اهلا وسهلا ببنات جده الغاليات
عندى لكم واحد يسوى زفات وقصائد حق العروسين واسعاره مررره حلوه بالنسبه لغيره
يسوى لكم قصائد خاصه ينظمها اهوا وباسم العروسين وتكون ماتطلع لاحد قبلكم ولا بعدكم
من جد مبدع وفنااان في الزفات والقصائد ويسوى اشياء كثير من مسيرات تخرج وسابع
قريبتى سوت عنده سابع صراحه شى خيالى ابداع ماله مثيل
اللى تبى تتميز في زفتها ودخلاتها تراسلنى اعطيها الرقم واتمنى لها التوفيق والسعاده

اهلين بناااات
بصراااااااااااحه استفدت كثير من الموضوع مع اني متزوجه

انا ابي ارد على جداويه بالنسبه للاغراض اللي كتبتيها حلوه

لكن انا ابي اقولك على محل في الكورنيش للسجاجيد ولحاف السرير شئ فخم وراااااااقي انا

اخذت منه طقم للسرير عباره عن 2شرشف ولحاف و2 غطاء مخده و2 خداديه ب2400

انا عارفه راح تقولي غالي بس لو تشوفيه والله تقولي مفرش ملكه مرررررره فخم

واخذت من عندهم طقم مناشف مره فخم ايطالي لي ولزوجي يجي فيه 2 مناشف وسط
و2 مناشف صغيره و2 روب و2 سليبرز ب350 ريال

فيه طبعا اطقم مختلفه والاسعار مختلفه على حسب اللي تبغيه

وعندهم مفارش للطاولات واطقم للحمام واطقم اكسسوارات للحمام مره فخم غير السجادات

المحل في الدور الثاني من مركز الكورنيش اسمهA&Z

اما بالنسبه للكورنيش ترى ماانصحك تشترين من عندهم بالنسبه للعطور .......هو صحيح تجي

نفس ريحة العطر لكن ماتطول يعني بالكثير ربع ساعه ورااااحت الريحه وانا مجربته في

عطور كثيره واحيانا تقلب الريحه اما المكياج فخذي من عندهم كل شئ الا كريم الاساس

والبودره بصراحه فاشله انا اخذ من ديور من قزاز ولما اخذت من عندهم بصراحه مو حلو

واحس الوجه صار مدهن مو حلو بالمره

وبالنسبه للعطور الشرقيه انا زيك احب العود الخشب والدهن وتراه مع العطور يعطي فخامه

ويدووووووخ وعندك عند عبد الصمد القرشي مسك العروس لايفوتك ماقد نصحت احد فيه الا

وجاء يدعي لي بعد ماتتروشين حطي منه خلف الاذن وعلى جسمك وبعدين اتبخري بالعوده

وشوفي الريحه كيف........على فكره في العطور مو لازم اللي يعجبك يعجبك غيرك

يعني انا اختي زي سلافه تحب المخلطات وتكره العوده عكسي .............يعني شوفي اللي

يعجبك وسويه

صحيح فيه وحده من البنات ذكرت انو في محل يبيع ماركات بس باسعار رخيصه الظاهر اسمها

اميره هنا في المحل اذا تعرفين اسم المحل اعطيني اسمه ياعيوني


ععلى فكره ياعيوني ترى مو زين تدعي على انسان مسلم مهما كان اللي سواه فيكي

انا اذكر فيه شيخ قال انو من الافضل ان تقولين حسبي الله ونعم الوكيل وكذا انتي كأنك وكلتي

الله محاميا يأخذلك حقك منهم

فيا عيوني قولي حسبي الله ونعم الوكيل واللهم اكفينهم بما شئت

برايفت لسلافه.......ايش رائيك في ماركة كريولان وايش اخذتي منهم وكيف اسعارهم وكيف

كريم الاساس تغطيته حلوه والا لا؟وفورايفر في اي محل في الكورنيش ؟

السلام عليكم و رحمة الله و بركاته ..

>>>> نكمل كلامنا مع سلافة ..

أول شي الله يسلمك يارب ..
الشر ما يجيكي :) ..


تعالي هنا يا بنت ..
تبغي تتخني و ماتبغي تاكلي !!
طيب من فين حتتخني ؟؟
من الهوا إللي بيمر جنبك :23: ..

تعالي عندي أنا أعطيكي الكم كيلو الزايدين
إللي عندي !!

نكمل كلامنا ..

