جـــداويـــــــــة :

السلام عليكم و رحمة الله و بركاته .. أختي غفران الغامدي .. تسلمي يا قمر :) .. بس أنا لسة ما خدمتك ولا سويت لك شي :) .. و نفسي أخدمك أكتر إذا عندك أي شي تبغيه .. بس أؤمري .. يا ستي .. الدبش هو أغراض العروسة و ملابسها و مكياجاتها .. و الحاجات إللي أشترتها للزواج .. يعني تجهيزاتها .. يعني من الآخر العفش حقها :) .. عشان إحنا عوايدنا لازم الدبش يكون شي وجاهة .. عشان يودوه بيت العروسة يوم الدبش ( قبل الفرح بكم يوم ) .. ما يروح في شنط و كراتين و زي كدة .. لازم يروح بطريقة معينة .. و ترتيب معين .. و زي ما فهمتك الحرمة هادي ما تخيط .. و كتبتها قبل كدة .. هي تحب التطريز و الحاجات هادي .. يعني الأشياء الخفيفة .. و هي هاوية و تسلي نفسها .. يعني مثلا تطرز مخدات .. مفارش .. خداديات .. شراشف .. حاجات حقت البيت .. و في بيتها و لأقاربها و بناتها و زي كدة .. و أنا زي ما كتبت أول .. أنا جبت القطعة حقت الصدر جاهزة من لبنان و أتورطت فيها لأنها غالية وما أقدر أتصرف فيها .. و لا لها قطعة تكملها هنا :( !! فروحت و أشتريت الأقمشة الباقية للفستان من هنا ( سادة ) .. و أنا وريتها التصميم إللي في بالي للفستان .. و على أساسه هي طرزت لي أجزاء من القطع السادة تطريز خفيف يشبه تطريز القطعة الجاهزة إللي من لبنان >> فيلم هندي :23: .. و بعدين جابت خياطين ( حقون المشغـل و أنا ما أعرفهم بس هي قالتلي ) و خلتهم يخيطوالفستان عندها و أشرفت عليه وكانت تسوي لي بروفات .. بس هي نفسها ما تخيط بنفسها .. فـــهـــمــــتـــــي ؟؟ فإتني لو تبغي فستان سهرة .. أكيد حتشتري قطعة مطرزة .. صح ولا لا ؟؟ يعني بس يلزمك الخياطة ؟؟ ولا فيه شي معين في بالك ؟؟ بس برضو فيه مشاغل كتيرة في جدة .. معقولة ما لقيتي أحد ناسبك ؟؟ طيب شوفتي إللي في الأمير سلطان ؟؟ أنا عندي أقمشة كتيرة ماني عارفة أيش أسوي فيها .. عجبتني و أشتريتها وماني لاقية لها موديلات :( .. و فكرت إني أروح للمشاغل إللي في الأمير سلطان .. و أجرب خياطتهم .. أسوي عند كل وحدة فستان أو طقم .. أو توب أو من الجلابيات الناعمة .. ( لأن الأقمشة ماهي غالية .. مشجرات عادية و شيفونات ) .. قلت أسويها فساتين بيت و إستقبال أو خرجات عادية .. ومنها أجرب خياطتهم و أشوف أخلاقهم .. لأنه أنا بصراحة مهما كانت فخامة المحل .. ما يهمني إلا أخلاق الموظفات أو صاحبة المحل !! لو كان أسلوبهم مو حلو معايا .. أشيل قماشي و أطلع .. و لا عاد أرجع لهم !! وكمان برضو يهمني السعر :23: .. لأن اليومين دي فيه حالة قحط .. الله لا يزنق مسلم :) .. الله يفرّج علينا يارب .. و لو تبغي أسأل لك كمان صاحباتي على مشاغل .. لأني أنا بنفسي بأسالهم عشان أبغا أخيط فستانين سواريه .. بس إنتي كيف ميزانيتك ؟؟ تبغي شي نص و نص ولا رخيص ولا عادي الغالي ؟؟ إلا أبغا أسألك .. ما تعرفيلي فين قاعة ريهام دي :30: ؟؟ تحياتي .. جــــــــداويــــــــــــة ..

السلام عليكم و رحمة الله و بركاته .. أختي غفران الغامدي .. تسلمي يا قمر :) .. بس أنا لسة ما...