المفتول

المفتول المقصود به الكسكسي لكن عنا بيسموه المفتول
راح اعلمكم اياه بطريقتنا كيف بنعمله زاكي كتير جربوه
وطريقتنا بتختلف شوي عن اللي بيسووها اهل المغرب لانه عنا خلطه خاصه بنضيفها للمفتول بتعطيه نكهه لكنها لذيذه جدااااا
امشوا معايا خطوه بخطوه .

المرق .....
محتاجين له
بصل مقطع شرحات + حمص حب + بندوره مو كثير حبتين ثلاثه مقطعين مكعبات + ملح وبهار نحن نستخدم لها الفلفل الاسود وماجي + قرع + دجاج + شوية ثوم مدقوق .
الان نغسل الدجاج عادي ونضعه على النار علشان نسلقه وبنزيل زفرته فقط لما تزيلوا زفرته طفوا عليه النار .
في طنجره ثانيه نقلب البصل على نار هاديه الى ان يذبل ولو كثرتم كمية البصل بيعطي نكهه لذيذه للمرق وبنضيف الطماطم وبنقلب بعدين بنضيف الدجاج اللي شلنا زفرته وبنملح وبنبهر وبنحط الماجي وماء الدجاج ودقة الثوم وبنخلي الدجاج يستوي على راحته .
في ناس بتحب تكثر طماطم ممكن تحطوا ملعقة صوص بندوره .
الان القرع ضيفيه قبل الاستواء بشوي علشان ما يستوي ويتفتت .
انا بالنسبه لي في طنجره صغيره بسلق القرع لوحده ولما يقرب يستوي بضيفه للمرق .
الان مرق المفتول عنا جاهز توقوه بده ملح زيدوا او بهار او ماجي حتلاقوا طعم لذيذ .

الان المفــــــــــتول ..........
احنا بنشتريه من السيفوي بيكون مجمد بالفريزير طبعا انتم فاهمين قصدي المفتول هو الكسكسي اللي بيكون حباته دائريه صغيره مثل الرز بينعمل .
الان بنفرغ الكميه اللي عنا بصينيه .........
وبنضيف عليها ماء مغلي شوي بنخليه تتشربه مع ملح وفلفل اسود
بعدين بنجيب طنجرة الكسكسي اللي بتكون من جزاين وبتطبخ الكسكسي فيها على البخار
نضع شوية ماء في الجزا السفلي والمفتول بنخليه يستوي على بخار الماء حطوله للمفتول شوية حمص حب وفلفل اسود وذوقوا ملحه بده ملح ولا لا
وكل شوي ضيفوله ماء مغلي عبال ما يستوي لا تخلوه يخبص ......

الان في خلطه خاصه لهذا المفتول قبل الاستواء بشوي بنضيفها عليه واللي هي عباره عن

بصله مبرووووشه ناعم + شوية فلفل حراق بس شيلوا الابيض اللي بيحرق اللي جواه يعني قطعوا شوي من راسه للفلفل + ثوم مدقوق + عين جراده بتلاقوها بالسيفوي بتكون مثل اليانسون حبتها بتعطي نكهه جنان للمفتول + كمون + القليل من الملح + زيت زيتون .

بندق الثوم وعين الجراده والفلفل وبنضيف البصله المبروشه وبنحركها معاهم
وبنحط الكمون والملح وبنجيب زيت زيتون بنخليه يغطي هالخلطه وبنخلطه معاهم لو كثرتم زيت زيتون ما فيها شي ....

الان قبل لا يستوي المفتول بشوي بفتح حفره بالوسط وبحط هالدقه اللي فيها زيت الزيتون معاه
وبغطيها وبعد شوي بخلطه منيح كثير عشان هالخلطه تختلط معاه للمفتول .

الان استوى المفتول
والمرق جاهز بشيل الدجاج من المرق وبشويه عشان يتحمر من فوق بولع النار عليه عشان يتحمر

بجيب صينية التقديم بحط المفتول وبوزع الدجاج اللي تحمر فوقه وبشيل من المرق شوية قرع وحمص حب بوزعه على الوجه

وبصب المرق في صحن ثاني والف صحه وهنااااااااااا
على فكره بتبان صعبه لكن والله انا بسويها بساعه واقل من ساعه هالطبخه
ما بتاخد معي وقت ابدااااااا
جربوها والف صحه وهنا واي سؤال انا حاضره .