المغتربين الي عندهم اطفال يدرسون..افيدونا بتجاربكم وجهودكم معاهم اول شهور الدراسه

um joud :

لا تقلقي الاطفال حيتعلمو اللغة اسرررع من الكبار ماشاءالله بعد 6 شهور بالكثير لو كلمتيهم عربي حيردو عليك انجليش والاكسنت تبعهم حيكون افضل منك ومن ابوهم وراح يعدلو لكم النطق بس لاتغلطي غلطتي وتهملي تعليمهم العربي قراءة وكتابه انا عيالي اتأسسو من التمهيدي عدا الكبيرة من صف ثاني ابتدائي بدات الغربة والان صارت سادس ابتدائي عي واخواتها مايعرفو يكتبو ولا يقرأو للاسف والله يعين بعد الرجوع مم الغربة الحسنة الوحيدة الي عملتها فيهم اني حفظتهم القران جزء عم وتبارك والحمدلله نطقهم سليم لكن اذا تكلمو بالعامي القواعد ضاربة وتكليج على كيف كيفك وان شاءالله يتعدل بعد مانرجع لما يختلطو لكن مشكلتي الان اني لازم اعلمهم القراءة والكتابة والله يعيينني عليهم والحمدلله ماضطريت ادخلهم مدارس مسيحية ودخلتهم في البداية مدرسة اسلامية وللاسف طلع مذهبهم شيعي وخفت على عقيدتهم تتلخبط لانهم بداو يعلموهم يقولو ياعلي ياعلي 😒 المهم دخلتهم مدرسة حكومية والحمدلله عندهم حصة دين فقط احاديث وقصص انبياء ومفاهيم دينية بسيطة موفرتها لهم المدرسة للطلبة المسلمين وطبعا كلو بالانجليزي لانه المعلمة ماهي عربية لكن مسلمة

لا تقلقي الاطفال حيتعلمو اللغة اسرررع من الكبار ماشاءالله بعد 6 شهور بالكثير لو كلمتيهم عربي...

um joud :

طريقتي معاهم في القران يسمعموها في الايباد ويرددو خلف المقريء عندك برنامج عدنان ممتاز وكل واح يروح في غرفة او اي ركن مفضل عنده ويسمع ويردد مع نفسه واذا في كلمة صعبه عليهم يجوني اعلمهم نطقها او افهمهم معناها هم حيتعبوك مرات في حفظ السور الطويلة لانهم حيطلبوك تشرحي المعنى واذا مخ عيالك خلاص تبرمج بالانجليزي حتضطري تترجمي لهم او تبسيطي المعنى ومرات اذا عجزت اوصل لهم المعنى او يكون كبير على مستوى تفكيرهم اجبرهم يحفظو الاية زي ماهي طبعا الموضوع ماهو سهل فيه شوية مناحلة بس كله باجره ان شاءالله كل يوم بعد مايخلصو واجباتهم يروحو يحفظو السورة الي عليهم وفي الويك اند يجوني اختبرهم في التسميع والي يكون اتقن الحفظ له جايزة او امنيه او مشوار معايا طبعا انت ادرى باحتياجاتهم فاستغلي اي شي يحبوه واربطيه بالحفظ والي مايتقن الحفظ حينحرم من جائزته وخليك صارمة معاهم لانه التحفيظ الفردي اصعب مو زي التحفيظ الجماعي في المدرسة او دار التحفيظ فلازم تكوني صارمة في الموضوع ونفس الوقت طولي بالك واصبري ماوراك شي سورة سورة اية اية لحد مايحفظو والحفظ وهما صغار اسهل فلو فوتي الفرصة حيتعبوك لما ترجعي وتتراكم عليهم السور مرة وحدة وكل يوم وهم نايمين اشغل لهم السور الي حفظوها يرددها المقريء لحد مايصحو واخر كل شهر تسميع ماسبق والحمدلله قدرت احفظهم وامشيهم على المنهج زيهم زي الي في المدارس السعودية

طريقتي معاهم في القران يسمعموها في الايباد ويرددو خلف المقريء عندك برنامج عدنان ممتاز وكل واح...