سوينا مضروبة و الكمية كانت نوعاً ما كبيرة لان يوم اجتماع العائله وما لحقت الصراحة اصور كل الخطوات بسبب الشغل معها والصور مو ذاك الزود بالجودة لان التصوير كان بكاميرا حيا الله بس قلت بنزلها لكم ,,
اول شي والاساسي بالمضروبة السلق وهو يشبه الفجول بس راسه احمر مو ابيض وهذا شكله ,,
قطعوه صغار والكمية منه لازم تكون كبيرة ,, ومعاه بصل بعد واجد وطماط ,,
ومعاه كيلتين ماش وكيلتين لوبا حمراء ,, اللحم أو الدجاج كميته نفس كمية لحم الهريس ,, احنا سوينا جدرين واحد باللحم وواحد بالدجاج بس ما صورت الا جدر الدجاج ,,
البهارات : ملح وليمون اسود وبزار ..
يوضع على النار لمن تستوي اللوبا والماش واللحم يصيرون ناجضين عدل تالي ينكب عليه الرز ويصير يعني الماي واجد لان نبيه رخو ولين ,, وخلاص نخليه على نار هادية لمن يستوي الرز ,,
هذا شكل الجدر بعد استواء المكونات وقبل الضراب ,,
والحين نجي للمرحلة الصعبة وهي الضراب ,, ولكن قبل الضراب نكون مجهزين الترنج والليمون ونعصرهم ونكبهم على الجدر بمكوناته وكل ما كانت الحموضه مبينه صارت الذ ,,
احنا بما ان الكمية كانت كبيرة استعنا بالخلاط الكهربائي ,,
وهذا بعد ما ضربناها عدل بالمحركة ,,
بعد ما ننتهي من الضراب نسطعها في صحون مثل الهريسه ونحط قطيرة دهن بقر ,,
وهذا هالصحن حطيناه نذوقه ,,
وبالعافية علينا وعليكم ,,
بغيت اسألك هالاكلة مشهورة في اي دولة ؟؟؟ و ايش هو الترنج ؟؟
يعطيك العافيه على هالمجهود
عوافي عليكم