المدخلات والمخرجات / موضوع رايق جيبي قهوتك / شاهيك / عصيرك وتعالي 🌱

قصتين مرت علي حابه اناقشها معاكم..


وحده لواحد في تويتر، تخرج من الجامعه وصار عاطل عن العمل..
انشغل بالإنترنت والبرامج الوثائقيه..
ووقع على وثائقيات للطيران وحوادثه، وتفرج اكثر من ٤ برامج عن حوادث الطيارات..


مرت سنه وبغا يسافر وحجز..
ولما وصل المطار بدت تظهر عليه اعراض هلع،
تعرق / رجفه / دوخه /خفقان..


ببساطه وبدون مايحس جاته فوبيا من الطائرات بسبب البرامج اللي تابعها قبل سنه وفوت الرحله ومعد صار يقدر يركب طيارات..


قصه ثانيه قرأتها قريباً..

تقول انها كانت انسانه حاقده على المجتمع والمشاهير وتتابع فلانه وعلانه..
وتحس بالتعاسه والحزن بسبب اللي تشوفه ومقارنة حياتها بالغير..
إنجازها كان صفر تقريبا بسبب انشغالها بالناس..


قررت فجأه انها تنظف سنابها وتشيل كل اللي تتابعهم وتضيف شي يفيدها في حياتها..
تقول تغيرت حياتها ونفسيتها ونظرتها للحياه، وصارت انسانه منجزه وأفضل من السابق..


عاد انا عندي فلسفه في الحياه تعلمتها من تجربتي الشخصيه،
جاتني فتره كنت مدمنه للأفلام والمسلسلات الحزينه، اي شي يحزن ويبكي احبه واتابعه..

الشعر والخواطر الحزينه لعبتي 🌚..


النتيجه كانت اني صرت سلبيه سوداويه مكتئبه وتعبت وعانيت حتى انتشلت نفسي من مستنقع الاكتئاب والسوداويه..


الزبده اي شي، تشوفينه تقرأينه وتتابعينه تراه يحفر في داخلك ووجدانك وينام في عقلك الباطن..
فجأه بتلاقين نفسك نتيجه للي كنتي تتابعينه وتلاقين نفسك اتغيرتي بدون ماتحسي..


تفرجتي خير، تابعتي مقاطع دينيه، تتابعين ناس فيهم خير ويدلونك للخير ايجابيين..

المخرجات بتكون ايجابيه وجميله في حياتك..


تابعتي نكد ومآسي، واستمريتي فتره طويله النتيجه اكتئاب..


لاتستهينين بأي اي شي تتابعينه ولا اللي يتابعونه اطفالك، هالشي راح ينطبع في عقلك الباطن الين ميلاقي فرصه ويطلع..


امي الله يجعلها بالجنه ويطول في عمرها، كانت واحنا صغار نسافر سفرات طويله ٣ و٤ ساعات..

كنا نقضيها نسمع قصص الأنبياء وسيرة الرسول،
احس هالشي كان له أثر إيجابي علينا..


انتبهي لمدخلاتك، وإذا لاحظتي المخرجات عندك فيها خلل ارجعي للمدخلات وعدلي فيها..


تجاربكم مع هالموضوع ❤️