المقابلة الشخصية( لوظيفة معيده بقسم المحاسبة)

السلام عليكم ..

موفقة يارب يا حلا ..

اول شي ربي يوفقك
يمكن ماعندي فكرة عن المحاسبة بشكل خاص لكن بتكلم لك من خبرتي بمقابلات الجامعة بشكل عام بمختلف التخصصات
راح يطلبون منك سيرتك الذاتية مختصرة حاولي تسلطين فيها على المختصر المفيد واذكري الدورات اللي اخذتيها اوالخبرات العملية لانها تهمهم كثير ولو ماكان لها علاقة بالمحاسبة

رح يسألونك عن اسلوبك في التعامل مع طالباتك وكيف لو صار لك موقف معين كيف تحلينه :
رح يعطونك موقف محدد ويطلبون الحل او تصرفك من هالناحية

ممكن يسألونك عن ثقافتك بشكل عام يعني وش تقرين ووش ماتقرين وحاولي ترتبين نفسك على هالاساس تذكري كتب معينة ومؤلفينها من قبل لانك تنلخمين وقت ماتدخلين
خليك مررره ريلاكس وواثقة من نفسك جدا حتى يدينك وانتي تتكلمين لاتستخدمينها لان بعضهم يفسرها نوع من انواع التوتر

لوانتي متزوجة مثلا بيسألونك عن تعاملك مع اطفالك والخدم وغيرها
ممكن يسألون احيانا عن معنى اسمك لوكان غريب نوعا ما
ممكن يسألونك عن وجهة نظرك بقضية معينة او بحديث الساعة
حاولي تقرين الجريدة قبل تروحين لان يجي فيها اخبار مهمة احيانا قد تفيدك
لان ممكن تقولك مثلا وش اخر واهم حدث صار بلبنان امس؟؟ يكون وقتها فيه تفجير لازم يكون عندك خلفية عن هالموضوع
لوكنتي ماتعرفين لاترقعين قولي ماعندي فكرة وخلاص لانهم ينشبون لك لين يبينون لك انك ماتدرين وش السالفة

ويمكن يسألونك ليش دخلتي محاسبة ووش سبب تفوقك وليش حبيتي الاعادة
ويكون لبسك ومكياجك مرتب ونعوم يعني شي وسط
هذي تقريبا اللي جت بباااالي وانتي ادعي ربك قبل تدخلين وربي يوفقك وعاد طمنيني وش يصير عليك لاتنسين ياويلك :)

الله يوفق الجميع اختي الأصيل شاكره لك تعاونك :)


اختي ضايق صدري عسى الله يوفقك ويسعد قلبك
تسلمين لي يالغاليه وان شاء الله ربي يقدرني ويبعد عني الإرتباك
كثير خايفه من الموقف واتمنى ان يمشي على خير
لأن توي متخرجه بعام 2005مـ ماقد مريت بهالموقف
ولا عندي خبرات عمليه :(

وابشري يالغاليه اول مااخلص وارجع البيت احكيلك بالتفصيل شاللي صار معي :)


سلامي لكم ..
حــلا

تمت ولله الحمد المقابله :)

جيت اطمنك اختي ضايق صدري على اللي صار..

كان نقاش عادي حسيت انه اختبار شخصيه وجهولي اسئله عامه
وكان منها ثلاث اسئله من اللي قلتيها لي :)
اول مادخلت قالولي عندك وقت اذا تحبي تعرفينا عن نفسك
سبب اختياري للمحاسبه وايش استفدت منها
بعدين سألوني عن الماجستير اذا حابه اكمله والا لا
وليش اخترت انى اكون معيده وكيف راح اتعامل مع الطالبات
وكيف قرأتي بصفه عامه وبصفة خاصه في مجال تخصصي
وايش اخر كتاب قرأته وايش سبب قرأتي له
ايش الأشياء اللي تميزني ويخليني اشوف في نفسي قدره على الإعاده
ايش هو دوري بالحياه / طموحي / هوايتي
كيف تعاملي مع صديقاتي - خبراتي العمليه
اثناء مرحلتي الجامعيه كان لي غياب عن المحاضرات / او تأخير في تسليم الواجبات
تغيب في ايام الإختبارات او تقديم طلب تأجيل
ايش هو سبب انتظامي في المرحله الجامعيه
واخر سؤال ايش هو مدى ثقتي بنفسي...

لا حرمني الله منك يالغاليه افادني ردك علي كثير :)


اختك / حــلا

حبيبتي حلا
يبعد عمري انتي والله ماسويت شي
والحمدلله جاك شي من اللي قلته
وصدقيني انتي تكونين شايله هم مرررررررررا بس بالاخير لما تخلصين تقوليني والله اني سخيفة صدق مكبره الموضوع وهو مايستاهل اصلا
ويله ان شاء الله موفقه يالغالية وبشريني عاد على نتيجتك هالمرررره
<----غثتك بس متحمسه معاك مرررا
يلا ونصير زميلات عمل :)

وامريني ياقلبي اي شي تبينه انا بالخدمة وتحياتي لك