جينا لرأي تالت ..

انا اشتري الجاكتات من السعودية خاصة من جدة لانه محد يستعملها واخرتها اخد الجاكيت على 70 ريال وحق اولادي على 30 و20 ريال..

وباقي الاشياء من هنا كله من هنا لحد الشراريب والقفازات والقبعات كله من هنا..

البجامات الداخلية عمري مالقيتها في السعودية لاني اروح في الصيف ..

التدفئة تكون مركزية وفاتورة تقص الضهر..لكن تسوي جفاف غير طبيعي يعني انا احطها على 70 واحيان 80 وفي الليل اطفيها ما اقدر انام والهيت شغال اقوم مخنوقة..

عشان كدا نحتاج اغطية كتيرة وبرضه من هنا اشتريها ..في ناس يجيبو معاهم بطانيات مورا لكن انا ما اقدر بالله ايش اجيب معايا بطانيات وزن زي الناس..

في بيجامات للاطفال سميكة مرة تكون كاملة تلبسيها للطفل وتنامي وانت بالك مرتاح..

الاشياء اليي تحتاجيها ..بهارات وقهوة وهيل ...الهيل مستحيل نلاقيه هنا حتى البن العربي حقنا غير موجود ابدا في ولايتنا..

اذا انت من عشاق الاجبان جيبي لك شوية خاصة اذا مافي محلات عربية في المدينة اليي رايحتها..

والله انا اجيب قرنبع قد راسي واكبر كمان ..اذا تبغي تعرفيه وعندك وقت تقرأي قوليلي ومن عيني دي قبل دي,,

بس بحكم ولايتنا الصغيرة اضطر اجيب اشياء كتير غيري مايجيبها..

الله يوفقكم ويسهل عليكم السفر..

معليش نسيت اقولك ..تحتاجي تنانير طويلة لانها غير متوفرة هنا بكثرة ..

جزاكن الله خيرا يا أخواتي على إجاباتكن أختي حمرة الورد ياريت تزوديني بمزيد من المعلومات والجاكيتات من جدة من فين تلاقيها؟
أختي أمل الروح قولي كل ما عندك
والله يجزيكن خيرا
أم عمر

معليش على التأخير..

شوفي اذا انت تعرفي جدة زي الناس تلاقي الجاكتات التقيلة والسميكة في سوق كان جنب سوق المينا ..وتلاقيها على اسعار 100 و150 بس لما زوجك يفاصل معاهم يخفضو الين 70 واحيان اذا الكاجيت طويل مايرضو ينزلوه عن 80 المهم لانه مافي احد ياخد منهم يقومو يمشوها..

رحت قبل سنتين لقيت السوق بدأ يقفل وحطو مكانه سوق جديد وكنت محتاجة جاكيت نسائي لوحدة من الاهل رايحة كندا والحمد لله لقيت واحد مرة حلو ..لكن دحين مدري ايش صار في السوق..

كان اول ماتوصلي دوار المينا على اليمين ..

كمان في سوق الكندرا في الشتا تنزل اشياء كأنها لسكان الاسكيمو..وفي سوق في مكة اسمه العتيبية كمان تلاقي فيه دي الاشياء..

وفي المدينة جنب الحرم تلاقي الجاكتات لكن بس في الشتا.. اخدنا لولدي وهو صغير من هناك ..

باختصار في الاسواق الشعبية في الشتا تلاقي ملابس ثقيلة مرة ومحد يحتاجها..

لكن زي ماقلت لك الباقي من هنا ..قفازات وقبعات وابوات طويلة ..الحمد لله كل شي متوفر .. كمان التخفيضات تريح الواحد تاخدي الشي بنص السعر او اقل ..


الله يوفقكم ويسهل عليكم السفر ..

لو تلاقي وحدة في نفس الولاية اليي انتي رايحة لها تفيدك اكتر..

في موضوع اسمه اعترفو في بعض العضوات كاتبين اماكن اقامتهم بالضبط ان شاء الله احط لك الرابط..