أنا قلت لك الأشياء المستعملة ماهي ملابس ..
سيشوار و فير و مكر كهرباء و مملس الشعر
و مكينة البراون .. و مكر عادي إللي شوية مرن
زي المواسير كدة طويل و منه أحجام ..
أشتريته و جربته مرة و جالس زي ماهو ما أستعملته بعدها ..
يعني حاجات مو باين فيها لا جديد ولا قديم ..
و كل إللي لازم أسويه إني أمسكها و أمسحها
و ألمعها و أنظفها و تسير كأنها جديدة ..
و أجمعها كلها و أحطها في كرتون من الكراتين
الجاهزة المزينة .. و لمن يروح الدبش أفهمهم إنهم
ما يفتحوها ولا يحطوها في مكان و يخلوها زي ماهي كأنها هدية !!
و بعدين أنا لمن أروح بيتي إن شاء الله أفكها بمعرفتي ..
و قيدني في بيتي و محد داري عني أيش سويت
و أيش فكيت و كان جديد ولا قديم !!

و بالنسبة للأشياء التانية إللي هي الإسبراي
و الجل و الموس و دي الحاجات قلت أروح أشتريها
من أي مكان سواء قزاز أو نزيه أو حتى من الصيدلية يبيعو فيها كل شي !!

و برضو أدوات النظافة زي ما قلتي قصاصات و مبارد
و مزيلات ومقص و دي الحاجات كلها من نفس المحل ..
أو من البودي شوب ..
أو أظن قزاز يبيعها كلها بالطقم .. يعني تجي كلها في شنطة وحدة ..
أحلى و أرتب .. بس أشوف سعرها أول ..
إذا ناسبني .. أشتريت ..
و إذا ما ناسبني .. أروح أشتري من الصيدلية ..
فيها ستاند كامل كله قصاصات و مقصات و مبارد
و أدوات الأظافر عموما بين يد و رجل ..
و بعدين برضو أفكفكها من علبها و أرصها في علبة صغيرة ..
>>>> ما عندها غير العلب :23: !!


وبالنسبة لسيتي بلازا هادا صاحبي :) !!
و أنا أحبه و أغلب ملابسي منه ..
بالذات السبورات و ملابس البيت ..
لأنه بصراحة شي سعره طيب و خامته طيبة ..
و شي غسيل و لبس على قولتهم ..
بس إللي يقهرني عندهم قسم البجايم !!
تلاقي بجايم تجنن و حلوة و أغلبها تلاتة قطع ..
و تلاقي البنطلون لحاله و البلوزة الداخلية لحالها
و القميص لحاله !!
و تجي تحسبيها تلاقي البيجاما و صلت لفوق
الـ 200 – 300 ريال !!
يعني بدون مبالغة أحيانا تلاقي سعر البجايم أغلى
من سعر الملابس العادية !!

بس اللحف عندهم ما حطيتها في بالي !!
يبغالي أرجع أروح و أشوفها !!

و بالنسبة للصحون ..
ترى من عوايد بعض الناس إنهم يشترو لبنتهم
طقم صيني فخم ( أبو قطع كتيرة ) .. و يودوه لها
مع الدبش .. و يرصوه في الدولاب حق الصيني ..
بس ما أدري إذا هادا شي إجباري أو إختياري ..
بس شوفتها قبل كدة و سمعتها من ناس أعرفهم ..

و ترى أطقم الصحون حقت هوم بلازا تجنن ..
أنا عجبتني .. و الحلو فيها أسعارها متفاوتة
بين الرخيص و الوسط و الغالي ..
و عددها فيه القليل و فيه الكتير ..
و نقشاتها أغلبها ملونة و تحسيها شبابية :) ..
يعني مو زي باقي المحلات تشتري الطقم فيه قطع بالميات !!

أنا عن نفسي إن شاء الله حآخد معايا أكوابي :23: ..
( تحويشة سنين من الأكواب :23: ) ..
>>>> عندها عقدة أكواب !!
و قيدني قلت له و أعطيته خبر ..
عشان لمن يشوفوها يوم الدبش لا يفتحو فمهم ولا يتكلمو
ولا يقولو أيش هادا ؟؟ و جابت أشياء مستعملة !!
و يقعدو يهرجو هرج ماله داعي ..
لأنها دي أكوابي أنا الخاصة ..
ماهي للضيوف ولا لأي أحد تاني !!
و بصراحة ماهي رخيصة و حتى لو رخيصة أغلبها لها ذكريات
و من بلاد مختلفة ولا عندي إستعداد أرميها !!


>>>> تابعي :) ..


تحياتي ..
جــــــــداويــــــــــــة

السلام عليكم و رحمة الله و بركاته ..

بالنسبة للمهر ..
على قولك خليها على الله ..
الله يبارك لنا فيه و يساعدنا و يسخر لنا
إللي نبغاه و أحسن منه ..

و بالنسبة للذهب .. ماهو في بالي !!
يعني إحنا مو من عوايدنا لازم نشتري الذهب
الكتير و الحاجات دي ..
و المفروض عندنا إنها تجي هدايا من أهل العروسة ..
أخوانها و خيلانها و عمانها و كل العيلة حريم و رجال ..
و أنا طبعا محد من أهلي حيجيب لي شي ..
لأنهم أصلا كارهينني كره العمى ..
و أنا ماني مستنية منهم إنهم يجيبو لي !!
و حتى لو جابولي أنا حأرجعها لهم و أرميها في وجههم ..
و قيدني عاهدت نفسي و حلفت على دا الشي ..
خصوصا من ناس معينين ..

