نفست برمضان مرتين و الحمد لله مو ذيك الصعوبة الي الناس حاسينها ،
مرة ولدت قبل رمضان بخمس ايام و افطرت الشهر كله و مرة ولدت فجر واحد و عشرين يعني افطرت تسع ايام من ناحية الزوار يقلون كثيييير لأن الناس ما عندها وقت ، أما الأكل اكل لوحدي و نظامي عادي فطور غدا و بعدين فطورهم يكون عشا لي و بيسهلها ربك سبحانه لا تشيلي هم الله يهون عليك

اختي بالنسبه لك عشان برمضان ياختي اد عندك اخت او احد يسوي لك مرق لحم وجريش تدخليه ثلاجه وتسخينه الظهر وكثري تمر معمول اد جعتي وتوست مع بيض مع كوب حليب خلي زوجك يجيبلك بالليل دجاج واكليه مع خبز حب مع كوب شاهي اعشاب  والله تتسهل دكرتني بنفسي بولادتي كنت شايله هم وربي تيسرت وربي جلست بعدها اضحك ع نفسي 3 شهور افكر وشايله هم موضوع بسيط 

بالنسبه لزوار تختلف حسب طبايع جماعتكم بس الاغلب ياجلوه لبعد رمضان او يجوك بعد التروايح مايطولوا

انا من اللي اكلت رمضان بولادتي الاولى اخر عشر ايام , وبولادتي الثانية افطرته كله من اوله لآخره .. :D

هو فيه اشياء ايجابيه واشياء سلبيه .

اولها انك ماتحسي انك برمضان ,, عايشه لحالك عن الناس حتى لو كنتي تسمعي القرائات والصلوات والتهجد الايام العشر ,, مافيه طعم مثل اللي تصومه بوقته ومع الناس .

والسهر لأن اغلب الناس فيه تسهر فماتنامي صح ويروح عليك النهار وانتي بالنوم او نوم متقطع جدا بسبب الصغير , ويروح النهار عليك وانتي ما استفدتي جدا في الاكل فيه ويصير اغلب اكلك بالليل وهذا صحيا مو مناسب خصوصا للنفاس وتحسي انك مرهقه خصوووووصا للي عندها اطفال قبل وتطرد وراهم وورا اكلهم .

مافي احد يساعدك مثل اللي بالأيام العاديه مثل ماقلت اغلب النهار نايمين او في المطبخ ويجهزو فطور واذا افطرو داخو من الاكل ويريحون قبل التراويح , ثم تجهيز السحور والوقت بسرعه يمشي وضيق قبل الامساك .. فيادوب تلاقي احد يساعد حتى لو موجود تلاقيه دايخ من الصيام .

وايام القضاء بعد رمضان ياسلام على الاجواء الرمضانيه لوحدك . :D

الميزة المريحه فيه ان زوارك قليل واذا جو مايطولو , واحتمال بسبب الانشغال وضيق الوقت يأجلو جيتهم لفترة .

عموما اللي استفدته سواء ولدتي برمضان او غيره كلها ايام وتنسى صدقيني ,, اهم شي هو صحتك وصحة الطفل وسوي اللي تقدري عليه لاتضغطي وتسوي شي اكبر من طاقتك .

الاكل ممكن يتركو لك شوربه او يطبخو لحم بالليل وتدفيه انتي بالنهار , او اذا لوحدك تسوي اشياء بسيطه واساسيه .. مو لازم هالمعجنات والمقالي والنقنقه اللي تسد النفس على الفاضي , الوجبه الرئيسية خليها بعد الافطار والعوده من صلاة المغرب .

وبالسحور تمر لبن مطبق فول او تسوي صينيه وترميها بالفرن وتاكلوها مع الخبز .. اي شي يمشي ولاتدققي مايتعب الا اللي يجلس يجتهد على توافه الامور .

الله يسهل عليك ويقومك بالسلامه .

ملاحظه : امي محذرتني انا وخواتي اننا ما نولد برمضان ابد ,, تقول خططو لحملكم واتركو هالشهر اتفرغ لعبادتي مو لكم . :D

انا ولدت في رمضان
اكثر شي معج فيه القضا لسا ما خلصت ايامي باقي لي يومين و بصراحه الصيام بغير
رمضان ثقيل بالنسبه لي

الناس ما يجون كثير وحنا عندنا نحدد يوم الاستقبال و الكل يجي فيه الى المقربين يجونك وقت ما يحبون
بس قليل مو مرا كثير

الشي الثاني الناس نايمه لانهم صايمين و انتي الحالك وقت الصباح امي ما تقصر بس كنت احلف
عليها ما تصحى وعندي خدامتي تسوي ليي حاجاتي

الله يعينك لو بتولدين في بيتك اخاف تبلشين بفطور زوجك و العيال انتي فرزني من قبل
ولو ما عندك خدامه جيبي اجار بالشهر ولو ما عندك بنت كبيره خلي وحده من اخواتك الصغار تجي تساعدك