المستشفى المهجور بالرياض مع الصور والفيديو يمنع دخول ضعاف القلوب

.

.

يالله ان تحييهم جميع..


شوفوا من الحين اقول لكم الموضوع جد وممكن يخوف..
خلوني ابدا بس عشان مااشطح بكم..ثم مااستوعب الا بعد مااكون كتبت موضوع ثاني..





::


اليوم جايني عالايميل رسالهـ..
في البداية احسبها استهبال..صارت جد


الرساله تتكلم عن مستشفى عرقه المهجور
<< صوت هوا وباب يصرصر << تسوي اكشن


::

خلوني اول شي احط لكم الرساله والكلام اللي فيها

::


السالفه يا اخوان ابتدت يوم كنا نحوس وندوس في انا واخوياي في شوارع الرياض الجميله <<<ايه من جنبها

طبعا مهنا مكان نروح له
المهم احنا خمسه بذاك الوقت قلت لـ اخوياي : ترانا طفشنا من الدوجان نبي شي جديد
نقز خويي علي قالي : سمعت ان فيه مستشفى في عرقه مهجور ويقولون العيال ان مهجور من حرب الخليج جوه اخواننا الكويتيين وجلسو فيه وبعدها معد احد دخله
ويقولون فيه جن انا بس سمعت جن قلت له جايينه جايينه

عاد تعرفون مافي احد منا مايحب الجن ومايخاف منهم <<< كيف تجي ذي
مالكم بالطويله قلنا طيب تدله قال اييه قلنا خلاص تمام بكره نبي نروح له العصريه قالو الشباب تم
المهم على كلامنا تجمعنا العصريه ورحنا له
المستشفى كبير وفيه سكن اكبر منه مافيه ومهجور
من برى وقصم انه اطلق من مستشفى الشميسي
المهم قعدنا نحوس عليه من برى طبعا بالسياره مالقينا مدخل له
المهم قررنا ان احنا ننقز فوق السور طبعاً السور شوي عالي ومافيه صعوبه
لبقت السياره ونزلنا العيال في البدايه مسوين احنا الـ محنب خايفين من احد لكن من دخلنا ضاعت علومهم
المهم نقزنا وضبطنا امورنا جينا لـ باب مكسور نصه دخلنا معه
والمكان من داخل مغبببببر عليه اكوام تراب
المهم دخلنا والله بدا الظلام يجي طبعا مو الوقت لا المكان مظلم وموحش
دخلنا وكل واحد فاتح جواله وينور به طريقه
المهم قعدنا نحوس ونفرفر يمنتن ويسره طبعا هالحتسي كله بالدور الاول
المهم دخلنا الكافيتيريا وكان فيه درايش ومنور المكان
المصيبه اننا لقينا جريده الرياضيه محطوطه على وحده من من الطاولات ومفتوحه قرينا التاريخ لقيناه مايتعدى الثلاث اشهر
المهم سمعنا صوت قوووي مرررره في الدور الثاني العيال خاافو وكل واحد صفقته ام الركب
وماااتشوفون الا نعال تتطاير في السماء من النحشه
المهم طلعنا واحنا نشاهق من الخوف
ويوم طلعنا قابنا سيكورتي قال لنا : وش جابكم هنا بهالوقت .؟؟
قلنا لا والله بس واحد من العيال يقول ان هنا جن وحبينا نشوف قال اهاا
روحو ولعد اشوفكم هنا مرتن ثانيه قلنا ايه طيب <<< سلكنا له طبعا
بس الي لاحظنا عليه اننا نذب ذبات نبي نلطف الجو هو مايضحك ولا يغير نظراته
المهم طلعنا وتونا جايين بنركب السياره جت ورانا كامري شرطه سريه قال كل واحد اثباته عطيناه اثباتاتنا
قال وش جايبكم قدام هالمستشفى قلنا له الي قلناه للسيكورتي
قلنا له بس السيكورتي واحنا داخلين ما قال لنا شي
قال اي سيكورتي .؟
قلنا السيكورتي الي هنا
قال والله مافيه سيكورتي هنا من 9 سنين
احنا وجيهنا صارت كذا
قلنا اهااا
وركبنا السياره ومشينا
قلت لهم داخله داخله الله لايعوق بشر بس مهوب معكم يا الزلايب <<< طالعن منها الاخو
الا ان كان بتجون معي قالو تمام بس نبي نصير مجموعه مو تسذا ملحطين



