المكرونة بالباشميل الخاصة بروعة بإحساسي واللي صرت مشهورة فيها ..

حبييت أنزلكم طريقة مكرونتي بالباشميل الخاصة فيني واللي ما قد صارت جمعة أو عشوة إلا خلوني أتكفل بالمكرونة بالباشميل لإني صرت مشهورة فيها >>>>تمدح نفسها
والطريقة مرررررة سهلة ولذيييييييذة

1- تسلقين المكرونة في حليب وششششوية بهارات وهذا اول سر في المكرونة
2- تغسلين اللحم المفروم بموية حارة وتسوين كشنة وتحطين اللحم عليها وتقلبينه شوي وتحطين عليها كأس موية مذوبة فيه صلصة وتضيفين مكعب مرقة ماجي وبهارات وفلفل أخضر مقطع مكعبات وتفرمين كزبرة وتحطينها عليها وكمان ثوم مهروس وتخلينه لحد ماتنشف مويته وترفعينه من على النار

3 - تسوين الباشميل وهو عبارة عن ثلاث ملاعق مليانه دقيق تحطينها على ربع كاسة زيت في قدر وتحركينها لحد ما تمتزج مع بعض بعدها تحطين عليها كاستين حليب سايل وتخلطيها بالمظرب اليدوي السلك عشان ما تتكتل معاك وتضيفين ربع كاسة موية مذوبة فيها مكعب ماجي وكمان شوية بهارات وملح حسب الرغبة وتخلطيها لحد ما تثقل وترفعيها من على النار وتضيفين عليها ملعقتين جبنة سايلة وملعقتين مايونيز وتخلطيها لحد ما تتجانس

4- تحطي تلات أرباع كمية الباشميل على المكرونة المسلوقة وتخلطيها وتصفي نصف المكرونة في الصينية .
5- تحطين الللحم المفروم على المكرونة في الصينية
6- تضيفين باقي المكرونة في الصينية وتغطيها من فوق بالباشميل الباقي


7- ترشين الوجة بجبنة موزريلا وتدخليها الفرن لحد ماتتحمر


وهذا شكلها بعد ما خرجتها من الفرن يمممم الشكل روعة والطعم جنان والريحة تدوخ


والله يا بنات إنها تجننن بشهادة الكل واللي تسويها وتعجبها تدعيلي بالسعادة والتوفيق والذرية الصالحة
واللي تجربها وتزبط معاها تقولي
وبالعافية عليكم ..
محبتكم
روعة بإحساسي