جـــداويـــــــــة :

السلام عليكم و رحمة الله و بركاته .. أختي حبةاللؤلؤ .. يعني بالله ما قريتي أنا كمان أيش كاتبة عن حماتي ؟؟ كلنا في الهوا سوا يا بنتي :09: .. مشي حالك .. و إنتي لا تتكلمي معاها .. إنتي أتكلمي مع زوجك بنفسه .. و دحلسيه .. و تعاليله بالهداوة و الذوق .. و قوليله خلينا نروح نشوف القاعة سوا .. يعني عارفة تعاليله من باب إنكم تختارو المكان إللي حتتزوجو فيه سوا .. و حاجات زي كدة .. و خليه هو يوقفها شوية اليومين هادي .. زي ماقلت لك تصبيرة ألين يخلص الحج و مكة تفضى شوية .. الحج يوم السبت إن شاء الله حيكون قيده خلص !! و يسير أنزلي إنتي و أهلك و روحو لفلفو معاهم عالقاعات .. و إنتي أتحاشي الكلام معاها بالمرة .. خلي كلامك معاه هو .. عشان على قولك لا تقول لي كاني ولا ماني !! و البنت قالتلي و البنت سوتلي !! و ترى ( غالبا ) الولد ياخد صف أمه !! و من حقه لأنها أمه و غصبا عنه حيصدقها .. عشان كدة خليكي معاها مؤدبة و رايقة .. و لمن تتكلمي معاه لا تقوليله أمك أمك أمك .. قوليله ماما أو أي شي إنتي تناديها بيه :) .. و خليه شي لطيف .. يعني لا تقول عمتي و لا حماتي !! أحسها تقيلة شوية !! يا بنتي أنا مرة قلت كلمة بحسن نية .. و لا قصدت بيها شي !! تعرفي أيش قلت ؟؟ قال لي مافي سـفـر ( شهر عسل ) .. سكتت و قلت طيب :06: .. إلا شوية قال خلاص نتزوج في الحج .. قلت له أنا لسة ما خلصت حاجاتي .. و ماعندي إستعداد أتزوج في الحج و أنحبس في بيتي .. خليها بعد الحج إن شاء الله على خير .. هو دا إللي أنا قلته !! راحت رمت السماعة في وجهه .. و جلست تبربر قدامه هو و أبوه و أهله كانو جالسين !! و أنا سامعة الكلام !! حتى هو صرفني و قفل السماعة !! أنا ما قصدت شي .. 1 - أنا إللي قصدته إني عارفة طبع زوجي .. و جدة بعد الحج تسير كلها زحمة و حجاج .. و إللي ما يروحو المدينة .. ينزلو من مكة على جدة .. و البلد تسير زيطة .. و أنا زوجي ما يحب الزحمة .. و بالذات الخرج العائلي في أوقات الزحمة .. تلاقيه يتنرفز و يتعفرت و الشياطين يركبوه !! يعني بالله أتزوج و أنحبس في البيت ؟؟ يعني حتى عند أهلي يمكن ما راح يوديني و حيقول الشوارع زحمة !! و لا نخرج و نتضارب و نرجع ؟؟ يسير شهر بصل مو شهر عسل !! 2- لسة ما خلصت أغراضي و دبشي .. و أشياء كتيرة ناقصتني .. و أبغا أخلص مشترواتي .. هل أنا غلطت لمن قلت زي كدة ؟؟ و شوفيها كيف سوت حكاية من ورا دي الكلمة !! :06: الله المستعان بس .. و أزيدك شوق :09: .. لمن حددنا الفرح في الحج .. هي أول وحدة أعترضت و قالت لالالالالالالا :30: !! و قالت غيروه و أجلوه .. قرايبي كلهم في الحج !! أععععععععععععععع :30: و أخدت تهزيء من أهلي على كيف كيفك !! ترى قلبي ملياااااااااااااااااااااااان :06: .. و تسلمي يا عسل عالدعوات :) .. الله يجعلها من نصيبي .. و لكي مثلها إن شاء الله :) .. و ما قلتي لي .. ما عجبتك ولا وحدة من القاعات إللي قلت لك عليها ؟؟ سبحانك اللهم و بحمدك .. لا إله إلا أنت .. أستغفرك و أتوب إليك .. تحياتي .. جــــــــداويــــــــــــة

السلام عليكم و رحمة الله و بركاته .. أختي حبةاللؤلؤ .. يعني بالله ما قريتي أنا كمان أيش...