المعروف بهالزمن ماله داعي ...!!!!!

السلام عليكم ..كيفكم خواتي ...
تعبانه نفسيتي هالايام من مشكله وياليت تقولون لي اللي سويته صح والا لا ...
أنا موجوده بديار الغربه وقبل فتره بالتحديد الصيف اللي راح نقلت لبيت جديد ...ولقيت بالمجمع وحده سعوديه وفرحت لان فيه من جنسيتي أتسلى معها ونتساعد على هالغربه ...المهم أنا عندي ثلاث أطفال وأدرس لغه ..وصديقتي هذي عندها أيضا ثلاث لكن عندها بنت كبيره 14 ماشاء الله ..أما أنا اطفالي صغار ...بالبدايه الامور تمام ...لكن بعد فتره بدت تشكي لي عن ظروفها وأنها هي اللي تسوق وتودي بنتها لمدرسه أسلاميه بعيده عن مكان سكنهم وأنها أيضا تصحى من النجمه علشان تنزل ولدها للمدرسه والصغير توديه لحاضنه علشان هي تروح تدرس ..وأنها تعبت من المشاوير ,ان طبيعه شغل زوجها مايسمح لها بمساعدتها ...
أنا زي ماقلت لكم عندي أطفال وصغار ورى بعض وأدرس نفس الشي مشاوير أصحى من بدري واودي الكبير للمدرسه والصغار للحضانه لما أرجع أخذهم وأنتظر الكبير يرجع مع الباص وأخذه ...
عمر ولدها الأاوسط أكبر بسنتين من ولدي ...ولدي 7 وهو 9 الحاصل أني من باب المعروف والناس لبعض قلت لها طيب ليش ماتحطين ولدك بالباص اذا السالفه كذا وتخففين على نفسك المشاوير ..واقتنعت بالفكره بعدها بفتره قالت أنها مايمديها تستنى الباص لما يجي يتأخر وهي لازم بنتها تكون بمدرستها الساعه 8 والباص يجي 8 وخمس دقايق .....رجعت قلت لها جيبيه عندي الصبح وأنا أنزله مع ولدي للباص ..وهذا اللي صار ... وصار حتى بطلعة الباص أحيانا تكون تأخرت مرجعت من مدرسه بنتها لما ترجع تاخذها وأنا أخذه معي للبيت مع عيالي لما تجي ,تاخذه ....
طول الترم الاول كذا جينا للترم هذا لكن الاختلاف أني حملت وأنا أنمرض بحملي ..وأطفالي صغار ولا أحد يساعد ...اللهم زوجي وهو ايضا الله يعينه يدرس دكتوراه ومشغول يسوي اللي يقدر عليه ..قالي المفروض تتعاون هالترم على العيال مره هي ومره انتي ...يعني مو كل مره بنقدر ظروفهم وهي ولاجابت خبر لظروفك ...
قلت ماعليه وشي طلعة الصبح ينتظر عشر دقايق ولدها عندها وبعدها اخذه مع ولدي للباص ...مع العلم انه مشاغب شوي ويدخل بكل مكان للبيت ..واقوله يرجع يجلس بالصاله لما يخلص ولدي فطور ..ومع ذلك كبرت عقلي وماقلت لصديقتي شئ وان المضايقات بدت تزيد منه ...جت فتره الوحام وصار بي صداع فظيع معرف اركز بالسواقه وصار زوجي يصحى ويوديهم للباص ويرجع ينام ..
الى الان تمام لكن رغم ظروف حملي وتعبي ودراستي وهي ماشاء الله عندها بنتها تساعدها وعمري ماطلبت مساعدتها بعيالي مره حاولت عندي موعد ضروري بالمستشفى ولقيتها طالعه ماحبيت أضايقها ..ومارحت موعدي ..
وهي لو تتأخر أو عندها مشوار مهم بعد المدرسه تقول بـاخر خوذي الولد يجلس عندك لما أرجع ...وصارت كثييير ..
يعني أعتمدت علي ولايهمها أن لولدها وقت يجي من المدرسه لازم تكون فيه تاخذه ..