المهم جينا مره ثانيه وكان عددنا حول الـ 18 شخص <<<<< جمعنا كل الي نعرفهم
معنا كشافات من هنا لليل
المهم وصلنا للمستشفى الساعه 2 ونص الليل <<< يقالك بنخربها
رحنا للموقع نفسه الي كنا فيه امس لقينا البوابه الي كانت مسكره صارت مفتوحه قلنا زين محنب ناقزين ولا شي ج< هذا الي هامكم يا مال الي منيب قايل
ورحنا للباب نفسه لقينا الباب كله مكسور امس كان نصه لا الحين كله مكسور
وقايلين العيال ان الدور الارضي والاول مافيه شي يخوف يقولون الادوار الي بعدها وثلاجه الموتى هي الي عليها الكلام
المهم واحد من الي جبناهم قد مره داخل المستشفى وشوي يعرف الي فيه
قلنا له وين ثلاجه الموتى
بقول لكم الوصف اول ما تدخل تمشي سيده بعدها تروح يسار تسيد شوي تروح يمين تجيك الثلاجه بـ وجهك <<< ومن قالك انهم بيدخلونه
المهم ماعلينا
رحنا لـ ثلاجه الموتى
ووالله على ما اقوله شهيد فيه دريشه على الباب طليت انا وواحد من اخوياي لقينا منور شوي وفيه ظل على الجدار ناس يمشوون كثيرييين وربي كثيرين
انا وخويي ماصفقتنا ام الركب الا صفقتنا ام النخاع الشوكي المهم قلت للعيال قالو خلاص بنروح وبنشوف وش شفتو
راحو وشافو ومالقو شي بس نور ابيض المهم قالو الله يقلعكم هبلوتنا واخر شي مافيه احدقالو خلاص بنرقى للدور الي بعده قلنا لا محنب جايين بنجلس هنا قالو طيب بكيفكم
قلنا هااااه لا خلاص بنجي بنجي ماينمزح معكم انتو قالو خلاص طيب امشو ولا يكثر وجلست اتحلطم <<< يقالك معصب <<< يا حبني لي اذا عصبت
المهم رقينا للدور الي بعده ومالقينا فيه شي يجذب او يخوف
ورقينا الدور الثالث قالو الشباب احس ان شكلنا غلط خلنا نروح نرقى للدور الي بعده واذا لقينا شي شيات عطنياكم رنه <<< على طريقه الافلام يقالك
قلنا اوكي المهم فتشنا كل شي ما لقينا شي المهم رحنا للدور الرابع والخامس والسادس كلها مافيها نور ومافيه شي
المهم وصلنا للدور السابع لقينا الباب حقه مقفول بس واضح ان لو تهف الباب طاح

المهم وجينا بنوخره طاح وانكسر ووالله الدور منوور كللله شي غرررريب وفيه اثار رجول كأنها من شوي ماااره المهم رحنا ودخلنا غرفه العمليات وورب الي خلقكم اننا لقينا شاهي يطلع منه بخااار يعني توهم مسوينه
احنا طارت عيوننا
جلسنا ننادي يمكن يصير فيه احد ولاش
قلنا يمكن نصير متوهمين درنا في هالدور كله المهم ثنين من اخويانا قالو والله انكم موسوسين احنا بنرقى الدور الي بعده وانتو دورو يا سبايك
المهم هم رقو واحنا قاعدين ندور
ما وعينا الا نسمع صراااخ اخويانا الثنين
وركضنا للدرج بنشوف وش فيهم شطفونا داااعسييين نازلين لـ تحت والله وكلنا نلحقهم وواحد من العيال يقراء ايه الكرسي
قعدنا نلحقهم طولنا واحنا نركض وراهم الييين طلعنا
واحنا موب تعبانيين الا متقطعين من التعب المهم وقفناهم قلنا وش فيكم يا مال الوجع خرعتونا واحد منهم طاقته ام الركب وساكت ما يتكلم رحنا للثاني قلنا وش فيك يالله بل يالله تكلم
المهم قال والله وبالله واقسم بالله اني صادق على كل كلمه اقولها قلنا عارفين بس قل
قال واحنا تونا داخلين الدور الثامن كان مظلم المهم وتعمقنا شوي بالدور فجاه دخلنا غرفه فيها ثلاثه ماشفنا الاظلال او لابسين شين اسود بس والله مافهمنا عليه من كلامه قاعد يتأتئ <<<< حاولو تقرونها
المهم يقول ركضو وسحبو يد خويي الي الحين ما يتكلم انا مسكت به وبعد جهد جهيد فكيته منهم ووصلنا للدرج وقمنا نصارخ وعاد بعدها شفتونا
المهم قالو واحد من العيال يمكن انهم حراميه ولا شي ويوم شافوهم قمطو قلنا خلاص نجي كلنا ونشوف قالو الثنين والله مانروح لو على قص رقبتنا
وثلاثه بعد قالو كذا وركبو السياره
احنا رقينا للدور الثامن وتونا واصلين له الا والله العظيم تطلعنا ثلاثه قطاوه سوووود وتشطفنا رايحتن للسطح واحنا والله جلسنا يمكن ربع دقيقه طاقتنا ام الركب فيها
بعدها ما تشوف الا قوه ركض صرنا ما شاء الله غزلان المهم طلعنا وشفنا الدور الثامن يولع ويطفي قلنا لا ما بدهاش ارفع ثوبك يا ولد <<< تسذب كان لابس جينز وتيشيرت
ونفرك ذيك الفركه الي مابعدها
ولاعد عتبنا عليه مره ثانيه
بس الشي الغريب ان فيه اجهزه جدييييييييييييييده مررره بكراتينها
وبعد ماسويت بحث يقولون انه انه مبني من عام 1400 في عهد الملك خالد الله يرحمه
وصدق خويي انهم جو فيه الكويتيين ومن بعدها انهجر المستشفى
بس والله شي يقهر اجهزه من اعلى المستويات << متعوب عليها
واشياء من جد سابقه عصرها
وان شاء الله الصور تثبت كلامي

