اللي عندها حريم خوان تدخل

ابحكيلكم القصة من طقطق لسلام عليكم
احنا أربع حريم خوان (سلفات) أنا الكبيرة فيهم اذا جت عزيمه عند أهل زوجي اتحمل المسؤولية وكن العزيمة عزيمتي وتشوفوني أنواع الطبخات أنواع الحلى حتى لو مو عزيمة لو بسير عليهم يومين بالأسبوع ماأروح ويدي فاضية لازم أقل شي نوعين حلى والمعجنات أشكال وألوان وغير عشاي معي أصلحة بصواني لين بس يبقاله الفرن أكمله عندهم وهذا طبعي من يوم تزوجت وفي رمضان اليوم اللي بجي فيه لهم ماتصلح شي خالتي أبد وتقول لأني عارفة انك بتجيبينالمهم هاليومين اللي أجي فيهم فيهم يوم الإربعاء لازم نجتمع يالسلفات والحموات ( أخوات زوجي) وهم ثنتين
بتقولون وين المشكلة
المشكلة ان أم زوجي وخوات زوجي يعاملونا مثل بعض مع أن حريم الأخوان الثانيات يجون صافين يديهم في رمضان مثلا يجون قبل الأذان بس بعشر دقايق ولا معهم ولاشي وهم ماهم موظفات وأنا الموظفة الوحيدة:( والله اليوم اللي أروح لهم فيه اني ماأنام دوام وطبخ وصيام وتعب:09:
لا واللي يقهرني أكثر مايجيبون طاري اني مسوية هذا كله ولا يدعون لي قدام الحريم الثانيات لا بس لين جيت أبطلع لحقتني خالتي ودعت لي وبس..... بس بعد أشوفها اذا طلعت قبلي وحدة منهم تلحقها يمكن تقولها نفس الكلام :(مدري مدري انتم وش رايكم لاتقولون لاتجيبين لاني ماقدرأحسها مثل أمي وحرام تتعب اذا اجتمعنا أحاول أجيب اللي أقدر عليه
أبي وجهات نظركم اذا عندكم حريم أخوان وشلون تتعاملون معهم واكيد فيهم الحلوة والشينه فيهم الرفلا والجيدة وفيهم الذوق والوقحة يعني أكيد بيختلفون في كل شي وشلون تعاملكم معهم