السلام عليكم ورحمة الله وبركاته
بادخل بالموضوع دغري
أخواتي من عمرها كسبت في مسابقه أو فوازير
وربحتي فيها قولي لنا تجربتك
هي وإلا حد من خواتها اطفالها
جيرانكم
احد تعرفيه قولي لنا تجربتك
مثل مسابقات في التلفزيون او الصحف والا
المجلات الاسبوعيه وممكن ايام المدرسه او
الجامعه قولي لنا تجربتك وش كان جائزتك
و من تعرف احد شارك ببرنامج
من سيربح المليون
وبعض المحلات التجاريه
يسوون جوائز على سياره
عارضينها قدام المحل
واذا اشتريت اكثر من خمسين ريال
يعطوك كوبون المسابقه
من عمره فاز فيها واخذ السياره
اتذكر محلات بنده بالرياض
مصلحينها وكنا نخم من الاغراض
بس من شان الكوبون
خسارة فلوسنا بس
ومن فازت الفوزالكبير
وحفظت القران الكريم كامل
ومن حافظه
الاحاديث الاربعين النووية
اتمنا يابنات تقولون تجاربكم
ونستفيد منها
حتى تجاربك مع
مسابقات عالم حواء
قوليها لنا
او أي موقع فزتي فيه مثلا
بافضل تصميم وغيره
اتذكر زمان فيه مسابقه بجريدة
الجزيره قبل النت
مسابقه شهريه مدري اسبوعيه
المهم كوبونات وفيها اسئله
ونجمعهم ونرسلهم كل شهر
مدري كل اسبوع
كان فيها متعه بحثنا عن الاجوبه
ما نترك لامجله ولاكتاب
ونتسلف كتب من المكتبات
من شان نطلع الجواب
الصحيح ونرسله
الله على ذيك الايام بس
ابشركم ماعمرنا فوزنا
وبعض المهرجانات يعطوك
كتيب مفيد وكوبون اسئله
تقراء الكتيب وتطلع الاجوبه
منه او شريط اسلامي محاضره
تسمعها وتطلع الاجوبه
اشتركنا وكالعاده ماعمرنا فزنا
وفي شهر رمضان تكثر
المسابقات اتذكر التلفزيون السعودي
فيه مسابقة القران الكريم
برمضان يقول ايه قرانيه
وعلينا نطلع
في أي سوره ذكرت الايه
ومن الطمع نرسل باسماء كل العيله
وياليتنا نفوز
الحين مع النت الاجوبه متوفره
بسهوله قبل لها متعه خاصه
حتى لو مافزنا كفايه
تعرفنا على معلومات جديده
اتذكر اكثر وحده تفوز من هلي
هي عمتي ماشاالله
دايم تفوز بس تعرفون في ايش
بحفلة مجلس الامهات
السنوي بالمدرسه
يصلحون مسابقات اسئله بسيطه
والي تجاوب لها جائزه
ودايم تروح لنا بطقم
كاسات والا فناجيل هديه
ياحليلها الحين بناتها امهات
وتركت المجال لهم
يالله عاد بنات كل وحده تقول
تجاربها مع المسابقات والجوائز
وهذي مني لكم
كابون ب500 ريال من احدى اخواتي التاجرات