيني انشالله..
وهذي النصايح لوجه اللـــــــــه لكم، من مرت خالي وزدت عليها اللي استفدته من نفسي..
1- لا تقرأين قصة ولادة أي بنت، ولا حتى تسمعين من صديقاتج، كله بيأثر سلبي على نفسيتج وانتي أصلا مستحيل بتكون ولادتج مثل أي أحد بالضبط لأن كل ولادة غييييير عن الثانية والتساهيل من الله.
2-كوني على ثقـــة تـــــــــــــــااااامة بالله، ثقي ان ما راح يعطيج ألم فوق طاقتج وانه ما يكلف نفس إلا بما وسعها، والألم اللي بتحسينه بكون في حدود مقدرتج وطاقتج.
3-في خلال شهور حملج، فكري بالنونو اللي ياي، اختاري اسمه، روحي اشتري له ملابس وألعاب، جهزي غرفته، تخيليه معاج في البيت، انه بيملي حياتج، وفرحتكم انتي وزوجج، انسي الولادة لأنها ساعات معدودة بدال لا تفكرين بهالساعات فكري بالبيبي اللي بيغير حياتج ويحليها و بكون معاج العمر كله انشالله.
4-تفائلي بالخير دايماً وتذكري ان حالتج النفسية وااااااايد تأثر على مقدرتج في تحمل الألم، مجرد الخوف بيزيد الألم وايد، خليج هادية وادعي لنفسج وللبيبي في فترة الحمل ووقت الولادة لا يوقف لسانج عن الأدعية والقرآن وذكر الله والثقة التامة فيه.
5- احتسبي الأجر، كااافي انج بتصيرين أم والجنة تحت ريولج، وكل آلم في الولادة بتاخذين أجره اذا احتسبتيه، وأثناء كل طلقة رددي" اللهم اني لا أسألك رد القضاء ولكني أسألك اللطف فيه"، وفكري وتأكدي من الأجر مو بالألم والله يهوووووووون.
6- تذكري أن كل انسان تشوفينه بالدنيا أمه ولدته، ومن انخلقوا البشر وكل الحريم يولدون ببيوتهم لا بنج ولا شي، واحمدي ربج وتطمني انج بتولدين بمستشفى مجهز بعد ما تطور الطب وبمراقبة الأجهزة والدكاترة وأي مضاعفات تحصل أكو لها حل بإذن الله وناس تهتم فيج.
7- لا تفكرين قبل الولادة انج تولدين قيصرية خوفا من ألم الولادة إلا اذا حالتج الصحية محتاجة لها من كلام الدكتور، لأن الولادة الطبيعية من اسمها طبييييييعة وهي أفضل.
8- خليج مستعدة ومتهيأة للولادة في أي وقت، انا الحين توني داخلة السابع وجهزت كل شي، والله كافي الراحة النفسية اللي تحصلينها من الاستعداد، عشان لا سمح الله وولدتي أبكر تكونين جاهزة وبالج مرتاح.
وبشرح النقطة الأخيرة شوي، مثلا بالنسبة لاستعدادي، جهزت كل أغراض البيبي وأغراضي اللي أحتاجها فترة النفاس وحتى وديتهم بيت أهلي، وجنطة المستشفى زاهبة وعلمي زوجج مكانها عشان لا سمح الله في حال أي طارئ يكون هو بعد مستعد وما يتوهق ويتبهدل وما يدري شسوي، كتبي ورقة عطيها زوجج فيها الأغراض اللي تحتاجينها معاج في وقت الولادة، وحتى البطاقات الرسمية عشان أوراق المستشفى وقت الدخول، وفهميه في حالة أي طارئ شنو ممكن يسوي، حتى مكان عباتج وشيلتج قوليله عنه يمكن تكونين تعبانة بمرحلة ما تقدرين اتصرفين وقتها، أدري بتضحكون علي من كثر الاستعداد، بس والله اني حاسة براحة ان كل شي جاهز وحبيت أفيدكم.
هذي كل قصتي وآسفة عالإطالة وأتمنى من أي وحدة تقراها وتستفيد تدعيلي الله يسهل ولادتي ويرزقني الطفل المعافى يااا رب، وعسى الله يهون عني وعن كل حامل قولوو آميين