السلام عليكم ورحمة الله وبركاته
بمناسبة الصيف والسفريات والجمعات والمناسبات والناس الفرحانه عندي لكم موضوع حلو وجميل.........
الموضوع هذا يخص الحريم الحلوين المتزوجين اللي يحبون يسافرون مع أهاليهم.......
والصراحة ما ألومهم ياحلو السفرات مع أهلي فلة و وناسه وجمعة خوات........
بس عندي نصيحة لي ولكل وحده تحب تسافر مع أهلها:
علشان تصيرين خفيفه لطيفة على أهلك وما يتضايقون من روحتك معاهم ولو اني اظن مافي أهل يتضايقون من بناتهم لكن الحرص واجب اسمعي مني هذي الكلمات البسيطة:
1/ لاتكثرين عفش وشناط كثيرة وخاصة إذا كان أهلك كثيرين ماشاء الله وماعندهم سيارات تكفي فالأفضل ماتاخذين معاك إلا الضروريات وبس وحتى لو عندك أطفال صغار ويتوسخون كثير الحين الغسالات موجوده في كل الشقق الغالي والرخيص خذي الضروريات واغسلي بعدين.......وماله داعي تشيلين نص العاب العيال ودراجة فلان وعرايس فلانه لا تشيلين معاك ولا لعبه انتم رايحين تتمشون وتنبسطون وخلي العيال يشتاقون شوية لألعابهم لأنك بتكثرين عفش على أهلك وعيالك بيطشون العابهم في الشقه وفوضى وازعاج لأهلك وخاصة الألعاب اللي فيها أصوات واللي عندها عربيات ومشايات اطفال او كراسي سياره ماله داعي ابدا تاخذينها معك وخاصة اذا كانت السيارة ماتكفي وبعدين لو كانت السفرة طويلة يقعدون أهلك يشيلون ويحطون في شناطك وعفشك ماله داعي تتعبين أهلك خليك خفيفه.
2/ بعض الحريم الله يهديهم اذا راحت مع اهلها تقعد تتشرط خذوا شقه كبيرة وانا وعيالي نبغى غرفه لوحدنا والسرير هذا لي والمخدات هذي لعيالي وفي السيارة انواع الأزعاج هذا يبكي وهذا يبغى البقاله وهذا يبغى الحمام والا وقفوا ولدي وسخ والثاني استفرغ علينا قمة الأذى والإزعاج....... الصراحه أتوقع لو كان عندي عيال بهذي الطريقة ما اتوقع اروح مع اهلي اي مكان والله ما أحب أزعجهم ولا أثقل عليهم بأي شيء الوحده إذا كانوا عيالها مزعجين وكثيرين تقعد في بيتها والا تسافر مع زوجها عياله وبيتحملهم أما أهلك حرام تأذينهم حتى لو كانوا ساكتين أكيد يتضايقون بس مايبينون قدامك.....
3/ تعاوني مع أهلك وساعدي خواتك واشتغلي معهم ولو رحتوا كشته برى وطبختوا قومي معاهم واطبخي وساعدي على الأقل يكون لك دور في السفرة بعض الحريم الله يهديها تروح وكأنها ضيفة ماتشيل ولا تحط شيء وخواتها وأمها يسوون كل شيء وفي الشقة والا الفندق ماترتب ولا تنظف بس قاعده وعيالها صياح وإزعاج وفوضى وخواتها وأمها قايمين بكل شيء كذا غلط وأكبر غلط قومي ساعدي واهتمي بعيالك وهديهم واشغليهم اهلك يرجعون تعبانين من برى ومايلاقون الا ازعاج الصغار حرام فرحوك وأخذوك معاهم وتحملوك وهم ساكتين ريحيهم وسكتي عيالك وخلي لك دور في السفرة اذا صرتي متعاونه ماينسون جميلك ويصيرون يحبون سفرتك معاهم............
4/ خذي معاك مسكن حرارة وفيفادول وبندول ومسحات طبية ولزق جروح والأشياء اللي تحسين ممكن تحتاجينها لك ولعيالك لأنه مع السفر والروحه والجية وتغير الجو يمكن يمرضون عيالك وتأذين أهلك ولدي تعبان نبغى مستشفى والا رحوا جيبوا لنا علاج وخاصة إذا ماكان في العايلة أخ كبير ومافيه الا ابوك حرام هو راح يستانس ويونسكم والا يقعد رايح جاي على المستشفيات والصيدليات.......
5/ قبل لا تسافرين خذي من زوجك مصروف يكفيك ويكفي عيالك علشان إذا رحتوا أسواق أو ملاهي أو مخيمات ماتكلفين على أهلك بالمصروف حتى لو كان أهلك مقتدرين ماشاء الله وميسورين الحال انتي وعيالك مسؤلة من زوجك وهو اللي يتكفل بمصروفكم ويحمد ربه وكثر الله خير اهلك اللي اخذوكم وتمشيتوا وهو قاعد مرتاح......
6/ إذا جيتوا خارجين واقترحوا أهلك يروحون مكان روحي معاهم وين مايروحون لا تقعدين تتشرطين وتقولين لا نبي هنا ولا نبي هناك والعيال يبغون ينبسطون وهناك ما حلو وووووووو.......الخ
7/ اذا كان عندك اخوان ومتزوجين وراحوا معاكم خليك مع اهلك لاتروحين معاهم ولا ترسلين عيالك معاهم مو زين تضايقين مرة أخوك وتزعجينها يمكن تبغى تاخذ راحتها مع زوجها واللي عندها عيال يكفونها عيالها ماله داعي تزيدين بعيالك فخليك مع اهلك بيتحملون اكثر من اخوك وزوجته وحتى لو اخوك طيب ويحبك ويحب عيالك لا تضايقين زوجة اخوك لأنك لو مكانها اكيد بيكون تفكيرك نفس الشيء. .......
هذا اللي عندي الحين ولو افتكرت شيء ثاني بجي اقولكم واللي عندها إضافة أو تعليق حياها الله.
على فكرة انا متزوجة واحب اسافر مع اهلي كثير بس ماعندي اطفال علشان كذا احس اني خفيفه عليهم ولكن مو معناها اني اروح معاهم ضيفه بالعكس اقوم بواجبي واخدمهم اكثر من انفسهم........
&&&&& تمنياتي للجميع بإجازة سعيده وسفرا موفقا &&&&&&&&&&
BSMAH90 @bsmah90
محررة ماسية
يلزم عليك تسجيل الدخول أولًا لكتابة تعليق.
فلووورا
•
وااااااااااااو نصـــــــــــيحهـ مــــــــرهـ حلــــــــوووهـ يعطيـــكـ العــــــــافيهـ
الصفحة الأخيرة