والصور ان شاء الله بكره

ووالله ياشباب ويا صبايا ان مازدت ولا نقصت ولا حرف ناقلها لكم نصاً
والله على ما اقوله شهيد
والي مو مصدق يروح يدخله ويشوف


::

بأحط لكم الصور في آخر الموضوع..

::


انا يوم قريت الموضوع صار وجهي كله استفهامات..^28^


وصادف ان امي مرت علي..
قلت تعالي لقيت سالفه حلوه

وسألتها عن هالمستشفى..
قالت ايه معروف قديم مهجور ..

عاد هي تقول..
يقولون ان وزراة الصحه بنتهـ..ثم تحسفت به على الناس وصكوهـ << امي سياسيه بحتهـ

قلت لها اللي فهمته انه كان يشتغل وبعدين تسكر..

قالت ماادري عاد هذا اللي عندي واخمدي والا تعالي امسكي اخوك عني


::

انا مابغيت السالفه تروح كذا..
قلت لازم افهم وش سالفتهـ ..

وقعدت انا وقوقل نتطاق اليوم وتأخرت عن النومهـ بسبب هالمهجور


::


اول خبر لقيتهـ ..
في شهر 2 من عام 2008
جريدة الجزيرهـ..

بعد أن ظلت مهجورة لمدة عشرين عاما لم تجد الزواحف السامة من الثعابين والعقارب أفضل من مستشفى ظهرة عرقة للاستيطان والتكاثر في أجواء أمنية مشددة بعيداً عن النطاق العمراني وعن الناس.إلا أن وزير الصحة الدكتور حمد بن عبدالله المانع نفض الغبار عن المشفى للبدء في إجراءات نقل الملكية لوزارة الصحة والبدء في إعادة تأهيله ليعمل بطاقته الاستيعابية التي تقدر بـ 300 سرير قابلة للزيادة لتصل إلى 500 سرير، وفي حديث خص به (الجزيرة) قال المانع: ان الوزارة ستقوم بتشغيل المشفى ليكون مشفى للنساء والولادة سيسهم بشكل كبير في إيجاد المزيد من الأسرَّة لتخدم المواطنين وتخفف ازدحام وشغل اسرة النساء والولادة.وأضاف المانع ان التكلفة التقديرية الأولى لإعادة تأهيل مستشفى عرقة تقدر بـ 97 مليون ريال دون تأثيث.


<< هالكلام قبل حول سنتين..ايام المانع..
والمستشفى للحين مسكر ..


::

الشي الثاني ..

جريدة الاقتصاديه
بتاريخ نوفمبر 2007

بني على أحدث المواصفات والمقاييس ويحتوي على 200 وحدة سكنية ..و"الصحة" تسلمه لـ "الداخلية"

