كده يا رانيا لازم طبعا تكلمينا

يا حبيبتي ربنا يصرك ويثبتك

طبعا تنزلي علشان لو حصل حاجة لا قدر الله تبقى شوفتيها وشافتك ، بصي يا رانيا الأعمار بيد الله وياما ناس مريضة زى ما بتقولي كده واكثر وربنا يمد في أجلها وناس تانية ما فيهاش حاجة خالص وشباب كمان وعمرها ينتهي

احنا مسلمين ومؤمنين بقدر الله أيا كان قولي لنفسك كده، انت ما فيش في ايديك حاجة غير الدعاء كلنا امرنا بيد الله وحده وكل اللي يعمله احنا مالناش نقول حاجة مالاش حاجة في نفسنا

انا عارفة ان الأم ما تتعوضش ربنا يحفظهالك افتكري دايما ان الأعمار بيد الله

كان نفسي اكون جنبك دلوقت واخدك في حضني يا رانيا والله معلش ربنا معكم ويا عالم ايه هيحص بعد ثواني مش بعد ايام واسابيع

نصبح بقى رغم اني اتغميت من موضوع مامة رانيا

المهم

احكي لكم اللي حصل

بصوا امبارح رجعنا من العزا وهو حاول يصالحني تاني نفس الطريقة بتاعة اول امبارح ومش مديني فرصة اتكلم واقوله انت هنتني واحرجتني قدامهم يقوللي انت اللي احرجتي نفسك وخدتي الموضوع بحساسية، يعني واحد عمال يظغر لي ويكلمني بنرفزة قدام اهله هاخد كلامه بحساسية ازاى؟

المهم جيت اكلمه هرب "انا تعبان قوي انا مش قادر انا مش عارف ايه" قلت له خلاص انا عامة ما نتش هاتكلم دلوقت انت اللي فتحت الموضوع

المهم واحنا في العربية الصبح جت السيرة رحت بقى قلت له كل اللي ضايقني والكلام ده مش مقبول تماما ومش هاسمح انه يتكرر تاني فضل يتريق ويهزر انا طبعا اتغظت ورحت قايلة له والله العظيم لو الموضوع اتكرر تاني هارد عليك قدام الناس ومش هيهمني حاجة ولا حتى من موجود

بس بقى راح مسك في الكلمة "وات بتهدديني احنا بنهدد بعض" واتقمص
قلب الترابيزات يا لا روزا

المهم قلت له الخلاصة كده ان مش المفروض حاجة تحصل قدام حد وانه لازم يسمعني وكان لازم اقول كده لأنه بيهزر وانا باتكلم جد ولأني لازم اقول علشان ما اشيلش حاجة في قلبي

وبعدين فضلت اجر كلام عادي وهو مقموص (بس انا مش هاممني الصراحة لأني كنت متضايقة جدا ودي الطريقة الوحيدة اللي كنت هارتاح بها اني اقول اللي ضايقني )

ها تنصحوني اعمل ايه في الخطوة الجاية؟ انا كده خلاص عادي باتكلم عادي معاه وهو بقى اللي مقموص

مشمش

هاقول لك حاجة بس ما تزعليش مني

انت اخترتي وقت غلط علشان تقولي لزوجك انك متضايقة من معاملته لأنها مامته ولأنها في بيتك، ولأنك كان ممكن تقولي نفس الكلام في قعدة فرفشة وكان هيكون له تأثير افضل كثير، سمحيني بس احنا خوات وكان لازم اقوللك الكلام ده لمصلحتك

لا روزا

ضحكتيني والله ، ولا يهمك عادي ما هو انت مش نبهتيه انك عاملة منظر علشانه هو اكيد كده زعلان وبيقول ما استقبلتنيش كويس معلش

الرجالة فعلا لهم حاجات غريبة قوي

صباح الخير

جنة
حمد الله على سلامتك يا قمر ويارب تكونى احسن دلوقتى
وربنا يهدي حالك انت وخطيبك وييسر لك امورك يارب

رانيا
ربنا يكون فى عونك ويثبتك يا حبيبتى ...طبعآ لازم تنزلى مصر حتى عشان تكونى جنب مامتك
وخليكى قويه كده وخلى عندك ثقة فى الله
والدنيا دى ما هى الا مرحلة بنعدى عليها ..يعنى فترة مؤقته لينا كلنا وفى الآخر مصيرنا واحد
وان شاء الله هنتقابل فى الجنه ونتتكلم على الدنيا ونضحك على اللى كنا بنعمله

وانت ادعيلها ربنا يشفيها ويحفظهالكو يارب ويرزقنا ويرزقكم الفردوس الاعلى
ولاتقنطى من الدعاء
انا عارفه انك مؤمنه وعارفه الكلام ده

وابقى طمنينا عليكى وعليها يا قمر

لاروزا
معلش يا قمر خيرها فى غيرها
فكرتينى بأختى لما جوزها رجع من السفر كانت مستنياه على نار وعامله حسابها قبل ما ييجى على طول انها تصبغ وتقص شعرها وتعمل نيو لوك ونزلت اشترت حاجات واكسسورات عشان تقضى ليله رومانسيه
وقبل ماييجى بيوم قاله دى ماما هاتبات معانا ليلتان !!!!!!!!
وكله اتفركش

فاطمه
ازيك يا قمر وازى ياسمينه عامله ايه
انا من رأيى انك تتكلمى عادى وخلاص ولا كأن فيه حاجه ولو كان جلامك جامد شويه ممكن على بالليل تتكلمى معاه بدلع وتقوليله انا كان قصدى اوضحلك انا اتضايقت من ايه ودى مافيهاش حاجه تزعل ..لأن من حقى انك تراعى مشاعرى ومتضايقنيش .....وهو هايهدى مع الوقت
وخللى بالك ممكن يكون اتقمص من اسلوبك او طريقة الكلام
اوقات بيكون معايا حق فى موضوع مثلآ وآجى اتكلم معاه انفعل.. ويزعل و يتقمص وانا ازعل انه ليه يزعل ...............
بس بعدها يقولى لو كنتى جبيتيها بطريقه تانيه او باسلوب هادى كنت اعتذرتلك و بوست راسك


وبرضه انت ادرى بجوزك وبالاسلوب اللى تتعاملى معاه بيه