اللي زوجها نسونجي وحق حريم

صباح الخير
موضوعي شوي طويل فضفضه
مع ضيقه صدر ):
ماعندي غيركم استشيره لاني تعبت تعبت
تعرفون اذا حسيتو بشعور القهر والنار بصدرك
تعرفون اذا كان عندك عزيمه او عند اهلك فجاه
مالك خلق تروحين مالك خلق تاكلين مالك خلق
تمارسين حياتك بشكل زي كل الناس
تعرفون اذا صارت كل حياتكم بكى ومقارنات
انا كذا حياتي من سنتين
احيانا اسال نفسي ليه انا محرومه من كل شي؟
ليه ربي جالس يعاقبني؟
انا انحرمت من الدراسه بسبب مادخلت القسم
اللي ابيه ماتوفقت ودرست دبلوم تصميم
وكنت ناويه اكمل بكالوريس لاكن كان عمري ٢٧
واهلي قامو يحطمون يقولو بتكملي بعد سنتين ثانيه
وتتخرجي وعمرك كم ٣٢؟
غير كذا الاكمال البكالوريس ماكان عندنا بمنطقتنا
يعني لازم اقدم انتساب واجي للرياض او جده
فقلت بلاش وعارفه اهلي مو هامهم درست او لا
من هنا
تزوجت شخص ولو يرجع فيني الزمن لوراء
وربي اجلس عانس ولا اخذه اشين شي بالحياة
يكون زوجك نسونجي ومو ماليه عينيه
اشين شي بالحياة تتزوجي شخص ماتحسي
معاه بالحب وتحسي قلبه مع احد ثاني
مانكر انه هو احلى مني بكل شي
بالشكل بالتعليم بس مو معناته يشوف نفسه علي
ويحتقرني
تخيلو موقف صار لي كان يحب عطر
من شهر العسل وهو معاه هالعطر وكل ماخلص
يشتري مثله ولا يغيره ابداً
ولا شكيت ابد قلت ممكن يحب ريحته
بعد شوي بتجيكم سالفه العطر
غير كذا لاحظت بالتويتر يكتب شعر
وجنبه حرف A
الحرف هذا مادري ايش قصته
فجاه اكتشف انه اسم حبيبته !!
اول شي سالته قال شخصيه وهميه من قبل
اتزوج احب اكتب عنها!!
وانا ماخذه مقلب بنفسي مصدقه
وطنشت زمان هذا لاكن اكتشفت الحقيقه
تخيلو الموقف انك جالسه معاه فجاه يناظر
ممثله يقول هذولا الحريم وبكلام يجرح
لايكون على بالكم يمزح وبكل برود نرجع لسالفة العطر مره
شفت وانا انظف ذاكرة جوال بدرجه
فتحتها حصلت صور بنات لاكن من بين كل الصور
بنت كل صوره معها وواضح بينهم قصه عشق وحب
واللي جنني اكثر البنت جميله
واللي صدمني هي مهديته العطر ومصورها صارحته بكل صراحه وقلت له مين هاذي
قال هذا ماضي وربي ركزت بعيونه يابنات
شفت الضيقه والزعل بوجهه مو زعلان اني عرفت
واضح انه حن للبنت وبقوه وواضح انها هي اللي تاركته
طيب انا ايش ذنبي ليش يظلمني ويتزوجني
والله من شهر العسل كنت الاحظ بس اقول
الله يلعنك يابليس بتوسوس فيني
ومتاكده انه كان له علاقه حتى بعد زواجي منه
وتركته واضح السنتين هاذي لاحظت
بالتويتر يكتب اشعار غزل وحزن واشتياق
ياناس مو معبرني سويت اشياء ماتتخيلونها
عشان اعجبه حصلت ولا شي اعجبه
اصلا مايشوفني شي كل هذا لاني بنت عاديه
طيب ياكثر العاديات والشينات وربي رزقهم رجاجيل
يموتون بالارض اللي تمشي عليها
واكبر مثال قريبتي يابنات مافيها من الجمال نقطه
وياعمري ماتخلف جابت بنتين ووقفت الخلفه عنها
زوجها خاتم بيدها وربي كل اقاربي لافتتهم
علاقتها ويقولون كانها توها متزوجه وهي لها ١٤ سنه
يموت يموت فيها
يعني الحب مو بالشكل نهائي
انا مشكلتي تزوجت شخص نسونجي
شخص يحب الحريم
تزوجت شخص يعرف جمال البنت ويحلل
البنت الجميله من العاديه من الشينه
تزوجت شخص راعي علاقات قبل الزواج
وهو معترف قال من يوم عمري ١٥ بديت علاقات
لاكن واضح كل علاقته طقطقه ويشبع رجولته
ويحب يشوف الاعجاب من البنات
لاكن الحقيقه واللي تاكدت منها
قلبه مع اللي مهديته العطر
والله انه يموت فيها طيب ليه ماتزوجها
ليه ظلمني معاه
ليه الرجل السعودي يحب حبيبته ويعشقها
لاكن مستحيل يتزوجها ويدور اي وحده يتزوجها
بس اسم زوجه بس قلبه مع حبيبته؟
تعبت يابنات من البكي والقهر
تعبت من تحطيمه اذا تهاوشنا قال شايفه شكلك
او من زين وجهك تراك ماتجيبين راسي
وياكثر الكلام اللي قالي يجرح فيني يجرح فيني
لما خلاص جاني اكتئاب
المشكله فاتح سنابه عام ويصور نفسه يتميلح
والهمج بنات الشوارع يرسلون له مز تجنن
حتى بالتويتر حاط صورته ويكتوب له تحت
هذا انت يحلوك
مره ملفت وهو طبعا مايحتاج اقولكم
ايش يسوي
يضيفها خاص ىيبدا يتعرف عليها ويشوف شكلها
واكثر من مره اكشفه
لدرجه حتى العيال لي سنتين
مايبي!!
ولا اكل موانع ولا حاجه بس هو حريص
واذا قلت له قالت ماعندي استعداذ الحين
مسوليات بس عنذه استعداد للبنات والركض
وراء البنات
تكفون اللي مثل حالتي وش الحل لها
اهلي لاتقولون دخليهم بالموضوع
اهلي ماعتبرهم اهل ماعبروني وانا بنت
بيعبروني وانا متزوجه ولا صدقو اصلا اني اتزوج
بالذات امي كل شي ضدي كل شي
ياليت الانتحار حلال وربي ماتردد ثانيه
من عيشه هالقهر