شائعات المبنى "المسكون" تطارد مستشفى عرقة منذ 28 عاما


يعرف سكان حي عرقة مبنى كبيرا يقع في آخر حيهم، ذا طوابق متعددة تميزه حداثة التصميم منذ أن سكنوا الحي، لكن عدم تشغيله طوال 28 عاما جعل منه محورا للشائعات، وهو ما زاد الغموض بشأنه، رغم أنه بني على أحدث المواصفات والمقاييس.
"الاقتصادية" زارت موقع المستشفى الواقع شمال غرب العاصمة الذي بدا في حالة غريبة، واجهات منه زجاجها مهشم والشجيرات الصغيرة قد نبتت في كل أرجائه، في هذه الأثناء كان لقاءنا بالحارس، ولم يكن في البداية يعلم أن الصحافة قريبة منه لئلا نمنع من معرفة حقيقته، إذ أخبرناه أننا من سكان الحي، وسألناه عن قصة هذا المبنى، ليبدأ في سرد ما لديه من معلومات حسب موقعه واختلاطه بمسؤوليه. يقول الحارس: "بني هذا المستشفى عام 1400 هـ قبل 28 عاما كمستشفى للصحة النفسية، من قبل شركة سعودي أوجيه، كانت هناك بعض المشكلات في تشغيله وعن موقعه، ليظل في مداولات لحله من وزارة الصحة طوال هذه السنوات".
وأضاف: إن المستشفى يحوي على مبنى رئيسي وفيه أجهزة طبية منذ أن أنشئ تكلفتها بالملايين، كما يتضمن المستشفى أكثر من 200 وحدة سكنية قسم للعزاب وأخرى للعائلات، وفيه مضختان للمياه تآكلتا منذ ذلك الوقت".
وأكد الحارس أن الوحدات السكنية في المستشفى استضافت العائلات الكويتية أيام الحرب الخليجية لفترة من الزمن، مشيرا إلى أن أهالي الحي ما زالوا يؤدون الصلوات الخمس في مسجد المستشفى حتى الآن. وبسؤاله عن ما يردده أهالي الحي بأنه مسكون ليجيب الحارس بـ"نعم".
وأبان حارس المستشفى أن الشؤون الصحية في وزارة الصحة ورد منها خطابا أمس الأول لحراس المبنى لإخلائه. وبين أن تسعة أشخاص يقومون بحراسته بالتناوب.
في حين أكدت مصادر لـ"الاقتصادية" أن وزارة الصحة تنازلت به لوزارة الداخلية، واستبعدت "الصحة" أن يكون المبنى صالح طبيا، لافتا إلى أنه تم نقل الأجهزة والمعدات من مستشفى عرقة أول أمس إلى مستشفى الملك فيصل التخصصي وإلى مستشفيات المنطقة. ولم يعرف مصير المستشفى حتى الآن، بعد أن حصلنا على معلومات تفيد أن "الداخلية " ستتسلمه خلال اليومين المقبلين.
"الاقتصادية" حاولت الاتصال على رئيس لجنة في وزارة الصحة خصصت لموضوع مبنى المستشفى وبمسؤولين في الشؤون الصحية ولم نجد ما يؤكد صحة انتقاله لـ "الداخلية" وما تضمنه الخطاب الذي تحدث عنه حارس المبنى.
يشار إلى أن الأمير سلمان بن عبد العزيز ترأس مجلس المنطقة في وقت سابق لعام 1426/1427 هـ التي عقدت في قصر الحكم. وناقش المجلس ضرورة الإسراع في تشغيل مستشفى عرقة القائم وقرر أن تقدم وزارة الصحة برنامجا زمنيا لسير العمل في استكمال التجهيزات التي تقوم بها في المستشفى مع إيضاح تاريخ محدد لبدء التشغيل.


::

وفي نفس الصفحهـ كانت التعليقات المكذبهـ للقصهـ تقول..

( انا اليوم دخلته انا واخوياني بتاريخ 27\3\1430ه والمستشفى سمعنا عنه كثير لذالك رحنا وشفناه المستشفى على ما شفت انه مستشفى راقي كان مجهز بكل الاجهزه كان والطوابق ...وفيه من التلفزيونات والاجهزه واسطوانات غاز الاوكسجين وغيره )

(انا داخل يوم 29/4 مجهز بكل المعدات
ومهجور)

(انا دخلته امس الليل
اللي مستغرب منه الأنوار تشتغل للحين من 28 سنه !!!!!)

( انا اليوم رحت للمستشفى انا وخمسه معي وشفنا اشياء غريبه واصوات والبيبان تتسكر وتنفتح وحنا ما ندري وش السالفه ويقلون الدور السكون هو الدور الثامن والاسكان الي قدامها)

( السلام عليكم و رحمه الله وبركاته رحت المستشفى وشفته على الطبيعه ودخلنا ومسكونا الحراس وتهمونا بسرقات المستشفى وسلمونا الشرطه وبعد يومين خرجنا من السجن )
<< ماتسوى عليهـ..جن وسجن

::


الغريب اني لقيت تعليقات كثيييييرهـ وكلام اكثر..

بس ماهمني هو مسكون والا لا..

كنت ابي اعرف هو اشتغل من اول والا لا..
وليش مهجور كل هالسنين..

تعبت وانا ادور اليوم..

بكره بأكمل..ولو لقيت شي جديد..بيكون للموضوع تحديث..



::


حلو موضوعي..؟؟..


لي باك بالصور ..
وان لقيت مقاطع احلى واحلى


.

.