اللي ولدت في المستشفى العسكري بالرياض قريب تنورني الله ينور لها دربها

حبيباتي اللي مجربات الولاده بالمستشفى العسكري (القوات المسلحه )بالرياض تكفون جابوا على اسألتي
وطمنوني الله يطمنكم لاني بصراحه اول مره راح ادخل المستشفى ولا اعرف عنه اي شي عيالي اللي
قبل جبتهم في خالد الجامعي لكنهم رفضوا يستقبلوني فلجأت للعسكري لانه ربي رحمني وفتحوا لي ملف
فيه وصار من حقي اراجع فيه
سؤالي ياحلوين
اول ماتجيك الولاده وين تروحين المستشفى الكبير مبنى 109 ولا فيه طواري

هل ممكن اذا جيتيهم عندك ولاده يقولون لك روحي للمستشفى الفلاني عندنا زحمه او مافي سرير
ولا يستقبلون من غير تحويل

ايش جنسية الممراضات في الولاده والقابلات فيه كمان وكيف اخلاقهم عموما

لمن تحين ساعة الولاده يحطونك بغرفه لحالك مع الممرضه والقابله ويتسكر عليك باب ولا في غرفه او جناح
كبير ويكون بينكم انتي وبقية الحريم ستائر

الطفل اول مايطلع يحطونه على صدرك لازم ولا يخيرونك او يطلبوا ترضعيه مباشره

كيف تكون الولاده عندهم تكوني على ظهرك ولا جالسه
ورجلينك يرفعوها على ستاند ولا يتركوها على السرير

هل يتركونك تمشي في ممرات القسم لين يفتح الرحم كويس ولا ممنوع تتحركي من السرير

هل يسمحون بدخول الاكلات الخاصه بالنفاس ولا ممنوع نهائي

طفلك يخلونه عندك ولا يأخذونه عندهم او يشيلونه وقت الزياره

زوجك يقدر يدخل معك قسم الولاده ولا ممنوع نهائي

كيف مستوى غرف التنويم ونظافتها وهل صحيح كل غرفه فيها سريرين بحمامها وكيف نظافة حماماتهم
طبعا سؤالي للغرف العاديه مو الخاصه

اغراض البيبي يوفروها مثل الحفاضات والحليب والملابس ولا توفري اغراضه انتي من ساعة استلامك له
واغراض الام مثل الفوط الله يكرمكم والماء والمطهر او الملح يوفروها ولا تجيبيها معك

كم يوم في المعتاد تجلس الوحده في المستشفى خاصه اذا امورها تمام

هل يطهروا (ختان) الاولاد بعد الولاده بيوم او اثنين ولا يعطو موعد تراجعيهم للطهاره


ادري ان اسألتي كثيره بالمره بس الله يعلم بالنار اللي في صدري احس اني مقدمه على مجهول
هذا وانا عارفه الولاده لكني للاسف جاهله تماما للمكان وهذا بتعب نفسيتي
تكفون جاوبوني على اسألتي وطمنوني الله يطمن قلوبكم بطاعته ويسهل امري وامركم