السلام عليكم
قبل كل شي ابقوووووووولكم ان هالسالفه من خيالي
وابوي وامي ارفع من اني اقول عنهم ماقلت بالموضوع
الموضوع
طق طق طق على الباب: وجععععععع من اللي جاينا هالحزه>> اهوجس
فتحت الباب وياليتني مافتحت..
اللي اتذكره اني شفت زول اسود همن شفت براطم وامممممممطخ وانواع السعابيل
وبعد مااستوعبت ان اللي دق الباب جارتنا ام رمضان >>> مب رمضان الشهر>>احلفي
وايقنت ان اللحظات اللي عشتها قبل شوي كانت عبارة عن تمطيخ من قبل ام رمضان يقالي مشتاقه
مسحت سعابيلها اللي بخدودي بكُم قميصي>>> ياعيني على النظافه
وقلت: ياهلا بام رمضان.. اوقفي بالباب الين انادي امي>>>الله من زين الاستقبال
واتجهت لم الصاله حيث كانت امي تليّن=تاخذ قيلولتها وقلت: يمه يمه يمه يمه يمه جارتنا ام رمضان بالباب تبيتس
راحت امي لها ودخلوا المجلس وصكوا على نفسهم وانا كأي بنت بريئه لزقت اذني بالباب اتسمع وش يقولون
امي: هذي الساعة المباركه اللي شفناتس فيهااا ياام رمضان.. بس وراه جايتن بدون موعد!! عسى ماشر؟؟؟
>>>>>>>>>>>> ياحليل امي تدق بس بذوووق :13:
ام رمضان: ماشر يوخيتي وحنا جيران وحبايب ومابينا مجاملات ومواعيد هماه؟ عاد انا قلت اسيّر عليتس واشرب معتس فنجال قهوه ونسولف>>>> تلمّح وين القهوه..
عاد انتم شلونكم شخباركم شلون عييلتس وبنيتس المزيونه؟
انا سمعت كلمة مزيونه وابدأ اهوجس .. امي مالها بنت غيري لا يكون متزوجه على ابوي من ورانا وعندها بنت من زوجها الثاني>>>>> الله ياخذتس على هاالتفكير
قالت امي: قصدتس الملوسنه؟ >>>>>> امي بعد استغربت
ام رمضان: وانتي عندتس غيرها؟
امي: الحمدلله! ماغير تاكل وتنام وتلزّق عند الدش ..﴿حست امي انها خبصت بالكلام وتبي تصلّح كلامها) وقالت: ياعمري عليها مقطعه نفسها تقطيع بالمذاكره وشغل البيت طبخ وكنس وشطف شايلتن البيت كله فوق راسها
ام رمضان: ياحبيلها.. وانا ولدي رمضان يبي يكمل نص دينه ويعرس ومالقينا احسن من بنتس الملوسنه
>>>>انا كذا صار وجهي
امي: هذي والله الساعة المباركه مهب لاقين احسن من ولدتس رمضان ..بس ابشاور البنت وابوها ونرد عليكم ان شاء الله
انا من بعد هالكلام ماصرت اسمع شي ولا ادري وش قالوا:23:
دخلت حجرتي ابي هدووووووء وجبت لي خبز حار وشاهي وحزمة كراث وآآه آآآه انا حروفي في غيابك لاهي حكي ولاهي قصيد >>>>>> كناية عن الرومانسيه
واسترجعت شريط الذكريات واتذكر ملامح رمضان ولد ام رمضان
صحيح ان شعره عراده وماعمره تروش وعيونه متطاقات>> كناية عن الحول
وصحيح انه قصير يالله ياصل 150 وبالواسطه.. وصحيح انه دب وغبي ومايعرف يتكلم ومحد يحبه ومحد يطيقه بس ولوو مايمنع انه رجل وسيم والف بنت تتمناه
بعد التتنيح والتفكير نزلت الصاله وجلست قدام امي ابيها تفاتحني بالموضوع
