السلام عليكم ورحمة الله وبركاته 
كيف حالكم حبيباتي ان شاءالله تمام
انا درت امبطن وطلع يهبل على كيف كيفكم
قلت خلي نذوقكم منه
ونعطيكم الطريقة يافالحات باش تديروه
الطريقة كالاتي
ناخدو بطاطا نقشروها وبعدين نقطعوها شرائح بيضاوية والا دائرية بسمك 1/2 سم تقريباً
تفتح الشرائح بالسكين زي الساندويش
ونحطوها على جنب لين نحظرو الحشوة
الحشوة عبارة عن لحم مفروم وبصل مفروم ناعم وشوية معدنوس مفروم ناعم
وفص ثوم مفروم ناعم
وفلفل احمر بودرة وفلفل اسود وملح وبزار وشوية طماطم معجون وحبق يابس مرحي
وبيضة وملعقة خبز مدقوق والا طحين
تعجن المكونات وتحشى داخل شرائح البطاطا
تبطن شرائح البطاطا المحشوة بالدقيق وتغمس بالبيض المضروب وتقلى بالزيت الحار
وصحتين وعافية
كولو وادعولي
