بسم الله الرحمن الرحيم

حبيبتى هدهد...الحمد لله ان ربنا هداكى وعاوزه اقولك حاجه مهمه اوى الانسان اللى ترتبطى بيه ويكون بقلبك دى نعمه من عند ربنا والتفريط فى النعمه ده بطر والعياذ بالله صدقينى فرق كبير اوى بين الارتباط العادى المبنى على العقل فى الدرجه الاولى وبين الارتباط المبنى على القلب وده مش معناه ان القلب بيلغى العقل لا طبعا بالعكس والحمد لله اوى يا هدهوده لو المشاكل اللى بينكم من النوعيه دى دى كده تبقى هينه اوى فوق ماتتخيلى والحمد لله كمان لانه طلع مش بيتصرف عشان يرضيهم ولا حاجه لان الراجل زى ماقلتي ماكانش يعرف اللى بيحصل ده واتفاجأ واكيد هايقدر اوى اوى القلق اللى انتى عيشتيه من غير ماتحاولى تضايقيه فتره كبيره وان انفجارك ده جه بسبب الضغوط الكتيره يعنى تراكمات فوق بعضها
عارفه انا بقى كنت باعانى من مشكلتك دى بس بالعكس انا مش مخطوبه بس انا بنت واحده على ولدين وعانيت مع خطوبات اخواتى الاتنين حتى بعد ماتجوزوا...انا الفرق بينى وبين اخواتى كان 8 و 7 سنين يعنى باختصار هما اللى مربينى وعندهم شعور بالتملك عالى اوى من ناحيتى لدرجه بتخنقنى وكل ماواحد فيهم جه يخطب كان بيحشرنى بشكل ينرفز فى كل صغيره وكبيره انا عاوزه اقولك ان الاتنين مراتهم اكبر منى والصغير مثلا كان بيقولهالها كده صراحة سماح هيا اللى تفهم فى الكلام بتاع البنات ده وانا باثق فى ذوقها وهيا اللى معاها الفلوس وهيا اللى هاتعملك كل حاجه من كوافير وفستان و تحضيرات الخطوبه دى كلها ولو انا نطقت او فتحت بقى كان بيتقمص منى ويعملها حكايه ده انا مش مهتميه بقى وحاجات كده مع العلم ان اخواتى والله حمشين اوى مش مدلعين ولا حاجه ونفس القصه فى فى الجواز لا والاظرف انهم نزلوا يتفرجوا على الموبيليا من غير ماياخدها وانا اللى كنت موجوده والحاجه عجبته فاشترى من غيرها وانا منقيه معاه كتير اوى والله البنت كانت بتصعب عليا لانها مش بتتكلم خالص وانا اللى كنت باتفرسلها سلف بس المصيبه انها لما اتجوزوا زى مايكون خدت على الاعتماد عليا وكل حاجه كان لازم تنزلنى معاها نشتريها او اجيبهالها انا لوحدى حتى لما جابوا اول بنت والولاده جت مفاجىء انا اللى نزلت اشتريت كل حاجه لوحدى!!!!!وهيا زى مايكون عاجبها الوضع ولما كانت بتجيب حاجه وتىللاقيه مش مقتنع اوى علطول ترميها عليا اصل سماح قالت حلوه..........وماما دايما تقولى ماتحشريش نفسك لكن بيبقى قدامها مش باقدر ارفض لانهم بيحطونى قدام امر واقع
والتانى الكبير ده اصعب لانه يمكن اقرب ليا شويه وزى ماتقولى كده ياما حصل غم بينهم فى الخطوبه بسببى هيا سماح ماجاتش معاكى ليه هيا مش عارفه ايه وهيا كانت بتيجى تحكيلى طبعا لانى كويسه جدا معاهم وبيعتبرونى صاحبتهم اوى كمان وحتى بعد الجواز مره كانت زعلانه منى عشان قالتلى تعاليلى كذا مره وماروحتش ولما جت بنت خالتى من السفر نزلت معاها فكانت مرات اخويا زعلانه منى دلع يعنى اشمعنى ماروحتلهاش ونزلت مع بتت خالتى وساعتها بقى كانوا نازلين القاهره وهوه كان بيكلمنى وادالها السمعه وازاى بقى انها كانت بتكلمنى وهيا مقموصه البغم اشتغل وازاى بتكلميها كده وشغلانه ومارضاش ياخدها معاه وهيا قامت نازله قاعده جنبه فى العربيه قام ماكلماش ولا كلمه طول الطريق لغاية مارجعوا
يعنى معانه وصدقينى باعانيها اكتر منهم والله العظيم بس البنتين بصراحه مقدرين اهتمام اخواتى بيا اوى لان فرق السن خلاهم حاسين انى بتاعتهم اوى وبيحاولوا يتفادوا المواقف دى كويس والحمد لله لان الاتنين قريبين منى فمش بيضايقوا منى خالص بالعكس تماما مع انى لو مكانهم اكرهنى بصراحه بس انا اخواتى حنينين اوى ومريحينهم اوى والاتنين يعتمد عليهم هما يمكن شداد شويه بس عشان كده البنتين مريحينهم
عارفه انا باعانى اوى لكن عمرى ماستغليت الوضع بالعكس انا حتى الان من ايام الخطوبه اى مشكله كانوا بييجوا لى انا يحكولى مع انى انا الاصغر وكنت بالم دايما المواضيع قبل ماتكبر من دون معرفة اخواتى كمان لدرجة ان الواحده فيهم لما بتبقى مخنوقه من حاجه بترتاح تكلمنى انا وبس مع انها ممكن تيجى على اخويا فى الكلام بس بتبقى واثقه فيا ويمكن انا الوحيده اللى ممكن يكلموها فى اى مشكله لان الاهل طبعا بيشيلوا ومافيش واحده فيهم بتقول اى مشكله بره بيتها الحمد لله غيرى

