السلام عليكم.. وصباحكم خير..

لي يومين عنكم..

يوم الاثنين حصل تتش بيني وبين زوجي..

والى اليوم ما نكلم بعض :(

ويوم الثلاثاء.. طبخت الغداء وتغديت مع بناتي لأن السامج ما يبي غدا..

على باله بيقهرني بهالحركة.. ما يدري اني تعودت عليها وما سارت تقهرني مثل اول..

وقررت انساه واركز على بناتي اللي دايم مهملتهم وانا على النت..

قعدت عندهم بالمقلط واخذت ممسحه وبخاخ قزاز وعود اسنان..ومخمخت على التلفزيون ومكتبته..فيها بقع حليب مستعصية..

وبعود الاسنان وانقش نقط حليب يابسة بفتحات التلفزيون اللي على جنب..


لما جا العصر سمحت لبناتي يطلعون للحوش.. اشكالهم لو شفتوها وهن يركظن يدورون شباشبهم وفرحانات..

ولما نامت الصغيره طلعت معهم.. وكان الجو مو مره حر..

وقررت اكنس الحوش.. بس خفت اطير عليهم الغبار.. فكنسته بمكنسة الكهرب خخخخخ

وفرغتها بعد ما خلصت..وغسلتها.. وانا قاعده اغسلها حسيت بانتعاش مع الماء..وقررت وطلع المسبح..

وجهزت ملابس السباحه حقت البنات واخذت اروابهن و المسبح وطلعت افاجئهم فيه..

وقعن يناقزن من الفرحة.. ودخلو يبدلون.. وانا نفخت المسبح وعبيته.. وجبت جوالي عشان اصورهن..

وهاتك يا بربسه ووناسه وتصوير.. وعرعره ..لولو تناظر يدينها المعرعره وتقول: ماما يدي خربانه!!

الحمد لله انبسطنا..:)


وبعدين لبستهم الارواب ودخلنا وروشتهم وسويت لهم حليب حار وساندوش جبن وانا كوب كبتشينو..ثم استشورتهم..

وطبعت لهم كم رسمه لدورا وموزو للتلوين.. استانسن عليها..

وجود كل شوي تظمني وتبوسني..وتقول: شكرا يا ماما على هذا اليوم الجميل..:)

ثم شبكت جوالي بالتلفزيون وقعدت استعرض الصور وهم يناظرون ويعلقون ويظحكون..

وبعد ما نامت جود روشت الصغيرة..ونامت لولو.. ثم عطيت الصغيره رضعتها ونامت..

وانا دخلت المطبخ اغسل اللي ينغسل وارتب..ثم مسحت مكتبة الصالة ومراية حمامي تكرمون..

ورتبت المقلط.. وعبيت الكماده ماء حار لأن الدوره علي.. وانسدحت عليها باصاله وقعدت افرفر بالتلفزيون..

وبعد ما جا بغلي..قلت: ما فيه دجاج..ولا عندنا زيت يكفي لقلي السمك!!! وش اسوي على الغدا؟

وهو بس هز راسه وهو يطقطق عالنت..<< ودي اصفقه

وسكت..ثم قلت: احط السمك بالثلاجه عشان يذوب والا كيف؟!!!!

وهو بس يهز راسه...ودي اكفخه تكفيخ اذا ما سرحت عنزه ابو عنز ذا:angry2:

واليوم قررت ادخل عليكم.. ما ادري ليه اذا جتني الدوره اكره النت!!!

وكرهته زود لأن له طرف باللي حصل بيننا..

وه بس..محتاره من هالغدا!!!! اخاف ما اسوي شي ويزيد الطين بله!!!

ولا ادري اذا يمدي السمك يذوب!!! يمكن اشويه بالفرن..مع انه ما يصلح للنوعيه اللي عندي!!

يالله يارب انك تهديه وتسخره لي.. تعقله وتخليه يجي يراضيني<<<<تحلم

مالي اي خلق للكتابه بس حبيت امسي عليكم ياناي كسل فضيييييييييييييييييييييع تدرون امس وانا اشكل الدونات شوي واصيح وانب نفيسي ليه عجنت دونات يالله بالحسره كملتها الصراحه يوم صرت كذا ابطلب كميات كبيره من الفطائر المجمده من حرمه واحطها بالفريز للرمضان الله يشرفه واطبخ علي خفيف انا 00
ناويه باذن الله اطلب من ام عبد العزيز كميه واطلب من حرمه ثانيه كبه وافرزنهم انا براحتي بعلب قصدير بس متي ربي يامرني بس انتظر اجمع من مصروفي خخخخ الي شهر سبعه واطلب كميه كبيره 00
ندو يومياتك روعه ووسعي البال يااختي الرجال كذا اذا خنفرو احنا يرتفع ضغطنا وهم مايدرون وخصوصي انتي عليك دودي خلاص الرجال يطنقر معها تقولين هو الي فيه كذا زوجي سبحان الله بدال مايحن علي ويرحمني يطنقر<<<خخخخ كنها قويه00
دلوعه اي انا مثلك اذا علي الدوره خذي وخلي من التعصيب والتكغيخ بولدي 0
ومشكوره علي الدعوه الجميله للقهوه خخخ افتحي الباب<<ماتنعطي وجه00
الباقين سلامي الحار ولاتزعلون اذا مارديت مو عدم اهتمام الا دوخه وثواب طاقني اعوذ بالله00

