اختي انا عمري 35 وماتزوجت بس مااحد يخطبني واذا انخطبت مااعجبهم ومايردون وكل هالسنوات ماانخطبت كثير يمكن ثلاث او اربع مرات وهي بين مااعجبهم او يتصلون ويختفون
بس فعلاً احياناً افقد الأمل واحس اني ماراح اتزوج خصوصاً اشوف بنات بيني وبينهم 14و15سنة ومتزوجين واللي بعمري اعيالهم بثانوي دخلوا واحياناً اتجاهل الكلام القاسي اللي يوجه لي على اني اقسم بالله ابكي من داخلي يااللي يستهزأ فيني او اللي فاقد الامل اني اتزوج او اللي يسألونك ليش ماتزوجتي وانتي بهالعمر ؟! واشياء كثيره تحز بخاطري وانقهر بداخلي منها
انا بصراحة ممكن اوافق اتزوج متزوج بعد تفكير لان اعرف ناس تزوجوا ومتوفقين اذا انعرض علي ومافيه اي فرصة ثانية راح اوافق علشان مااحرج اهلي معي ولا اخليهم يشيلون همي ابويا الله يرحموا متوفى وانا عايشه ببيت اخويا مو بيتنا فصعبة موقفي ممكن يختلف عنكم اكتر بما اني يتيمة الأب وماعندي مصروف الا الضمان وحالتي المادية ولله الحمد ضعيفة يعني مااقدر ازعج احد او اكون عالة على احد
الله يوفقنا جميعاً ويارب يختار لنا الخيره ويوفقنا مع زوج صالح يعوضنا يارب ويكون سند لنا عاجلاً غير آجلاً وجميع بنات المسلمين اللهم آمين

مساء الخير ،
بصراحة عورني قلبي عليكن والحال من بعضه ،
لكن بجد بديت أفكر وأقف مع نفسي راح أرمي جميع العواطف والأماني والأحلام ، خلف ظهري ، صحيح مافيه وحده تتمنى فارس أحلامها يكون خلف ظهره زوجه وعيال ! لكن ليش ننظر من زاويه سلبيه !
ليش ماننظر من الناحية الإيجابية ، قبل كل شي اللي تقول مشاكل وجع رأس يابعدي ادخلي قسم المشاكل الأسرية فيه اللي يشيب الرأس وهن مومتزوج عليها زوجها اللي متمشكله معه واللي مع سلفتها واللي مع حمواتها واللي مع عمتها ! هذي الدنيا في كدر لا تتوقعون الحياة السعيدة دائماً ، ولا أجحد أن فيه زوجات ثانيات سعيدات ، مومعنى ان فلانه أساءة الأختيار وفشلة مع متزوج معناة الزواج منه معرض للفشل لا ، جارنا طيار ومتزوج ثنتين ولا يزورن بعض وعايشات عيشت الهناء الفرق ان الاولى دايم تنقد الثانية في المجالس وكلنا عارفين انها غيرانه منها وحاقده لكن نسلك لها ! الثانيه تعجبني شخصيتها مستحيل تتكلم في زوجته وعايشه حياتها ومستانسه وعرفة تستغل الفرصة لانها تزوجة وهي كبيرة !يعني نجاح الزواج من حسن الإختيار.
من الإجابيات :
1/ مملكه خاصه فيك .
2/ أبناء ...وهذا المهم .
3/ للغير موظفه مصرف ماتحتاجين أحد .
4/ هناك شي من الحرية في الخروج والدخول فضلاً عن حرية اللبس .
5/زوج ، ماراح أقول نصف زوج بل يوم يكون لزوجك ويوم لك توجبين الناس فيه او تخرجين بمعنى يوم لك بعيد عن الرجل .
السلبيات لو رفضت المتزوج :
1/ لان تضمنين تقدم غير المتزوج لك ،
ولا تقولين فلانه وعلانه ، مايحدث لزيد ليس بضروره يحدث لعبيد !
وهذا حنا نشوف البنات موناقصهن شي ومع هذا ماكتب ربي لهن الزواج ، في الوقت اللي قالت عضوه ان فيه بدويه ومن أصيبت في البهاق تزوجن !
2/ بلاش نعيش في حلم وشي ممكن مايصير أنه يتقدم لنا غير متزوج ، ومانصحى من هذا الحلم الا والعمرر راح ! وهذا انتم شايفين السنين تجري كيف وحنا نبارك لفلانه وعلانه !
3/ اللي متزوجه لا تتكلم عن الغير متزوجه
واللي مخلفه لا تتكلم عن الغير مخلفه
واللي صغيره لا تتكلم عن الكبيره .
كل وحده لها ظروف تختلف ،وكل وحده لها ثقافه او مجتمع يختلف عن الثانية ، كل وحده هنا تكتب رد وتقفل الجهاز ولا تدري عن ظروف اللي منزله الموضوع ولا حياتها في الوقت اللي هي بتكون مشغوله بزوجها وعائلتها ،
-------------------
طبعاً بقولكم موقف صار معي ، تقدم لي متزوجين ورفضتهم فقط لان فكر بعض الحريم اللي تحارب التعدد مأثر فيني وقلت لا ماأبيهم ، وأنا في نفسي أقول لوماكان بس متزوج !، وبعدين ايش صارا راحوا خطبوا اللي أحسن مني !!!
وحريمهم اللي كنت شايله همهن هن اللي اليوم يحشن فيني مع ان ماصدر مني شي غير ان أزواجهم خطبوني ! فتعلمت أن بعض الحريم الغيره ساريه بدمها لو انتي مافيك شي ، فقط شعور النقص يولد الغيره !
بعدها بفتره انقطاع الخطاب جاني خاطب ماأعرف زوجته وهلي كلهم يذكرونه بطيب ويقولون لي فرصه لاتضيعينها ، أخر شي توصلت له قلت لازم بموافقة زوجته واصريت ، قلت عشان أطلع بطله وماشاءالله علي ماقبلت الا برضاه ، ضحك علي الخاطب وع عقلي قال مين اللي تقبل زوجها يتزوج عليها !! والله لو ملاك بطلع فيه مليون عيب بس ماأحد يقبل فيه والعقيم وهي لها عمر ماتقبل زوجها يتزوج..!! وشعر ت انه يضحك ع تفكيري !! واليوم جاء يعزم هلي ع زواجة الثاني !
وأنا هذا أنا مقابله هذا المنتدى !!

