vip_sa :

افضل تسأليني هنا ، لا احد عارفني ولا أحد عارفك بس محرك البحث يطلع على محادثاتنا والعالم تستفيد ونحتسب أجر العلم النافع لنا بعد موتنا . انا ياعمري حملت اول ما اعرست حمل طبيعي ثم سبحان الله صرت احاول احمل ومايتم الحمل ، تخيلي كل ما احمل يموت الجنين ببطني ، الأغلب من البناتهنا بالمنتدى عارفين حالتي اني احمل ويكبر الجنين ويتحرك ويكون كل وضعه تمام واعرف انه بنت او ولد ثم فجأة يموت بدون سبب، والان لي يمكن ١٠ سنوات احاول بالحمل وكله احمل ويموت الجنين ببطني وهالشي صار لي مرررة كثير ولله ولله مدري كم مرة لكن أتوقع فوق ١٠ او ١٢ مرة من كثرهم ماعاد اذكر كم مرة الله يجعلهم شافعين لي ، ، المهم انه يوم يموت الجنين يعطوني طلق صناعي ويولدوني طبيعي جعلك ولا وحدة من الموجودات تولد ولادتي لجنين متوفي لأنه الاحساس متعب ، يوم أولد ينزل الجنين ولكن الغريبيبعض الولادات مو كلها يوم أولد المشيمة تجلس بالرحم و ماتنزل بسهولة ، ثم يكتشفون ان فيه التصاق بجزء من المشيمة على جدار الرحم ، وفعلا سبحان الله يدخلوني عندهم تنويم قبل يولدوني ويخلوني تحت الملاحظة خوفا من النزيف لأنه الالتصاق سبب للنزيف ، ويولدوني ويطلع النونو الله يشفعني فيه ميت وثم عقبه يبقى جزء من مشيمته لاصق بالرحم سبحان الله ، يحاولون ينزلون المشيمة مايقدرون ،فيدخلوني مباشرة لغرفة العمليات ويسوون لي تنظيف والحمد لله الوضع طبيعي ومايتعب أبد .. لكن مرة من المرات جاني الطلق بالبيت وكنت بالشهر السادس تقريبا وماكنت ادري ان المشيمة التصقت ، اشتد علي الطلق وقتها ونزل الجنين بالبيت وربي انه حالة رعب هههههه حسيت اني بمسلسل قديم اكشن ، اذكر وقتها بدا ينزل دم وبالبداية حسبته دم ولادة عادي لكن اللي حصل انه صار يزيد مثل المويه يصب ، وانا رايحة للمستشفى وبالطريق امتلت السيارة دم ، ياشيخه النزيف يصير مثل الذبح بالسكين ، المهم وصلت للمستشفى وانا فاقدة الوعي ودخلوني عملية وسووا لي تنظيف وصحيت الحمد لله ونقلوا لي دم ، المهم حبيبتي انه بعد هالحالة عرفوا الاطباء انه لازم لي متابعه للولادة بسبب الالتصاق خوفا من النزيف وفعلا هذا اللي صار ، صرت كل ما ابي أولد ينوموني بالمستشفى ينزلون الجنين وممنوع انتظر الطلق يجي ، كانوا محرد ماينزل الجنين يشوفوني وش اكون ثم يسوون لي تنظيف مباشرة ويارب لك الحمد لأني اكون تحت مراقبة الأطباء يصير الوضع مرة بسيط وما أطول عندهم ولا يجيني تعب ، أولد وثم يسوون تنظيف وثم يوم وأطلع ، وصدف معي بالتنويم حالات مثلك وكانوا ينومونهم عندهم ويولدونهم بدري والحمد لله يقومون بالسلامة هم وأجنتهم ، الأمر يحتاج متابعه وملاحظة فقط ويصير بسيط مرة لكن اللي تهمل المتابعه مو زين لها ، فأنصحك تجلسين تحت الملاحظة ولو انه صعب وطفش وياليت تسئلينهم متى افضل وقت يولدونك ، اكيد قالوا لك يولدونك بدري صح ، شفت كم وحدة ولدوهم قيصري والحمد لله قاموا بخير ، وما اعرف ترى يمكن فيه حالات يولدونهم طبيعي اكيد الحالات غير بعض فأنا لأنه اكون بالسادس يولدوني طبيعي … . اللي أبي تستوعبينه إنه الامر سهل باذن الله لكن الاهمال يخلي كل شي سهل متعسر ، أنا يوم أهملت المرة الأولى تأدبت لكن المرات اللي بعدها الحمد لله ماتعبت ولا شي الحمد لله ،، فأنت توكلي على ربك ولاتخافين أحلف لك الامر بسيط وباذن الله تبشرينا

افضل تسأليني هنا ، لا احد عارفني ولا أحد عارفك بس محرك البحث يطلع على محادثاتنا والعالم تستفيد...