ألف شكر لأم دندونة على المحل ولBlond Dove على الوصفة
جزاكم الله كل خير يا Blond Dove وأم طورى وكهرمانة وأم أبيها و La roseعلى المساندة والنصيحة والدعوات
وألف سلامة ليكى ولجوزك يا نانى وربنا يشفى حماكى قريبا والف مبروك لابنة خالتك

والله يا أم أبيها كلامك كله حكم ومفيد وكمان صحيح

انا عارفة والله ان ماما بتحب خطيبى وبتموت فيه بس أنا كل ما أزعلها تجرى وتخبط فيه هو وكأنه هو السبب فى كل أخطائى!!!!!!!!!!!!!!
طبعا انا اللى غلطانة لانى مش بمشى أمورى مع ماما اليومين دول علشان نعديها على خير
بس دى مشكلتى دايما عصبية وخصوصا امام كلام ماما المستفذ ذى "خلاكى كدة اسمعى كلامه وموتى فيه قوى وبكرة تشربى منه" وغيره

بس للاسف يا جماعة انا مشكلتى عمالة تتطور فى ساعات !!!!!!!!!
بعد ما كنت زعلانة من ماما وعمالة اصالحه علشان الكلام اللى ماما قالته له




فوجئت انى زعلت منه هو كمان!!!!!!!!!!


اول مرة بعد مرور اكتر من سنتين على معرفتنا ببعض احس انى فعلا مش هاقدر اعيش معاه واخد قرار جد بال...........
مش قادرة اقولها لكن هانفذها!!!

المشكلة كلها يا جماعة تتلخص فى تدخل أخواته البنات فى حياتى بشكل غريب يثير الاعصاب وهما بنتان واحدة أكبر منه والتانية أصغر منه واحدة معتبرة نفسها امه والتانية بنته وهو كمان روحه فيهم بشكل غريب!!!!

أنا عمرى ما تضايقت من ذلك بالعكس كنت شايفة ان علاقته الكويسة باهله دى حاجة عظيمة وهما كمان كانوا بيعملونى كويس قوى وناقص يبوسوا ايدى كمان!!!!

بس دلوقتى بعد ما اقترب ميعاد زواجنا وبدأنا التجهيزات، وجدهم يتدخلون فى حياتى بشكل غريب ومعاملاتهم مش طبيعية. قلت مش مشكلة انا ليه زوجى وبس وهو بيحبنى ومش هيخلى حد يزعلنى وخاصة انه هو كمان مش بيحب حد يتدخل فى خصوصياته!!!
لكنى فوجئت بأنه طيب قوى لدرجة انه بيسمع كل كلامهم لمجرد انهم ما يزعلوش وبيسمح لهم يتدخلوا فى حياتنا من غير ما يأخد باله!!!!
أنا مش قادرة على كدة انا ما اقدرش افسد العلاقة بين زوجى وأهله وكمان ما اقدرش اتحمل هذا التدخل السافر وخاصة انى أرى انى انضج منهن وقادرة على ادارة امور حياتى بنفسى، لذلك قررت الانسحاب واترك هذه العائلة باكملها !!!!!!!
على فكرة خطيبى ابن عمى!!!!!!!!!!!!!!!!!!!
قرارى ده اتخذته النهاردة بس ولسة ما قلتش لحد عليه غيركم
ياريت تردوا عليه لانى واخدة مهلة مع نفسى للتفكير ومش هاستعين براى حد غيركم
جزاكن الله جميعا كل الخير عن هذه الاخوة فى الله

hadhoda
مع احترامى لكل الآراء و النصائح ...بس اسمحيلى دى حياتك انتى حاولى تحسبيها صح و استعيذى بالله من الشيطان لأنه بيفرح لما بيفرق زوجين!!!!!..وانتم ماشاء الله خطيبين و اولاد عم كمان..اعملى حساب دقيق شوية دخلى فيها كل الأوقات اللى ساندك فيها و صالحك فيها و احسبى كل حاجة اتمنتيها فى زوجك المستقبلى و لقتيها فيه و كل لحظة حلوة عشتوها و كل حلم اتخيلتيه او عشتيه معاه حتى لو فى خيالك وبعد ما تحسبى كل ده....شوفى اذا كان السبب اللى قولتى عليه اكبر و اقوى من كل ده...استخيرى...ولا نملك لكى سوى الدعاء اللهم قربه منك اذا كان فيه خير لكى و يفرقه عنك لو كان فيه شر لكى..بس امانه لو كلمة الفراق وجعتك فى قلبك و انتى بتقوليها.....فكرى تانى ولاحظى حاجة الرجالة مابتغفرش فكرة زى دى ابدا يعنى لو قولتيها هيكون صعب جدا ترجعى فيها حتى لو قبل هو و رجعتوا مش هاينساها عمره....والله المستعان يوفقك ان شاء الله:)
nany
الف سلااااااااااااااااااااااامه و حمدالله على سلاامتك ...:)

