السلام عليكم ورحمة الله و بركاته
كيفكم يا أمهات و مربيات الأجيال
الله يصلح أولادكم، و يرزق من تمنت الحمل سنين..
حابه اذكر كل شي صار معاي من حملي حتى نفاسي، عشان البكريات خصوصا يستفيدون، لأن في يوم من الأيام احتجت لمثل اللي راح أكتبه..
أول شي خبر حملي كان مثل الصاعقه، توني راجعه من شهر العسل وقلت لأمي ان الدوره نزلت معاي نقط وبعدين وقفت، أمي عصبت و قالت روحي حللي، حللت و قالت مبروك حامل، دقيت على زوجي و طار من الفرح، أمي و خالتي كان عندهم خبر، لكن أبوي و اخواني رفضت أن يوصل لهم شي، لأني منحرجه، وش ذا ما أمداني أعرس إلا حملت << ماتستحي :mad:
المهم تعالوا شوفوا نفسيتي، جاني خوف مو طبيعي و بس أكبي و اقول لزوجي الله يخليك بنزله وهو رافض يقول مايجوز، قلت خلاص ماراح أولد إلا بأبرة الظهر، و قال أوعدك ، المهم بدا الوحام و القرف و ما أكلها إلا زوجي المسكين، يوم كان مسافر عني كنت أكره اسمع نغمة الجوال من اتصالاته و دايم الجوال ع الصامت، ويوم سافرت له صرت أكره القعده معاه ( طبعا من غير ما أبين له )، كنت أدخل الحمام و استفرغ ( و أنتم بكرامه )، واذا طلع من عندي أشتاق له شوق لدرجة أني أدق عليه وهو بالجامعه أقوله تعال مشتاقه أجلس معاك بس اذا رجع تجيني الحاله..
عدت فترة الوحام الخمسه شهور، كنت مقرره أولد في بريطانيا ( مبتعثه مع زوجي )، لكن امي رفضت بما أني بكريه قالت لازم تولدين عندي، بداية الشهر الثامن سافرت للسعوديه، على نهاية الثامن جتني الآم مو طبيعيه، توقعتها ولاده حتى امي خافت و قالت بوديك المستشفى ورفضت، المهم خلصت الثامن و التاسع و أنا ماحولك أحد :27:
رحت المستوصف و قلت للدكتوره، سوت لي سونار و قالت البطن في حالة اسرتخاء، يعني الولاده شرق و أنتي غرب، قلت و الحل، كتبت لي زيت الخروع و قالت الأسبوع الجاي اذا ماجتك الولاده اشربيه على الساعه 2 الفجر و الصباح روحي المستشفى ( الملك خالد الجامعي )، الكلام هذا كان السبت يعني السبت الجاي أشرب الزيت، لكن بعد التخطيط و التكتيك مع زوجي اللي هو في بريطانيا ذيك الأيام، قررت اشرب الزيت الثلاثاء الظهر عشان في الليل اروح المستشفى و الويكند يجيني زوجي، بالفعل شربت الزيت ظهر الثلاثاء و رحت الجامعي على الساعه 8 الليل، ماكان فيه إلا دكتور و رفضت انه يكشف علي، قال خلاص تعالي بكره الصباح، طبعا أنا رايحه و أنا حالتي حاله من الخوف و بس أبكي، رجعت البيت و الأربعاء الظهر رجعت لهم و كان الموجود دكتوره هنديه، كشفت علي و قالت مفتوح 3 سم أنا انجنيت و شهقت شهقه بغت تططلع روحي و جلست أبكي، امي كانت معاي و تحاول تهديني و تقرا علي، و أنا انربط لساني بس اقول وشلون و متى انفتح ماحسيت بشي، و أمي تقول احمدي ربك ان شاء الله بتتسهل، المه قالت الدكتوره ع طول على غرفة الولاده، والله جاني خوف بحياتي ماجاني، جلست ادعي و اقرا اذكاري و الحمدلله كل مالها النفسيه تتحسن..