بس ماااش ساكته قلت يمكن تحتري ابوي يجي وتاخذ رايه قبل
عاد انا دقيت على ابوي استعجله يجي >>>>> ياشين اللي مابقلبهم صبر:23:
طووووووط طوووووط
ابوي: الوووو
انا: هلا يبه وينك فيه؟ تراك طولت متى تجي؟
ابوي: ليه وش فيه؟
انا: لامافيه شي بس اشتقت لك >>>>> ابووووك يالسبب
ابوي: اقول اهرجي زين >>>>> ابد مايبي يربيني عالدلع والمياعه
انا: جب لي معك قلم ازرق جاف.. قلمي خلص وباحل الواجب
ابوي: طيب ساعة بالكثير واجي
انا: لا كثيررررررررررررر ساعه
ابوي: خلاص يابنت قلت لتس ساعه ويالله مع السلامه
وقفل الخط
وبعد ساعة من الانتظار والهواجيس المخلوطه باحلام اليقظه
جاء ابوي وانا عشان افتح المجال واعطي امي فرصه انها تفاتح ابوي بالموضوع اخذت اخواني الصغار وقلت وش رايكم نلعب واحد طش وانا اللي ادوركم وراحوا يتغبون وانا طلعت لغرفتي اكمل هواجيس>>>احلى تصريفه للبزارين
وبعد شوي دخل علي ابوي وعلى ملامحه قلق وخوف وانا استنتجت انه مب مصدق او مب مستوعب ان الشيفه بنته بتتزوج .. جلس ابوي جنبي وصار يتنحنح ويسولف وينكت ويضحك
عاد انا قلت بنفسي: ايه هذي الفرحه وماتسوي
بس عاد مليت من سواليف ابوي وابيه يفاتحني بالموضوع
فقلت: يبه خير وش عندك جايني الغرفه وتسولف؟ اذا تبي سلف عادي قل! ماعندك الا اختك>>>>الله من زين الهرج.. قال اختك قال
ابوي: لا مهب هذا اللي ابيتس فيه..بس الموضوع اللي قلتيه تو نتكلم فيه بعدين >>>مايبي يضيع هالفرص
وقال: يابنيتي كل بنت مصيرها تتزوج يوم من الايام ويصير عندها بيت وعيال
قلت: ايه ادري >>>> يعني اخلص هات من الاخر
ابوي: واليوم ام رمضان خطبتس لولدها رمضان صحيح ان مامعه الا الابتدائيه..بس الولد عنده طموح ووده انه ياخذ الدكتوراه>>>>>>> ابئى آآبلني لو اخذ اولى متوسط
وصحيح ان ماعنده بيت وبيسكنتس مع اهله بغرفه صغيره والحمام مشترك بس كلها كم طعش سنه ويطلع له بيت وتعيشون لحالكم >>> هذي مووت ياحمار
وصحيح ان .............
عاد انا سكككت ابوي بكحه مفتعله مني مابيه يجلس يجرّح ويسب بزوج المستقبل ويشوه الصورة الجميله اللي رسمتها له بخيالي >>>>> امداتس رسمتي الصورة خخخخخخ
سكت ابوي وخيم الصمت على المكان عاد انا تذكرت وش يسسوون بالمسلسلات لا انخطبوا ونزلت راسي يقالي مستحيه
قال ابوي: هاه؟ موافقه؟
وانا ساكته ومنزلتن راسي
قال ابوي: ارفعي راستس يابنيتي وقولي موافقه والا لا؟؟
عاد هنا رفعت راسي وقلت بكل حياء واستحياء: يبه خلاص!! السكوت علامة الرضا>>>>>>ابوووك يالحيا
ابوي ناظرني وشكله يقول هالبنت مهب لم زواج بتفضحنا عند الرجال واهله
عاد انا قلت: يبه عاد متى بيشوفني؟؟
قال ابوي: ووووووشووووو؟؟ من بيشوفتس؟
قلت: وش فيك يبه؟ هذي الشوفه الشرعيه..
