حبيت افرجيكم طريقة عمل المسخن اللف لاني ولا مره شفتو في المنتدى بتمنى يكون جديد عليكم ومميز
الحلو فيه انو شغل عزايم وبوفيهات وتحضيره سهل وفيه مكون سرررري هو اللي بحلي هدا المسخن وبيعطيه نكهه مميزه جدا
نيجي للتحضير
قبل ما تبلشي حطي فحم على عين الغاز وخليها تحمر وتصير جمر وللعلم فحم البخور اللي بقولو عنو صيني ما بينفع لازم الفحم الي بيستعملو في الشوي
بنسلق صدور الدجاج عادي زي دائما ( انا بستعمل 6 صدور لخمس ارغفة صاج)
بعد ما ينضج بنتركه يبرد وبنبلش نفتت الصدور بايدينا
بنكون قلينا بصل جوانح صغيره مع زيت زيتون وانا بحط لكل قطعة دجاج بصله كبيره ومرات بزيد
بنضيف الدجاج على البصل طبعا كل هادا الحكي بيصير مش على النار يعني خلص بتشيلي الطنجره من على العاز لانو كلو مستوي
بعدين بنحط سماق بكميه بتتناسب مع الحشوه ( حطي لحد ما تحسي انو اللون الاحمر للسماق باين في الحشوه)
وازا بدك حطي شوية ملح
نيجي للمكون السري
بتعملي فراغ في وسط الطنجره وبتجيبي زبديه فيها شوية زيت زيتون وماء وبتسقطي الجمر الحار فيها وبسرعه بتسكري الغطاء و حاولي البخار ما يطلع لبره
الدجاج بتنكه بنكهة الفحم وبيطلع طعمو كانو مشوي
بتجيبي خبز صاج ما بعرف شو بتسمو في الخليج ( قريبتي مره عملتو بالسبرينغ رول بس للامانه ما حسيتو طيب زي خبز الصاج)
بتقطعي الخبز لمربعات متوسطه
بتدهنيهم بايديكي بطبقه خفيفه من زيت الزيتون عشان ما يكون الطبق دسم كتير
وبتبلشي تحشي زي كانك بتحشي ورق العنب او الملفوف
بترصيهم بالصينيه وبتشويهم بالفرن من فوق لحد ما يشقر لونهم من الجهتين
وقدميه مع صوصو اللبن الزبادي مع الثوم والمايونيز
الطبق اللي على على اليمين
ولا تنسو تدعولي ازا عجبكم الطبق انو الله يهديني انا وزوجي ويخليلنا سلطان ومريم