طلعت لجناح الولاده، كان فيه ثلاث حالات، وحده صياحها يخوووف و الثانيه تتالم بس ماسكه نفسها و الثالثه ماشاء الله عليها مالها حلس بس تتألم، و أنا جالسه أدعي لهم، دخلت الجناح على الساعه 1 الظهر، كشفت علي دكتوره و قالت 3 سم ، جلست الى الساعه 7 المغرب و أنا ماحولي شي، طلعوني على جناح ماقبل الولاده، جلست فيه الأربعاء و الخميس و الجمعه و السبت صبحت جتني الاستشاريه، كشفت علي و قالت مفتوح من 5 و نص الى 6 سم، أنا بنجن وشلون انفتح ولا حسيت بشي، المهم قالوا لي لأزم طلق صناعي، رجعت لي الرجفه و دقيت على زوجي و أمي، زوجي سحب علي و نام، و امي ع طول جتني، دخلوني غرفة الولاده الساعه 2 الظهر << الحين الحين خفت لأني استرجعت الموقف، يوم نزلت للجناح قالوا لأزم نفتح كيس المويه و أجلس ابكي قلت ابي ابرة الظهر، قالوا مو قبل مانفتح الكيس، لأن ابرة الظهر لأزم نحط معاها قسطره طبعا أنا من يوم مادخلت عند الهنديه سألتني تبيغين ابرة الظهر و قلت ايه، دخلت الدكتوره يدها و أجلس اصيح و أرجف و افتحت الكيس و نزل مني يوم مو طبيعيه كثيييييييييره حتى هم استغربوا، كان قررررف، وبعدين جتني أخصائية التخدير ( الله يسعدها في الدنيا و الأخره ويوفقها وييسر أمورها ) عطتني الأبره، كانت مؤلمه شوي بس بالنسبه لي أهون من الولاده، بوقتها نمت تقريبا الى الساعه 4 العصر و صحيت على الآم محتمله لكن الخوف و الرعب هو اللي زاني، جلست اصيح و أنادي الممرضات عشان ينادوني حقت التخدير أبيها تزيد البنج، ماجتني إلا بعد ساعه إلا ربع تقريبا، حاولت تزيد البنج لكن قالت لي انتي الضغط ارتفع عندك بالمره ما أقدر أزيدك مخدر، و أنا بس أبكي و أترجها ( ماكت أحس بألم لكن الخوف ومايسوي )، جلست معاي و تحاول تهديني، الطلق كل ماله يقوى و الجنين مو راضي يتحرك وهو يعطوني عصيرات و اكسجين و الطفل ثابت في مكانه و مرتفع شوي و الرحم مو راضي يفتح اكثر من 6 سم، كانت فيه دكتوره ما ادري ايش جنسيتها كل شوي تجي تكشف و تكشف على الجنين، خوفوني و كان فيه شي مو زين، أنا بس ابكي و اقولهم ايش فيه البيبي وهم يقولون مافيه شي بس خذي اكسجين، أنا تعبت تعبت تعبت من البكاء هدّ حيلي من جد، الساعه عشر إلا ربع قالوا يا مدام لأزم عمليه عشان بيبي مافيه تعبان، قلت خلاص بقول لزوجي، قالوا مافيه وقت، ع طول طيروني لغرفة العمليات إلا الدكاتره جاهزين ( أثاريهم مخططين علي )، قلت لهم ابي تخدير كامل و رفضوا، قالوا بنزيد لك الجرعه ولا راح تحسين، و بنحط ستاره عشان ماتشوفين بطنك، كانت أخصائية التخدير جالسه جنبي و تهديني و تسولف معاي، وواحد من الدكاتره ماسك يدي بقوه لأن جسمي يرجف بشكل مو طبيعي، حتى السرير صار يتحرك، جلست ادعي و اقرا أذكاري، و الدكتور يقول الحين دعوتك مستجابه ادعي، ماكملت نص ساعه إلا الأخصائيه تقول الحين بتسميعن صوت البيبي، شوي إلا سمعت صيحته، جلست ابكي و اقول يا حياااااتي، راحوا نظفوه و جابوه لي ابوسه و بعدين اخذوه للحضانه، كملوا الدكاتره شغله و خلصت العمليه في ساعه إلا ربع بالضبط، طلعوني لغرفة الملاحظه و جلست فيها ساعتين تقريبا، دخلت امي وزوجي و خالتي عندي دقايق و طلعوهم، بعدين طلعوني للتنويم، جلست خمسه ايام و طلعت من المستشفى بعد مافكيت الغرز اللي ماحسيت فيها ابد و الحمدلله..