ونزلت راسي من الحيا>>الله ياخذك ياهالحيا
قال: مدري عاد هذي يبيلها تفكير >>>> مايبي يقول مانبيه يشوفتس عشان لايهوّن ..احتراما لمشاعري >>>كن عندي مشاعر اصلا
طلع ابوي وجلست لحالي ورجعت الهواجيس والتفكير وجبت الوان خشبيه عشان الوّن صورة رمضان فارس الاحلام اللي راسمتها له بخيالي
ومن بكره قمت بدري سويت فطور لخواني وقلت لهم ترى انا اللي باسوي الغدا بس قولي وش مشتهين>>>ابتسنع
وفكيت الجديلتين وصرت اسوي جديله وحدة >>>> احلى ياللي بتغير الستايل
وكل ماقالوا خواني تعالي العبي معنا قلت: خير ان شاء الله؟هش يالله يالله مابقى الاذي >>>بزعمي خلاص صرت حرمه :cook:
واخوي ينكت علي ويقول: اول مرة اشوف حرمه بشنب
وانقهرت مرة يوم سمعته يقول لامي: هذا وجهي ان مارجعت.. هذي اصلا مب اشكال تزوجونها
بس سويت نفسي ماسمعت عشان لااجرح مشاعري >>>احلفي
من بكره واشوف اهلي مكتمين ومحزنين وحالتهم حاله عاد انا قلت لهم :خير وشبكم؟ مافيه شي يستاهل هالحزن؟
قالت امي: المعرس مصمم الا الا يبي يشوفتس قبل الزواج
قلت: افاااياذا العلم .. اذا كذا بعذركم تحزنون وتلبسون اسود بعد.. وش السوات يمه؟
قالت: مافيه الا انا نجيب لبنانيه نخليها بالواجهه
قلت: يمه تبيني ابدأ حياتي مع رمضان بكذبه.. لأ مقدرش ده صعب اوي >>>ماتركب بلهجتنا
قالت: ياتسذا يامابوه عرس
قلت: لاااااا كله الا العرس.. بس وش رايتس من نجيب؟ نتالي معماري والا هيفاء وهبي؟
قالت: اقووول بس اسكتي وخليني اعرف افكر
وبعد التفكير قلنا مالنا الا رمضان يشوف خشتي لانه كذا والا كذا بيشوفها يعني اصيرعانس ولا ارجع لاهلي مطلقه >>> كذا امي شرحتها لي
بس تصدقون اني تخيلت نفسي بفلم مصري وراجعه لبيت اهلي مطلقه ومعايا حتت عيّل
>>>>>>>>>>>>>>ياشين القرويه لا تاثرت بالمسلسلات
وجا اليوووووووووووووم وانواع الرجه بالبيت تصدقون اني تروشت ثلاث مرات لاني كل مااطلع من الحمام انحف شوي ويبيان خصري اثر عندي خصر مثلي مثل كل البنات >>> بلاه من الوسخ المتراكم>>الله يحوم تسبدتس
وووووووجت اللحظه الحاسمه وجا ابوي وقال: يالله الرجال يحتريتس؟
قلت: منهو؟ اي الرجال؟ >>>>>> ياشين اللي بيسوون نفسهم مايعرفون
قال: المعرس بعد منهووو؟
قلت: معرس لمين؟ >>>> هالمره مب استهبال بس ابيه يقولها ابي اتاكد اني منيب احلم
قال ابوي: هوووووهوووووو علينا.. شكلي باهون
قلت: لا خلاص.. رح اجلس عند الرجال عيب نخليه لحاله وانا بتطمن على شوشتي وخشتي وجايه وراك
وكان باب المجلس مطرف وانا اللي اوايدز عليهم والمح اقبح مخلوق شفته بحياتي
خنقتني العبره وحامت تسبدي شوي بس بعدين تذكرت ورحت ناظرت شكلي بالمرايا عشان اتقبل شكله>>>>>> خطه سريعة المفعول
دقيت الباب عليهم وقلت: يبه عندك احد؟ >>>>> لاياشيخه
