السلام عليكم

ودي أسجل معاكم صراحه حمستوني وياليت يتغير الجو عندي والنفسيه الزفت ومقرره أجيب شغاله ومرات أقول لا ماأبيها وزوجي يقولي حاولي تكونين قد المسؤليه
أنا عندي بنت عمرها سنتين و3 شهور وولد عمره 5شهور والبنت الله يصلحها تاعبتني مررررررررررره الكل متوذي منها أنواع العقاب والضرب مانفع واللي يخليني أضربها لما أشوف الشغل متراكم وهي تحوس وأخوها على طوول صياح
اداوم العصر من الساعه 3 للساعه 6 يعني 3ساعات وأخذهم معاي الدوام وهذا اللي مطفشني أكثر أهلي مو عندي وأهل زوجي عندي بس البنت دايم تطلع بالشارع واحسها ضايقتهم والولد عادي يبونه بس الباص يجي 3 وأبوه يكون نايم ويقول ماراح أقعد من النوم عشان اوديه
نظامي أصحى الساعه 11 ومرات 11 ونص طبعا لأني أنام الساعه 3 بسبب بنتي تسهر الله يصلحها لانها تنام المغرب وطبعا نومي مقطع عشان كذا ماأرتاح ولا أخذ كفايتي من النوم
لما أصحى مدري وش اسوي كل شئ يدور برأسي لازم أركب الغداء زوجي يجي من الدوام الساعه 12 ونص وولدي يبي رضعه بنتي تصحى معاي تبي فطور ومامسحت سراميك وفيه غسيل وعندي شغل للدوام ماخلصته ولازم أغسل المواعين وألبس وألبس عيالي قبل يجي الباص وأجهز الشنطه اغراض ولدي ومرتبكه وأروح وانا طفشانه والا يفوت الباص والا متمشكله مع زوجي وأبي شغاله وكان رافض واللحين اقتنع بعد ما قلت له ما أقدر أبد ابيها بس الى مايصير ولدي سنتين بس طبعا أنا حملت بنتي وجبتها ولا عندي شغاله وكنت اداوم بالكليه ولما صارت بنتي عمرها سنه كنت حامل وأظطريت أجيبها لأني كنت ممنوعه من الحركه وجبت الولد والشغاله ماتحب الأطفال وأنا أهم شئ عندي اطفالي وعطيتها اهلي وتخرجت من الكليه ولي شهر بدوام العصر عشان كذا ضايقني الوقت
لو أقوم الصبح وأرتب وقتي يصلح حالي بس مدام نوم بنتي ماتنظم ما أقدر أقوم الصباح وخصوصا اني أقوم كل ساعتين أسوي رضعه لولدي يعني مافيه راحه
أروح احيانا ماغسلت مواعين الغداء والمطبخ طفشني المواعين دايم حوووووووسه نفسي أشتري غسالة مواعين بس ما أقدر ماديا أشتريت النشافه والحمدلله ريحتني
امسح السراميك مره بالأسبوع اغسل أذا تراكمت ملابسي وملابس زوجي عيالي كل يومين كوي دايم متأخره بالكوي أحيانا زوجي يطلي ثوبه وشماغه أروح أكويها بنفس الوقت الدرج والسيب تحت لأني دور ثاني الحمدلله اللحين زوجي اتفق مع هندي كل يومين يغسله واليوم بدا غسله
زوجي مايغسل ولايكوي عند الكواي أبدا الا أذا كنت عند أهلي وانا ماخليه يكوي برا أستحي والله
ماني مهتمه بأكل عيالي لأني ماني فاضيه أبدا
غرفة الجلوس اكنسها كل يومين وأذا حوسه أكنسها كل يوم
عندي سلتين مليانه ملابس لها شهر ماطبقتها من بديت أداوم العصر أخذ اللي ابي واللي ما أحتاجه أخليه طبعا ملابس الشتاء الى الان ماشلتها وهي اللي مضايت لي السله
تجيني حاله أنزل بنتي عند جيراني وانوم ولدي وأشتغل بالبيت وأنظفه وبعدين انهد من التعب عيالي واحد يقوم والبنت تنام وأذا قامت نام الولد متناقضيييييييين مره
كتبت معاناتي كذا مره بس الى الأن محتاسه وقررت أكتبها هينا يمكن تشجعوني وتحطون لي نظام معين أمشي عليه
انا فعلا محتاجه لكم ساعدوني صراحه الشغاله يوم كانت عندي عشانها تصحى 8 مايجي العصر وكل شئ نظيف وأنقهر أقول أنا ماأقدر على كذا بس عيالي علي وكنت متفرغه لهم ولأكلهم وولدي له أدويه لأنه مولود ناقص ويبي أهتمام واللحين أهملتهم كلهم وبنتي نحفانه مرررررررررره والولد أهملت علاجه وضميري يأنبني ودي على الأقل الى مايكبر الولد ويصير أكلهم واحد ويتنظم نومهم مع بعض وعشان أقدر اخلي عيالي بدال ما أنقلهم معاي وأرتاح نفسيا بدال ماني هوشات مع زوجي ولو بأصحى الصباح النفسيه ماراح تتغير البيت بيكون نظيف لكن زوجي مايجي الساعه 9 الا وأنا دايخه وتعرفون الزوج يبي أهتمام ولبس وأنا مالي خلق بس أبي النوم ولا أقدر أجامل نهائي أصلا أذا شافني نعسانه طفش مني ونام
عطوني حل أجيب شغاله والا لا ساعدوووووووووووووووني
ياليت تكونون عند حسن ظني فيكم وتعتبروني أخت لكم وماتبخلون علي بالمساعده والمشوره وعذرا على الأطاله