مجتمعنا اناني حيرنا معه المتزوج ما منه أمان يمكن ما يعدل هذا ان عرف العدل
المطلق يمكن يتزوج عشان يحر الأولية و يرجع لها و يطلق الثانية ويحن قلبه عليها
الارمل يمكن عياله راعين مشاكل او ممكن تنصحينهم و يشتكون لابوهم قصص خيالية و كل يوم مشاكل
الأعزب زرعوا في راسة رقاقة كل يوم تأكد علية لازم تتزوج بنت في ال 20 و اقل و اذا كنت مضطر تتزوج من عمرك و جيلك لازم تكون موظفة
طبعا من واقع اللي أشوفة و الرجال لما يكون عنده عيال همه عيالة يدور من تخدمهم و حصل معي شخص مطلق ب6 و علنا عندهم شغالة بس يبي من تخدمهم
يعني هل البنت في ال30 خادمة او جارية او عبدة بيت ابوها أولى فيها معززة مكرم

الحمد الله ع كل حال
انا عمري 38 ما عمر احد خطبني لو بالكذب
الناس تدور الجمال طاح سوق الاخلاق في هذا الزمن
و التوقع لو تقدملي رجال متزوج اهلي راح يرضون
مع اني استبعد هذا الشي لان في عائلتنا كثير بنات فوق 40مو متزوجات و مصيري مثلهم
الحمد الله ع كل حال

انا مطلقه عمري فوق ال30 تطلقت بأبشع طريقه فيها ظلم وقهر للان ماقدرت أنساه كانه اليوم النتيجه حاليا اعاني من نفسيتي بشكل يزداد يوم بعد يوم صبرت لكن انفجرت ماقدرت اصبر أكثر اهلي ماعندهم شي اسمه سفر احس اني بسجن احس بكابه من حياتي اكثر وقتي هوشات معهم بسبب نفسيتي
الزواج ماافكر فيه نهائيا لان زواجي الاول سبب لي عقده أخلصت ووفيت وبالنهايه وش صار فلو تزوجت ماراح اخلص له لاني بخاف يصير لي مثل اول وماراح اثق باي رجل