اختي بالنسبة لتساقط الشعر وتضرره .حتى انا كنت تنعاني منهم ولكن عمرني عملت الكيراتين والاصباغ .بل بسبب الحمل والولادة وحبوب منع الحمل والتوثر .تضرر ليا لدرجة وليت غير تنلمسو بالمشطة تتطيح ليا خصل كبيرة والشعرة ولات رقيقة وضعيفة بزاف .قررت ندير ليه حملة علاج في البيت والحمد لله جابت نتيجة
اول حاجة تندير ماسكات تغديه 2مرات في الاسبوع :تناخد بيضة زائد موزة بقشورها زائد نصف كاس زيت زيتون وتنطحنهم في مولينكس جيدا.ثم تندير في شعري جيدا متنخلي حتى مكان ونغطي شعري ببلاستيكة ونقوم بأشغال البيت وملي نكمل ندخل نغسل شعري .وابتعدت طيلة مدة العلاج على الشومبوان فقط تندير:
الغاسول المغربي او الطين الطبيعي .والماء اللي تنزيد عليه تنكون مغلياه وحاطة فيه الورد البلدي والازير والزعتر تنخليهم مدة .حتى تيبرد الما وتنصفيه ونزيدو على الغاسول .وتنستعملو كشامبوان طبيعي .باش الشعر والجلدة يتصفاو من المواد الكيماوية.الى مقدرتيش عليه او غير موجود ديري شي شومبوان ديال الاطفال.
وباش تحيد الحكة من الجلدة ديال الشعر والقشرة كنت تنشد الثومة ونقيها ونصلقها في الما مثلا شي 3او 4 فروع الثومة حلى حسب شعرك .وتنطحنها في ماها ميكونش بزاف ونضيف ليها ماء الورد والقرفة مطحونة وندير هاد الخليط في شعري والجلدة ايضا ونخليها شي ساعة ونغسل .
هاد الوصفة رائعة بكل المقاييس اللي فيها الحكة ديال الراس وفيها القشرة .الشعرة تتقصاح والجلدة تتولي تشعل متتبقايش تحكي .
واشياء اكتاشفتها ان الشعر ضروري :
يتمشط يوميا باش الدورة الدموية تبقى توصل للشعيرات لانني كنت تنخاف نمشطو ويزيد يطيح .بالعكس بالمشطة راتنقومو بتدليك لجلدة الراس .
الشعر ضروري خاصو يتدهن باش ميبقاش جاف وبالتالي الشعرة تتهرس .
اننا ضروري نغديوالشعر :تاهو خاصو يتغدى كفاش غيكون تيلمع وقوي ويطوال وحنا مفرطين فيه بلا تغدية .
احسن الزيوت اللي جربت لحد الان وكان رائع بكل المقاييس :
زيت الاركان الاصلي لما جربتو ندمت انني مكنتش تنديرو رغم انني تنتوفر عليه دائما .هو اللي تندير مدة هادي ولقيت عليه الراحة .
كاين وصفات بزاف للشعر اختاري اللي تريحك وتفيدك انا هادو كانو مفيدين ليا بزاف .الحمد لله شعري رجع للمجد ديالو .ان شاء الله حتى نتي والبنات كاملات.
الصفحة الأخيرة
وأيضا دابر املا معالج للشعر
كذلك زيت ترشوب حلو وانصح به لانه يطري الشعر ومايضايق وقت تدهني به الشعر والفروه
الله يسهل لك امورك