عطوووور

هلابك معنا وان شاء الله ارد عليك
شوفي

مشكلتك الاساسية عدم تنظيم الوقت ..
وبالنسبة لرأيي في الشغالة انا معروفة اني اكثر وحدة في العالم تكرههم لانك بتنحرمين من احساسك ببيتك وصحتك وحريتك
وغير كذا ان شاء الله ناوية تخلينها بالبيت عند زوجك وتطلعين؟؟؟

اول حل انك تقومين الصباح مع زوجك وتفطرين عيالك وخصوصا بنتك لازم تقوم !!

وبعدها لهيها بالعاب او تلفزيون وروحي لشغلك اكوي واكنسي وجهزي غداك بس بنتك ما تنام ..

على ما يجي زوجك تكونين تعبانة ومخلصة اشغالك تغدوا وخذي لك غفوة مع عيالك وطبعا مع التعود راح تلاحظين بنتك تنام بنفس الوقت كل يوم..
وبالنسبة للضرب حرام توها صغيرة مو ذنبها انك ما تفرغتي لها هي بعد تحس انها محرومة ويمكن تغار من اخوها..

الساعة ثنتين ونصف تقومين تجهزين نفسك للطلعة بنتك خذيها وخذي معاك العاب او دفاتر واقلام تلوين تتسلى هناك..وولدك خلي ابوه يوديه لاهله ترتاحين نفسيا ان نصف العبء انزاح

اذا رجعتي بيتك نظيف ..ونفسك مرتاحة..اذا فيه شي بغرفتك يبي ترتيب على طول رتبيه
وابدأي بعشاكم صلحي شي مغذي وسريع وممكن تسوين شي يكفي يومين او تتفرغين الخميس والجمعة تعبين فريزرك وتستعينين بالخدم الي بالساعة تغسل عنك المواعين وانتي تطبخين حق اسبوعين مثلا وفيه شي ممكن يجلس شهر بالفريزر عادي..الشوربات ممكن تسوين حق يومين..

عشي بنتك وغيري لها وارتاحي شوي ..
وبعدها شوفي الصغير وش يحتاج واذا جا زوجك تعشوا ونومي عيالك بدري يعني بنتك المفروض ما تجي ثمان الا هي نايمة

وباقي الوقت كملي شغلك من غسيل او تغسيل مواعين واهتمي بنفسك وسوي كريمات خاصة لبشرتك لليل وصدقيني النفسية مهمة للشغل..

ولا تتضايقين او تقل ثقتك بنفسك..ترا حالتك مؤقتة بسبب ان عيالك صغار وورا بعض ..

بس لازم تطبقين كل الي قلت لك مو تتهاونين سويه جدول محدد بالساعة وعلقيه على الثلاجة..

وبعدين تقولين تبين شغالة يعني تقدرون على قيمتها وما تقدرون على غسالة مواعين؟؟ترا الاجهزة لك وللزمن.. والخدم ما منهم الا المرض والمشاكل..

اسفة على صراحتي بس والله راحمتك وحاسة بمعاناتك..

روياما

ما شاء الله عليك ياليت نشوف شغلك شوقتيني اتمنى اعرف اخيط احس عندي رغبة بس مهملة..

شمس راكبة جمس
مشكورة على القهوة وحياك الله معنا..بانتظار يومياتك..:)

نجدية5

البيت لازم تنظيف يومي عشان الغبار والكوي اكوي الي تحتاجين على طول والي تحسينه ما راح ينلبس على طول خليه للخميس والجمعة..:09:

عبائر

والله ما عندنا مهرجان زهور عندنا مهرجان بعوض ذبحنا ما ننام منه..:icon33:

حواء بنت اسعد

اسمك يذكرني بالجراح بطاش ما طاش بدور الحجازي خخخخخخخخخ
وبالنسبة للمواعين حاولي تغسلينها وهي طازة قبل تجف بيسهل عليك غسلها وترتاحين نفسيا من التأجيل..انا عندي اغسلها ارحم من اني اشيل همها..:(

نفحة طيب

ما شاء الله عليك سنعتن مرة..
الله يعينك على الغرفة اكره ما عندي التنظيف العميق اجلس اسبوع مريضة بعده من ظهري بس يا زين الشعور الي تحسين فيه اذا قعدتي تتمقلين نتائج شغل يدك خخخخخخخخخخخخ

ام رمو
الحمد لله على السلامة وينك فاقدينك من زمان:39:

دلوعة عبودي

عسى ما شر طولتي علينا عسى المانع خير ان شاء الله..وبانتظارك..