السلام عليكم

ازيكم يا اجمل واحلي بنات ان شاء الله كله يكون بخير

blond dove

ما شاء الله عليكي ربينا يكتبلك الخير دايما

عندي ليكي سؤال ممكن تحكي لينا علي دروس التجويد اللي بتاخديها بالتفصيل اكتر


ازيك يا ناني واخبارك ايه الف سلامة عليكي وعلي جوزك حاولي ترقي نفسك وجوزك وحاولي تشغلي سورة البقرة باستمرار في البيت وياريت لو تحاولي تقريها كمان وان شاء الله ربننا يبعد عنكم كل اذي
والف سلامة علي حماكي وان شاء الله يقوم بالسلامة


هدهودة يا حبيبتي

بصي كلنا مرينا بنفس الظروف اللي بتقولي عليها ومش معقولة عند اول مشكلة تقابلنا نفكر نبعد عن شريك حياتنا اللي اخترناه بنفسنا وقلبنا وعقلنا وبعين انتي بتقولي انه طيب جدا فمعلش حاولي تصبري وتستحملي كلها ايام وهيكون معاكي لوحدك من غير لا اهلك ولا اهله

عاوزة اقولك علي حاجة مهمة اوعي تحكي لماما علي اي مشاكل بينك وبيه وبرضه بالعكس اوعي يتحكي ليه عن اي مشكلة معاه عارفة انتي هتنسي بس هما مش هينسوا والاهل دايما بيخافوا علي بنتهم وبيحسوا ان عريسها ده هياكلها مش هيجوزها فانتي ابعديهم عن اي مششاكل خالص وكفاية اوي مشاكل الشقة والعفش والجهاز اللي ما بترحمش ماشي يا جميل

استغفري الله واهدي كده ولاراجعي نفسك وان شاء الله هعتدي علي خير وزي ما بيقولوا وطي عشان الريح تعدي انت عدي اي حاجة ومعلش استحملي اخواته البنات دول برضه بيوكن اخوهم بالنسبة ليهم كل حاجة معلش اسمعي ليهم وعدي وانتي حاولي بينك وبينه تفهميه ان الاسلوب ده مش بيعجبك وانتي مش بيتحبي تحرجيهم قدامهم واكيد هو في المرة اللي جاية اللي هيوقف ليهم صدقني الراجل عاوز معاملة من نوع خاص حاولي تفهميه كويس وحاولي يكون ليكم اسلوب في الحياه عشان الحاجات دي ما تاثرش فيكم فهماني يا جميل
عاوزة اقولك ان جوزي ولد علي 3 بنات ولكي ان تتخيلي قد ايه المعاناه اللي كنت فيها بس هاقولك انا عملت ايه انا قلت لنفسي انا عاوزة ايه انا عاوزة الراجل ده اعيش معاه بقية حياتي فاستحملت كتير جدا وعديت كتير والحمد لله ما حدش بيقدر يدخل في اي حاجة خالص دلوقت لان الراجل لما بيحس انه كل حاجة في حياه الواحده واهم حاجة في حياتها خلاص بيكون ليها لوحدها برضه فهماني
ان شاء الله تكون الصورة وضحت ليكي شوية

اصبري واهدي وبلاش اي قرارات متسرعة

هدهوده انا مع البنات فى رأيهم واوعى تاخدى قرار زى ده لان الفترة اللى انتى فيها بتكون اصعب فترة واعصابك مشدوده وعايزه تعملى اى حاجه عشان تخلصى من وجع الدماغ اللى انتى فيه بس اى خطوة هتاخديها هتندمى عليها عمرك خصوصا لو هو انسان كويس وبيحبك لان صعب البنت تلاقى واحد كويس اليومين دول وبعدين كل موضوع وله عيوبه وموضوع اخواته ده ظاهر دلوقتى لانه عايش معاهم لكن لما يكون ليكم حياتكم المستقلة الموضوع هيختلف تماما
استهدى بالله وابقى على خطيبك اللىهو هيكون جوزك يعنى هو اللى باقيلك
ولما تزعلى منه افتكريله المواقف الحلوة معاكى هتسامحيه على طول

هدهدة اوعييييييييييييييي اوعيييييييييي تعملي حاجة زي كدة أبدا ولا الكلمة دي تطلع منك لحد

...انا هحاول اكلمك دلوقتي
يارب تبقي سهرانة شوية يارب
لو ملحقتكيش كلميني انت الصبح ضروري لان رقم شغلك مش مسجلاه عندي
لان يمكن معرفش ادخل علي النت لان جهازي خربان