بالنسبة للجدول ياحلا شقراوي :
أولا عندما أستيقظ من النوم في الصباح أصحي زوجي وبناتي : أفتح شبابيك غرف النوم للتهوية وأروح أتوضأ وأصلي وأسوي الفطور ونفطر ، بعدين ألبس بنتي عشان تروح الروضة وألبس أنا وبنتي الصغيرة ( سنتين) أخليها ببجامتها طبعا تكون نظيفة لأنها لبستها في الليل، ويخرجون زوجي يودي بنتي الصغيرة إلى أمي والثانية للروضة طبعا كلها جنب بعض الحمدلله ، وأنا يجيني السائق أروح معاه لأن المدرسة خارج المدينة بنصف ساعة ، عشان كذا يمديني أخرج بعدهم ، يجيني على سبعة إلا ربع ،
ثانيا : أحاول أنجز عملي كله في المدرسة يصير في البيت ما عندي لاتحضير ولا أي عمل للمدرسة ، حتى الأسئلة أكتبها هناك على اللاب توب حقي لأني آخذه معاي ، وأطبعها في البيت ..
لما أرجع للبيت مستحيل أشتغل لأني تعبانه ، أرجع البيت على الساعة الواحدة أصلي وأغير لبناتي وأشطف لهم أعطيهم فاكهة أو عصير طازج أو خيار أو أي شي مفيد ... وأرتاح ساعة تقريبا في غرفة بناتي ، الكبيرة تنام على طول لأنها تعبانة جاية من الروضة ، والصغيرة تتفرج على المجد أو تلعب بهدوء وأحيانا تنام لأن ماما الله يخليها لي تصحيها الساعة العاشرة أو11 ما تخليها تطول عشان تنام عندي ، زوجي يجي من العمل الساعة 2ونصف ، قبل ما يجي بربع ساعة أقوم أسخن الغدا وأحيانا أسوي سلطة بسرعة أو عصير أو شي خفيف إذا فيه وقت ، لما يجي نتغدى وننام إلى العصر وغالبا أصحى الساعة خمسة ونصف أو ستة بالكثير ما أتعداها ...

لما نصحى أغدي بناتي ، وأسوي القهوة لزوجي ونتقهوى وأذاكر لبنتي ، ما يؤذن المغرب إلا هي مخلصة من المذاكرة لأنها تكون في بداية نشاطها ، من بعد المغرب يبدأ تنفيذ الأعمال اللي في الجدول سأذكرها لاحقا ، غالبا أنتهي على الساعة العاشرة وأحيانا على أذان العشا ، حسب سرعتي والجدول .........
بالنسبة للجدول فيه أعمال يومية أسويها أول شي وبعدين الأعمال الأسبوعية ،
الأعمال اليومية : بعد ما أصلي المغرب مباشرة ، أضع ملابس الروضة لبنتي في الغسالة ، وأحيانا يوم بعد يوم لأن عندها اثنين ، وأثناء ذلك أرتب سريري وأكنس غرفتي وأمسح المرايا وأفرغ الزبالة ، واتجه لغرفة بناتي وأعمل نفس الشي ، واتجه للمطبخ أغسل مواعين الغدا وأرتبه وأقرر أيش بأسوي عشا وغدا لليوم التالي ، إن كان معجنات أعجنها وأطلع لحمة للغدا ، وبعدين أبدأ في العمل الأسبوعي

نسيت أقول لك أكوي يوميا ملابس زوجي للعمل اليوم التالي ، لبسة فقط ( ثوب - غترة -سروال طويل ) وملابس الروضة لبنتي وملابس المدرسة حقتي ، وغالبا أنتهي من الأعمال اليومية على أذان العشاء . نتعشى غالبا الساعة الحادية عشر وأثناء ما نتعشى يكون الغدا على النار ولما ننتهي يكون خلص ، أستخدم قدر الضغط .
الجدول الأسبوعي :
السبت : كنس ومسح السيراميك لجميع المنزل ، غسل الفوط ومفارش السرر وأي شي يخص المنزل ، طبعا أضعها أول شي عشان أشتغل وانتهي وهي منتهية ،
الأحد : أغسل ملابس بناتي وغسل الحمامات غسيل عميق ، والأيام الباقية أشطفه بديتول فقط
الإثنين : أرتب الثلاجة وأي رف من الدولاب سواء دولاب المطبخ أو الملابس ـ أغسل ملابسي
الثلاثاء : أغسل ملابس زوجي + غسيل البوتوجاز ، وأمسح طاولات المطبخ بكلوركس وديتول ، أغسل مدخل البيت الدرج الخارجي .
الأربعاء: عمل قليل عشان بعد العشاء أخرج ، أمسح السيراميك فقط
بقية أيام الأسبوع إجااااااااااازة من الشغل ،أستمتع بأي خرجة أو سهرة ومع زوجي نروح أحيانا نتسوق ، وعلى حسب الظروف
فقط أقوم بالأعمال اليومية وغالبا أنجزها في العصر وأنتهي بدري منها
يوم الجمعة

لي عودة بإذن الله

أفكار تساعدك على العمل :
1/ الاستغفار أثناء قيامك بالأعمال وذكرالله عموما
2/ علقي الجدول في مكان بارز ( أنا معلقته على الثلاجة ) إذا عندك بنات كبار ممكن يساعدوك في الأعمال اليومية ويخف الشغل عنك كثيييييييييييير مثلا يرتبوا غرفتهم ويمسحوها ويكنسوها ، وعوديهم يطالعون الجدول عشان يتعودوا على النظام ويحفظوا أعمالهم ..
3/ استغلي سفر زوجك للتنظيف العميق والتنفيض والأعمال الكبيرة ، أو ممكن تتنازلي يوم عن الخروج الأربعاء أو الخميس إذا فيه عمل كبير تريدين القيام به ..
أتمنى بنتي تكبر بسرعة تساعدني هي الآن خمس سنوات وماهي مقصرة ياعمري عليها ...الله يحفظها لي ..