سأكون
والله ضحكت وبصوت عالي هههه بعد
بالنسبة للطماط تكشنين بصل كثير والافضل الطماط يكون مقطع مكعبات صغار وتكشنينها معه ..وتزيدينه(شوي موية )لازم يكون ثقيل..
واضيف له فلفل اخضر وبعدين يملح ويحط معه ماجي ابيض وفلفل اسود ..ويوكل بالخبز
بس زوجي ما يحب قشر الطماط عشان كذا اطحنه بعد ما اشيل القشر.. ويطلع لذيذ


ندى
الله يكون بعونك..بعض الرجال زعله اقشر..بس المشكلة الشرقي ما ينتراضى والا يزيد بالتزعل
الموضوع الي مزعله اذا هو معه حق ولو بسيط حاولي ما تعيدينه وتبينين له انك تدورين رضاه تراه يفيد
لكن اذا شي تحسينه مو من حقه حاولي تتناقشين معه باللين بوقت يكون مروق فيه
ويا عمري بناتك رحمتهم صاررت هالزعلة خيرة لهم !

مسااء الخير
اخبااركم اليوم ان شااء الله بخير
الباارح عقب مااطلعت من عندكم حطيت الشااهى لابوناا ورحت غرفة عياالى ورتبتهاا وشلت الالعااب المكسرة و نظفت المكيف من الغباار ومسحت طااولة التلفزيون و كنستهااا و رتبت فرشهم وخليتهاا تتهوى شوى قبل لايناامون
رحت وغسلت المكنسة ملياااانة غباار نظفتهاا زين وخليتهااا تنشف
غسلت حمام الرجااال
و رتبت المطبخ على السريع سهل شغلة لانى احاافظ علية اول باااول
و عقب تروشت ولبست بيجاامة ونمت على 2 مااشوف صحيت الفجر ارضع فهودى لقيت ابوناا مصحصح جلست معة شوى ورجعت اناام
هو تااخر مانام الا 9 يووووة اكرة تغير نومة
000
اليوم صحيت 11 افطرت انااا وفروخى و سويت كااس حليب
ومعمول تمر وتوست بالجبن
و غيرت لعياالى لبسهم صجنى حمودى الا يلبس هو واخوة بدل الريااضة
لبستهم
و قعدت على التلفزيون بروح اجهز الغداااء واشبك الغساالة عندى
اكوااااااام
و الليلة مااادرى اطلع من البيت والا اريح
على حسب اذاا امى فى البيت رحت عندهم
0000
ام دودى
الطرنج
توحمت علية بحمودى وكنت بالديرة وكاان زوجى يجيب لى منة من المزرعة متوفر بكميااات كبيرة
و الحين من حملت ونفسى فية بس من وين مالقينااا شى :p
000
جروحة
كنت عاارفة انك بتدوخين و ان الشغل ترااكم
الله يعطيك العاافية
000
ندى المطر
وى وى عسى مااشر علامكم
و اناا اقول ندى اعقل وحدة فينااا مااستفااد من الهوشة الا بنيااتك
بس اناا اللى اعرفة ان الشرقى ماايحب ان الزعل يطول
مشيهااا يااختى سولفى من بعيد لبعيد ونصيحة ظبطى الغدااء اى شى
عشاان ماايعصب زود 00 الله يسخرة لك و يجى يرااضيك ويجيبلك
ورد احمر ويعزمك بمطعم روماانسى قولى ااااميييييين 000 تحلم صح هههههههه
00
دلوعة بريدة
سلامتك اشربى قرفة ومااتشوفين شر
00
سااكون
بنشتااقلك ياادوبى اسبوع كاامل
00
البااقين اعذرونى بسرعة اكتب فهودى ازعجنى وابغى اروح اجهز الغدااء
فتوكو بعاافية :32:

عصر الخير
جرح.............ليش تضحكين على سأكون !!!
حتى أنا أول مره أشوف هالنبته!!!!
نفسي أذوقها شكلها غريب
ندى..........
الله يهدي سركم!!!
تدرين لي شهر أنا وأبو الشباب
نتصالح يومين ونتزاعل ثلاثه!!!!
مدري وش السالفه !!دمه ثقيييييييييييل؟؟
وضحكت من قلبي على(بغلي)
عشان كذا قررت أروح لأمي إسبوع لحد ما أروق
بغير جو
والديره سيوووول
لعل وعسى أرجع ونفسي وسيعه

فتوكو بعافيه كلكم
مستعجله بتحمم وأسشور ونتوكل على الله
كل شي جاهز وبيتي نظييف
أحبكم كللللللللللللللللللللللللللللللللللللككككككككككككككككم