يعني انا بالبدايه اوكي للضروره بس بعدين صارت السالفه تقريبا كل يوم وولدها الله يصلحه من النوع اللي يدخل المطبخ ويفتح الدروج اخذ على الوضع ويدخل غرفة النوم ..واقوله يرجع للصاله ومهو صغير اخاف يشوف شئ مني او يلاحظ شئانا مااحب احد يطمع بي ..والموقف الاخير اللي حصل ان الاولاد صار عندهم نصف يوم بالمدرسه يعني بيطلعون بدري وانا كنت على اساس اخذ عيالي وعندي موعد مهم بروحله والله مرات اطلع من محاضرات او اغيب علشانهم ..ذاك اليوم كلمتها وحطيت رساله قلت العيال بيطلعون بدري اذا ماعندك خبر ...ماردت ...لما جوا الصغار نزلت الولد عند بيتهم وقلت دق الباب يمكن يطلع احد انا لازم اروح ويطق مافي احد مع العلم انها هي وزوجها عندهم اجازه بهالاسبوع معقوله مافي احد ينتظر الولد بالبيت او مايدرون ان ولدهم بيطلع بدري من المدرسه..
كلمتها على الجوال قلت لها وينك العيال جو ماتدرين انهم بيطلعون بدري قالت لاوالله مادريت ماقالي ولدي ...قلت لها وينك انا عندي موعد لازم اطلع الان تعالي خوذيه ..قالت انا رايحه ازور وحده (يعني تزورين وحده وزوجك وينه وولدك اخر ماتفكرين به )قلت طيب وشلون الحين قالت برسله وحده تاخذه انا بعيده قلت لها طيب انا بنتظر ورحنا للبيت وتغدينا وتاخر موعدي وراح علي ..وبعدها اكلمها تقول ابوه بالطريق ويقول (لاحظوا)نزلي الولد عند باب بيتنا لما يجيه ياخذه ...انا انجنيت قلت لاماقدر خليه يجي للبيت ويطق ويطلع ولده .(وشلون انزل الولد وامشي ارحمه ...والله لو احد الجيران شافه لحاله ليكلمون الشرطه وديار الغربه ماترحم ..(طبعا هالكلام قلته بنفسي )
قالت وهي طفشانه كانها طيب بقوله ...وبعدها جاء ابوه وخذا ...
اللي حصل بعدها اهم مافي الموضوع كله ان زوجي اتصل وقال ليه مارحتي للموعد قلت كذا وكذا ولدهم اتاخر لما جو وخذه وراح الموعد حلف اني مالي شغل به ولاتودينه ولاتجيبينه ..اذا هم مهملين مو ذنبنا ..ومثل ماعندهم ظروف عندنا ..وانتي حامل محتاجه من يساعدك مو تحملك فوق طاقتك ..واللي قهره اكثر انها تقول ان زوجي يقول وصلوا الولد للبيت ..وش شايفك سواقه للولد ...
يعني بغيتي معروف انقلب لواجب عليك ..ولاتأسفت أو حتى قالت معليش على الموقف ..
وقسما بكيت من كلام زوجي لي الطيبه ماتنفع مو كل الناس تقدر معروفك وغلظ علي الايمان لو أدخل بخصوصيات روحة وجية ولد جارتي لصير شئ ماصار ...
وكلميها وعلميها اذا هي ذات اصل تقدر الموقف وتشكرك على اللي مضى ..وأذا غير كذا ماخسرتي شئ ..حتى لو تركت صداقتك اذا علشان مصلحتها مابها خير ...
وكلمتها وفهمتها ان صار بيني وبين زوجي مشكله بسبب موقف أمس ,انه حلف ماوديه ولا اجيبه ...وكل كلامها خير أن شاء الله ...خير أن شاء الله ...
حتى ماعتذرت او قالت أسفه اذا سببت مشكله بينكم ...كل اللي قالته من أي ناحيه يعني سبب ولدي مشكلتكم ..
مدري ماتفهمني والا ماتبي تفهم ....
انتهى الموضوع بس والله اني متضايقه ولا أدري وش راح يصير بعدها بتترك صداقتي أو ترجع عادي ...
هل غلطت يابنات ..أو هي غلطت علي .. أدري السالفه مالها داعي بس أنا حساسه ..وماأحب يصير كذا لي مواقف ماتعودت أجرح أحد ..رغم أني صريحه ,احب أقول الحقيقه ..بس الناس ماتفهم هالايام ..
وشكرا وتعبتكم معي ... :(