السلام عليكم جميعا
ازيكم يا بنات مصر المحروسة

فطومة
ربنا يكون فى عونك بس انا من راى انك تعملى نفسك متعرفيش حاجة عن خلافات الستات الحلويين دول وتكلمى كل الناس تعزميهم رسمى وتقوليلهم المناسبة وان الكل هايبقى موجود ونتلم فى قعده عائلية حلوة
والله اللى يجى اهلا وسهلا واللى مايجيش براحته بس هاتبقى اتحسبت عليه غلطة لان المفروض الناس كلها تحضر فى مناسبة زى دى الا اذا كان فى ظرف قوى يمنعها
وكمان ما ياما فى تجمعات عائلية وبيبقى فى ناس برضه مش طايقة بعضها بس لازم بيجوا كلهم على اساس الشكل الاجتماعى والمجاملة وعشان ماحدش ياخد عليهم موقف بس ممكن يتجنبوا الحديث مع بعض وخصوصا ان هايبقى العدد ما شاء الله يعنى ممكن كل واحدة تلاقى حد تكلمة بعيد عن التانية
وربنا يهدى النفوس

لكن تكررى العزومة مرتين بالشكل اللى هاتعمليه ده لاااااااااااااااااااااا والف لاااااااااااااااااااا
هى مرة وتقعديلك عليها سنتين تلاتة يا بنتى يا دوب على ما كل شخص يردلك العزومة دى مرة :)

كهرمانة
اخبارك ايه؟
ربنا يقومك بالسلامة
بس يا بنتى مادام دخلتى التاسع والمية قلت يبقى خلاص لازم تتوكلى على الله وماتستنيش اكتر من كده
مش كويس المية تقل حوالين البيبى
انا حصلى الحكاية دى فى بنتى وانا فى تانى اسبوع من التاسع والدكتورة قالتلى لازم تولدى مع ان برضه ماكنش عندى اى اعراض من بتوع الولادة ولا حسة باى حاجة خالص بس مية بتنزل بمعدل فوق الطبيعى
فى حاجات بتتاخد عشان تسرع موضوع بدء الولادة دى ويبتدى الرحم يفتح

يلا توكلى على الله وكلمى الدكتور خليكى تخلصى ونفرح بالنونو ان شاء الله

صباحكم فل يا بنات عاملين ايه

كهرمانتي

ربنا معك ما تخافيش كل الستات بتولد ولا مفر يعني هتعملي ايه طالما ما فيش حاجة في ايديك يبقى توكلي على الأمور كلها عنده بس عاوزاكي تاخدي بالك من نفسك كويس وتولدي في مستشفى نظيفة مع دكتور كويس علشان ما تحصلش مضاعفات من أى نوع يعني تغاضي عن مسألة الفلوس دلوقت وعلى فكرة والله سان بيتر حلوة يا بنتي وطالما اللي يولدك دكتور مسلم خلاص انا حد من قرايبي وصاحبتي الأنتيم ولدت هناك اتكلفت الولادة تقريبا باتعاب الدكتور 1300 طبعا هايل بأسعار دلوقت وفي مكان نظيف علشان ياخدوا بالهم من البيبي وادعي ربنا ييسرلك

وامانة عليكي لو افتكرتيني وقت الولادة تدعي لي بحجة مقبولة انا وزوجي وذريتي

كهرمانة
هبهوبة
رانيا سبانيش
لولو
روشانا
توتا
دينا

كل البنات

الموضوع باختصار ان الست دي وصلت فعلا مصر قبل زوجها واحنا مستنينه هو لما يوصل لأن العزومة علشانهم هم واخت زوجي التانية برضه كانت مسافرة

وانا بصراحة ربنا هاعزم الكل فعلا واللي يجي حياه الله واللي ما يجي مش هاعمل عزومة تانية ليه؟ علشان انا بصراحة مش باحب اسلوب الاجبار ده يعني انا حاسة انها كده بتحاول تجبرني اعمل اللي هى عايزاه بشكل غير مباشر ولما اعزمها هى وزوجها لوحدهم ابقى نفذت لها غرضها وده اللي مش هاعمله

والصح بصراحة بقى علشان تتلم وتبطل اللي هى بتعمله في اخوات زوجي وفينا اننا كلنا نعمل كده علشان تحس انها هتبقى معزولة وهى اللي هتخسر لأنها مش هتكون موجودة في كل قعداتنا مش العكس

زائد اني بابلع الست دي بالعافية علشان زوجي والله لأنها مش عاوزة اخد من ذنوبها بس وافضل اعد لكم بتعمل ايه وتقول ايه

عامة

اشكر كل اللي ردوا عليا ربنا يكرمكم والله ما اتحرمش منكم وتقريبا كل وجهات نظرنا واحدة

ربنا يهدي الجميع

صباح الخير يا بنوتات وسيدات مصر

كيفكم ان شاء الله كلكم بخير وبلدكم بخير؟

الله يعينكم على زحمة السواااااااح السنه هذي حيكونو كثيييييير

اعذروني على التطفل بس حابه اسأل عن مستشفى خاص في القاهره في شارع محي الدين أبو العز

قالت لي عضوة معانا هنا بالمنتدى ان اسمها (( بودي ووتشر))

اللي عارفااها او تعرف رقم تليفونهم يا ليت تساعدني

ولكم مني جزيل الشكر والتقدير

اختكم

روشانا ازيك ايه اخبارك

أم ابيها صباح النور ده أحسن حل وريحي نفسك وربنا يقويكي