مستشفى الملك خالد الجامعي..
قمه قمه قمه في التعامل
قمه قمه قمه في النظافه
قمه قمه قمه في الأهتمام
نفاسي .. ماكان فيه شي زود عن الطبيعي إلا شي واحد و الكثير ماجاء في باله، اللي هو الفلفل الأبيض، والله يا بنات رجعني كأني بكريه لدرجة ان أول جماع بعد النفاس كأني بنت و نزل معاي دم مثل اللي نزل معاي ليلة الدخله، كنت أكل بس ما اكثر خوف من السمنه، ما كنت أجلس وكثير استغربوا مني، يقولون ماكأنك نفاس و بعمليه، بس أتحرك عشان الغرز تنخاط و لأني ما ابي ازيد وزني..
طلعت من الأربعين و كان وزني زايد شوي، سويت حميه ، توست مع حليب الصباح ، الغداء سلطه، العشاء ساااااحبه عليه إلا حليب لأني كنت ارضع ولدي، كنت اسوي رياضة الدرج لأن سمنتي كانت اكثر شي من الأرداف و ماجلست شهر إلا رجع جسمي احلى حتى من قبل الزواج، البطن الحمدلله راح نهائيا مع انه كان كبير بعد الولاده و اسوووود، لكن الحمدلله رجع نفس ماكان..
بقولكم عدة نصائح يا حلوات..
والله والله والله ماسهل ولادتي و ييسرها ولا حسيت بأي ألم على انها طلق صناعي و عمليه لكن والله ما اذكر أني تالمت، كان كله خوف، و الفضل في هذا أن من يوم ماحملت ماسجت سجده إلا و أدعي بتسهيل الولاده و ان الله يطمني و يريح بالي، و كنت في قرارة نفسي اقول انا متاكده ان ولادتي بتتيسر بإذن الله ، من يوم مادخلت التاسع و أنا أقرا في موية زمزم و أمسح فيها على بطني ( بعض الأدعيه موجوده في النت حقت تسهيل الولاده )..
بصراحة ابرة الظهر أحس أني ما استفدت منها لكن باخذها في المره الجايه..
الولاده رعب لكن مو للدرجة اللي تصورتها..
عجبني كثييييير المستشفى بتعامله و أنصح اللي تقدر تولد فيه تروح له وهي مغمضه عيونها..
الولاده الجايه بإذن الله ماراح أولد إلا بعمليه لأني شفت حتى الوالده طبيعي تتعب نفس اللي والده قيصري، لأن حتى الطبيعي فيها خياط و بلاوي تتعب، فالقيصري من وجهة نظري أريح بكثيييير..
أقول للبكريات والله الولاده ماتخوف للدرجة اللي متصورينها، خلي ايمانك بالله قوي و ثقي أنه أرحم عليك من نفسك و صدقيني راح تتسهل ولادتك..
أدري هذرتي واجد لكن عسى الغالبيه تستفيد..
الله يسهل ولادتكم و يرزق من ارادت الحمل بالطفل السليم .. اللهم آميييييين
ســـارهـ @sarh_121
عضوة جديدة
يلزم عليك تسجيل الدخول أولًا لكتابة تعليق.
يعطيييك الف عااافيه ياروحي والحمدالله ع سلامتك بس حابه اسالك فعلا نزل الوزن هما يقلون بعد ست شهور والله حزينه ع جسمي مرررررررررررره وزني زاااايد نفسي اولد بس اشوف حل فيه جسمي انا صراحه افكر اسوي رجيم عذاري من ثاني اسبوع في الاربعين وعلى الله
الحمدلله على السامه ياحلووووووووووووووه وطالعة من الشر والله يسهل عليك دنيا واخره ياااااااااااارب والله يجزاك خير على النصايح الرووووووووووووووووعه لاعدمنااااااااااااااااااااااااااكالحمدلله على السامه ياحلووووووووووووووه وطالعة من الشر والله يسهل عليك دنيا واخره...
الصفحة الأخيرة
وطالعة من الشر
والله يسهل عليك دنيا واخره ياااااااااااارب
والله يجزاك خير على النصايح الرووووووووووووووووعه
لاعدمنااااااااااااااااااااااااااك