المقبلات على الولاده وخصوصا البكريات

الولاده هاجس لكل الحوامل خصوصا البكريات
لذالك حبيت اوضح نقاط ممكن تساعدكم وتفيدكم

وراح ابداء على شكل نقاط بالتسلسل

اولا الكشف من تحت

من كلمة كشف يجيني احساس بالخوف وتنومت مره وكنت اسمع الحريم انواع الصراخ من الكشف وخفت وافكر اذا جاء دوري ايش راح يصير

الواقع

هي ماراح تدخل يدها كامله حسب ماتوهمت ولاراح تدخل اصبعين او ثلاثه كلها اصبع واحد ومع استخدام جل مابتحسين فيه بس لما يوصل الاصبع بناء على الاتساع عندك اذا اثنين او واحد يمكن تعمل تحريض وتضغط وتحرك اصبعها عشان توسعك وهذا الي يسبب الم بسيط بس اذا كان مفتوح اربعه ومافوق ماراح تحسي بالم كثير بيكون خفيف ومحتمل

الكشف يتكرر عشان يتاكدون انه وصل 10 سانتي
وانتي من قوة الطلق ولانك تبينه يوصل عشره كل شوي بتنادينهم تعالوا شوفوا كم وصل


ثانيا
مرحلة الولاده وقبل ما ابداء فيها اذكركم بالادعيه لاتنسونها وسورة الزلزله لان لهم اثر عجيب في تسيهل الولاده
الان نجي للمرحله
بمجرد مايكون انفتح الرحم عشره سانتي تلقائيا يجيك شعور وكان فيك امساك ودك تدفعين غصب عنك اذا جتك الحاله هذي سمي وتوكلي على الله وابدي دفع واكتمي صوتك واذا هدت خذي نفس استعدي لدفعه الثانيه اشفطي هواء كثير عشان تقدرين تكتمين وتدفعين بقوه ويدينك امسكي بها الحلقه الي بالسرير واذا مو موجوده امسكي وركك واضغطي كنك بتجلسين وادفعي وباذن الله يطلع الراس وبعده يتزحلق الجسم بكل سهوله

بالنسبه لشق منطقة العجان الي هو توسيع توقعت اني راح احس فيها وهي تقص لكن هي ماتقص الا والراس قريب وضاغط وماراح تحسي ابدا بالقص

الاحساس بيكون بالخياطه بس تذكري وقتها ان النونو طلع خلاص وتحملي كم غرزه انا كنت احس ببعض الغرز والبعض ماحسيت فيه تقريبا نص ساعه وخلصت خياطه ولازم تسالي وش نوع خيوطك الي تذوب او خيوط بتطيح او تحتاج دكتوره تفكها

العنايه بجرح الولاده
هذا كل مانحتاجه
مويه وملح تستخدم ثلاث مرات تنقيع من اول ماتولدين انا شخصيا بالمستسفى اعطوني طاسه والملح كيس مليان بدورة المياه كل شوي يجوني يقولون روحي مويه وملح بس ماكنت اروح يمكن سويته عندهم مرتين وبالبيت يمكن 6مرات ايام متفرقه وكانت النتيجه خيوطي تاخرت ماطاحت المويه والملح كويسه للخيط تنشفه ويطيح
الخلاصه التزمي فيه ثلاث مرات يوميا مع مراعاة يكون الملح خشن

مرهم ميبو وريالوكين
مرهم ميبو حلو مره يساعد على التئام الجرح ومرهم ريالوكين يخدر منطقة الجرح يخفف الالم بس يحرق شوي ويخف
ممكن تستخدمينها بالتناوب او عند الحاجه بالنسبه لمرهم التخدير اذا احتجتي استخدميه

خلطة زيت الزيتون.. كوبين زيت زيتون مع نص كوب خوا جوا مطحون وفنجان مره وصبره وحلتيته تطبخ مع الزيت ويوضع الخوا جوا اخر شي وانتبهوا ترى ريحتها ولونها مره قوي عبيها بعلبه قزاز وبشاش نظيف مرري على الجرح يريحك ومايجيك شمم

مويه ومطهر اختاري المطهر الي يناسبك انا استخدم الديتول الاخضر مقدار الغطاء بمويه واتشطف
واستخدم بيتادين بدون تخفيف مسح على الجرح

بعد عشرين يوم

يجي دور التهويه
حاولي تعرضين المنطقه لتهويه لان الرطوبه الزياده مو لصالحها
وانتبهي لايجيك امساك عشان ماتتالمين وقت قضاء حاجتك


اتمنى لكل من قراءت خلاصة تجربتي تدعي لي