ربي يرزق الجميع من واسع فضله

الله يوفقك ويرزقك الذرية الصالحة يارب

اصبري علي وبكتب تجربتي لك هنا ..

امم انا بالعكس كتبت تجربتي كم مره بالمنتدى او الانستغرام ..
ثاني سنة زواج سويت صبغه وكنت سليمه وسوينا تلقيح صناعي الي بالعياده ومانجحت مع ان زوجي كان العدد ممتاز والحركه بالستين وارتفعت بالمختبر
جلسنا سنين وسنين تنشيط وتفجير وجدول جماع .. حصل بعدها برود وتركنا الدكاتره
بعد سبع سنوات زواج كأنه احد صحصحنا وقال لين متى هاالبرود ! رجعنا للتلقيح انا فيني ضعف تبويض وتكيسات ومستمره عالجلوكوفاج وتعبت طول السنين بس الحمدلله يحصل تجاوب بالعلاج وتطلع بويضه بويضتين بس الدكتور كان يقهر اغلب العيوب بالزوجه يحطها انه من البطانه انه من جدار البويضه
نتيجة زوجي نزلت العدد كان عشرين والحركه عشرين
لجأت لربي يوم حسيت انه زوجي ينضغط والي يقول روح دور عروس وتخبيب وكيد وكنت ادعي من قلبب
اخذت كورس ابر ميرونال اتوقع مع كلوميد
كنت اقرا البقره يوميا * اتصدق يوميا* اقوم الليل وابكي من قلب على تعبي وصبري والكيد والتخبيب الي يجري بظهري وانا مالي ذنب وانه يارب اثبت لزوجي انه انا احمل واجيب عيال
سبحان الله نججحت لكن الحمدلله ع كل حال اجهضت بالرابع مع اني كنت عامله ربط وكلفتنا خساير ماديه ونفسيه .. مع انه ماعلمنا احد عن حملي لكن وحده تطلع اشاعات وتسال عني وبعدها صدمتنا سياره باول شهر كنا فرحانين طالعين مطعم نتعشا بالمناسبه فجاه سياره صدمتنا وتحركت من مكاني والضربه جات قويه على ظهري .. عالطواري نزيف وطول الاشهر نزف لين ماربطت وزاد الوضع وجا طلق ونزل الله يعوضني فيه

بعدها بااربع شهور حاولت ابدأ واتوكل على الله وانسى كل شي راح وتفائلت
ورجعت انشط وابدا عمليه .. صح صار حمل لكن انتفخت والمويات ملت جسمي ونوموني بالعنايه المركزه عشر ايام جات اكياس كبار عالمبايض قالو يااستئصال يا ربي يهونها اصبري كنت يوه والله ماكني عايشه شبه دايخه والدنيا تدور بي والاجهزه على صدري وجسمي منفوخ كله اعطوني مغذيات وتبرعات دم وقالو الحمل لازم ينزل يخفف المشكله
والحمدلله طلع كيس فاضي وسويت كم تحليل هرموني كان ينقص لين حولوني للعنايه المتوسطه واعطوني طلوق صناعيه وتنظيف وطلعت للبيت
منعو المجهود والجماع والحركه علشان الاكياس لاتنفجر .. ثلاث شهور راحه بعدها حبوب منع الحمل سبع شهور لين الحمدلله راحت الاكياس
ويااختي جربت بعدها طبيعي ميراميه وجا كيس وبرضو رجعت للمانع شهر
كملت سنه ونص ع اخر اجهاض
وقبل شهرين بدينا بمركز متخصص تلقيح صناعي كنت متفائله جدا زوجي تحاليله صارت ممتازه ماشاء الله لانه دخل نادي وانا الحمدلله استجبت للمنشط كان خفيف تحسبا انه ترجع لي الحاله .. للاسف فشلت العمليه بالرغم انه النتايج كانت ممتازه 💔
كملت تسع سنوات واحس حملي كان حلم ووراح
دعواتكم لي انه تنجح معاي مره ثانيه
لانه الحقن غالي والله ولا اضمن نجاحه من فشله
تعبانين مره ومضغوطين انا وزوجي وهالموضوع موترنا ونفسيتنا متأرجحه ماديا وومعنويا
حبيت افيدكم حتى باالانستغرام انصحهم يحترسون من المنشطات خاصه الي مو محتاجه لاتضر نفسها ! والله لو ما حنا بحاجتها بعد الله كان مادورناها 😔
ادعولي بتوم سليمين من زوجي ذا وان الله يبعد عني الاشاعات وكلام الناس وانه ويتمم لي هالموضوع واخلص ع خير ياررب