دخلت وانا اسوي نفسي اكح واعاطس واتثاوب بقصد اني اقدر احط ايدي على وجهي عشان لايتمقل بملامح خشتي الموقره ويهون.. وطول منيب جالسه على ذاالحال
وشكلي طولت وانا قاعده لان ابوي قال: طسي يابنيتي عاوني امتس بالمطبخ تراه ماتدبر شي دونتس >>>>> مايعرف يصرف والا يمكن بيعلم المعرس اني قرمه وراعية بيت
قلت: ان شاء الله يبه ........... وطلعت
بعدها بكم يوم وانا متربعه بالعش الزوجيه وعشنا في سبات ونبات وخلفنا صبيان وبنات كانوا مثال حي للقبح والدلاخه بس ولو مايمنع انهم اطفال ابرياء مالهم ذنب ان جينات شيون اتحدت وانتجتهم
لكن يافرحة ماتمت والباب اللي يجيك منه الريح سده واستريح>>>جابت العيد بذا المثل
عيال الحرام كانوا لنا ولسعادة بيتنا بالمرصاد وضحكوا على عقل رمضان واسحبوه معهم لحياة الدشرة وصار يسهر بره البيت ولا يرجع الا بانصاص الليول واحيانا يجيني سكران ويحشش قدامي ويقولي هذا دواء وانا على نياتي اصدق ..
ومع الوقت حسيت انه من جد تغير وماصار يلعب مع شعبان وشوال وربيع ثاني >>>ذولا عيالنا ..وذي القعده وذي الحجه>>عاد ذولا بناتنا
وجت الطامه الكبرى وامسكوه يتاجر بالمخدرات واحكموا عليه مؤبد بعدين خففوا الحكم وعطوه اعدام
>> قد سمعت ان الاعدام اهون من المؤبد بحكم ان المؤبد عذاب نفسي وحسي وجسدي عكس الاعدام يقطعون راسه وانتهينا>>>>> يحلفون ان بهالبنت عرق ارهابي
وياليت الامور وصلت لين هنا واهجدت.. لا..
مرة جونا جماعه الرفق بالحيوان وقالوا لي انتي تعذبين وتسيئين التعامل مع الحيوانات اللي عندتس
قلت: اي حيوانات.. شكلكم غلطانين
وطلعوا يقصدون عيالي.. افاااا ثم افاااا مصرين ان ثلاثه منهم قرود واثنين ضبان وحاولت اقنعهم ان ذولا بشر مثلنا مثلهم بس ماااش اخذوهم وحطوهم بحديقه الحيوانات وصرت ازورهم وأأكلهم فيشار من ورى الشبك
وهكذا فقدت زوجي واولادي ورجعت لبيت اهلي
وقال اخوي: ماقلت لكم انها بترجع
وتراااااااااااااه منقول
بس حبيت أرسم البسمة على شفاهكم الغالية
اختكم المحبة لكم (بياض الثلج):42:
(بياض الثلج) @byad_althlg_3
عضوة فعالة
يلزم عليك تسجيل الدخول أولًا لكتابة تعليق.
غلوو تــــن
•
;) ;) ;) هههههههههههههه انسدحت على ظهري.....حلوة مشكورة حبوبة:27: :27: :27:
هههههههههههههههههههه مررررررررررره حلوه والله مت من ضحك
تسلمييييييين يا الغاليه على هالنقل الرائع:26: :26: :26:
تسلمييييييين يا الغاليه على هالنقل الرائع:26: :26: :26:
بياض الله يجزيكي كل خير
موتيني ضحك حتى زوجي انتبه وقال ايش فيك بتقري ... يحليلها زوجتي وهي بتضحك وراح يغمى عليها بعد .. بتعرفي عامله عليه عنتر موريته العين الحمره خخ خخ
موتيني ضحك حتى زوجي انتبه وقال ايش فيك بتقري ... يحليلها زوجتي وهي بتضحك وراح يغمى عليها بعد .. بتعرفي عامله عليه عنتر موريته العين الحمره خخ خخ
الصفحة الأخيرة