و غالبا دي عوايد البدو .. و بالذات أهل الجنوب ..
لازم يشترو حزام و درع و رشرش و بناجر
و سلاسل و كفوف و خواتم و كل إللي في محلات الذهب :23: ..
و حتى أظن إنهم لمن يدفعو المهر .. يحطو فلوس للمهر
و فلوس للذهب ( على حد علمي ) ..

و أنا قلت بعدين ( إذا ) زادت معايا فلوس أروح أشتري طقم ناعم ..
أو كم خاتم و أساور و سلاسل من الناعمة ..
لأني أصلا ما أحب العفاشة و الشي التقيل ..

لكن دحين ماعندي إمكانية إني أصرف المهر كله على ذهب !!
>>>> إللي يسمع يقول المهر مية ألف !!
الحمدلله ياااااربي ..

و بعدين أنا مافي أحد يساعدني و يعطيني إللي ناقصني :06: ..
زي ما بأسمع إنه الناس أخوانهم و أخواتهم بيسوو لهم كل شي ..
و أنا إللي عندي زي قلتهم .. ولا أبغا منهم شي أصلا :( ..
وماني موظفة و لا عندي راتب ..
عشان كدة بأقولك بأحاول أزبط أموري على قد الفلوس
إللي عندي ..


و بالنسبة للصناديق إللي قلتي عليها و الله أنا ما أعرفها ..
بس عشان لا توقعي في الحرام والربا ..
أسألي و أتأكدي و خدي فتاوى و شوفي البنك
إللي حتحطي فيه فلوسك أصلا أيش و ضعه ..
و الله يبارك لك :) ..


تحياتي ..
جــــــــداويــــــــــــة

السلام عليكم و رحمة الله و بركاته ..

بالنسبة لأشياء الدبش ..

أيش فيه أفكار جديدة الأيام هادي ؟؟

و بالنسبة لطقم التسريحة من أيش مكون ؟؟
أنا أبغا أشتري علب أو سبتات لكل شي ..
يعني مثلا علبة للأرواج .. و علبة للمناكيرات ..
و علبة للأقلام .. و زي كدة ..
عشان تكون مرتبة و تنحط زي ماهي ..

و بالنسبة للمناشف أنا إللي أشتريها ولا هو ؟؟
أنا أشتريت روبين مع بعض .. بس مو إللي تكون
طقم كبير مع مناشف وحاجات .. بس أرواب لحالها ..
لأنه الطقوم الكبيرة ما عجبتني ..
و المناشف لسة ما أشتريتها ..
عجبني في محل طقم مناشف عبارة عن تلاتة مناشف ..
منشفة كبيرة و وسط و صغيرة ..
و كدة في أطرافها فيه كلفة و شوية شغل .. يعني شكلها فخمة ..
فكرت آخد منها إتنين .. واحد ليا و واحد له ..
يسير كدة ؟؟
و إذا المفروض أنا إللي أشتريها .. كم منشفة أشتري ؟؟
بالطقم ولا بالحبة ؟؟

و بالنسبة للعلاقات حقت الملابس ..
أنا أشتريت من الباشاوات علاقات ملبسة ..
صح هي شكلها مو مرة فخمة و مرتبة ..
بس برضو أحسن من العلاقات العادية ..
و أشتريت من إيكيا العلاقات البلاستيك حقت
البنطلونات و البلايز و دي الحاجات ..
بس ماني فاكرة بكم ..

وكمان في الدانوب مليان علاقات زي كدة ..
و ملونة .. و حتى أفتكر إنها رخيصة ..
حتى فكرت لو نقصت عليا أروح أشتري منه و خلاص ..

و فين محل مهجة دا ؟؟
سمعت بيه قبل كدة من وحدة أظن إنها قالت
إنه زي يا بلاش .. بس ما سألتها فينه ..
و كيف العلاقات إللي عنده ؟؟
مرتبة و حلوة ولا لا ؟؟

و الشموع دي كمان أنا لازم أشتريها ؟؟
ما يقولو مصقوعة و مرجوجة و ماصدقت :23: !!
( يعني قصدي مو عيب إني أنا أشتريها ؟؟ ) ..
أنا تعجبني الشموع حقت إيكيا و سيتي بلازا ..
و فيه كمان المحلات إللي تبيع الشموع المعطرة ..
برضها حلوة ..
بس وجعععع تلاقي الشمعة الواحدة بحوالي 100 ريال !!
المهم حطيتها في بالي .. و أشوف يبغالي أشتري إذا لقيت قدامي
و أنا في مشاويري ..

و الورود إللي في سيتي بلازا قصدك الورود حقت الديكورات
و المزهريات و دي الحاجات ؟؟
و لا أيت ورود ؟؟


تحياتي ..
جــــــــداويــــــــــــة