اللي مو مستعدة تستقبل احد في بيتها تعتذر (ارائكم تهمني)- موقف سبب الموضوع

السلام عليكم
هلا والله يالغاليات ...
بدخل بالموضوع على طووووول ...
اليوم رحت العصر ازور وحدة سلفاتي من زمان عنهم عصريه بس يوم رحت تقولين مغصوبه على استقبالي على انا معطينهم خبر من امس لدرجه ان القهوة مازينت الا للرجال وجلست معي بدون لا ضيافه ولا شيء لين انتهوا الرجال متقهوين وترسل بنتها تجيبها لنا من عندهم صارت تنقل على فنجال ثم التمر والصنيه لحالها والترمس لحاله البنت ما تنلام صغيرة اللوم على امها اللي رابضه ولا تحركت مشيت الحركه قلت كيفها كلن واصله وانا عندها اتصلت عليها جارتها حول اذان المغرب قالت بسير عليك بعد المغرب والله يابنات ماتقولين هي للي قبل شوي نقزت للمطبخ وانا كلمت زوجي قلت نمشي ورفض اخوه الا نتعشا عنده وانا اسمعها تشتغل بالمطبخ وتطبخ لكن قلت ماراح اساعدها واستقبالها لي كان كذا والله يالغاليات مدري كيف امداها تسوي سفره كامله ماهنا نوع حلا ماسوته والمعجنات اشكال والوان ولو تشوفون استقبالها لجارتها تهلي فيها ومزح واللسان طلع عقب ماكان متخبي قبل ماتجي شيء ثاني ومن تعشينا ارسلت لزوجي نمشي بالعادة اقوله اصبر لين ترتب بيتها وتنظف مطبخها لكن عرفت معدنها
انا مازعلت عليها لكن شلت بخاطري ماطلبت منها تتكلف انا ماحب التكلف والرسميه للزيارات لكن اللي طلبته استقبال زين مو تقولين مغصوبه ويالله تتكلم مافيها شيء لااعتذر عن الزياره انهم مرتبطين مو تحرجني وتحرج نفسها والله اني استحييت اغلب الوقت ساكتين اشغلت عمري ببناتي ارحم لي واللي يزيد الطين بله اول ما اتصلت جارتها كل شوي تقولي انتبهي لبناتك لايحوسن البيت انتبهي لا يحوسن المجلس خير ان شاء الله انا ماعرفت اربي بناتي ..

وش رايكم بموقفها ؟!!!
ولا تقولون تمون علاقتي معها سطحية وكافتها خيري وشري