صدقينى يا هدهود الراجل اللى بيحب اهله وبيخاف عليهم ده اكتر واحده تأتمنيه على نفسك اوى واطمنى طبعا اكيد ان شاء الله الكلمه اللى قلتيهات مش هاتأثر اللهم الا لو حب يستفزك بهزار طبعا لانه شاف انك عديتى كتير عشانه وانتى بقى حاولى تحسسيه انك فرحانه اوى انه اهتم وفهمك وانك بترديله بالمثل بقى وربنا يخليك ليا وكلام من النوعيه دى هايضيع اى اثر للكلمه خالص ان شاء الله وادعى ربنا يجمعكم على خير ويبعد عنكم الشيطان ان شاء الله
سماح

بسم الله الرحمن الرحيم
حبيبتى nany_2020 ممكن رقم ايمى الكاشف واحده صاحبتى عاوزاه والف سلامه عليكى يا رب

سماح

ماشاءالله ياسمسمة...برافو عليكي انك عرفتي تكسبي مرتات اخواتك
وواضح ان شخصيتك عاقلة ويعتمد عليها
يابخته

فطومة....وسام عندها دور برد جامد شوية مخليها راقدة مش قادرة ربنا يشفيها ويزيح عنها
انا كلمتها امبارح حبيت بس اطمنكوا عليها

ممكن اسالكم سؤال؟؟؟؟
هل فيه حد عمل فحوصات ماقبل الزواج قبل مايتزوج؟؟؟
احيانا الواحد يقول لنفسه خليها علي الله واحيانا يقول مافائدة العلم والتقدم الطبي؟؟؟

ما رأيكم وفي حد عمل تلك الفحوصات؟؟؟
ربنا يبعد كل شئ عن الجميع يارب

hadhoda
الحمد لله ان ربنا ازاح المشكلة تقريبا وعلى فكرة انتى قادرة جدا على احتواء اخواته و دا واضح جدا من كلامك انتى بس القلق اللى قبل الجواز مسيطر عليكى و الشيطان بيقولك على اى حاجة صغيرة (لما هى دلوقتى كده اومال بعد الجواز هتبقى عامله ازاى) ودى طريقة هايلة فى التشكيك!!! بس انا كنت قاصدة جدا اخوفك عشان تعرفى قيمته و غلاوته عندك و تعرفى انه مش هو السبب و ماتحطيهوش بينك و بينهم الا فى الضرورة القصوى يعنى لما بجد يغلب حمارك.ههههههههههههه....
بس ان شاء الله ينسى واضح انه متسامح ماشاء الله...:)

كهرمانة يا جميلة
والله انا رايى محايد جدا فى موضوع الفحوصات ..يعنى انا نفسى مش هاسعى ليه بس لو اتعرض علية مش هارفض...بس اهم حاجة ان الموضوع ده بتاعى انا و هو و بس مش اى حد تاااااااااااااانى....وفى الآخر مادام ان شاء الله بتحبوا بعض و كويسين مع بعض توكلى على الله وخييير ان شاء الله بس لو مش ضرورى كبرى دماعك منه..:)

مصراويييييييييية
انتى فين لعل المانع يكوون خيير ان شاء الله...

مروة
وحشتينا يا قمر:)
dado
و هو انت تتنسى يا سكر:)
omahmed
يا ستى احنا فى دروس التجويد ملشيين بمنهج تجويد مقسم على الأجزاء بتاعة المصحف..المنهج الخاص بجزء عم هو احكام النون الساكنة والتنوين و احكام الميم الساكنة..و فى يا ستى شريط المعلم للتحفيظ للشيخ الحصرى او الشيخ عبد الباسط حاولى تجيبهم و تسمعيه و ترددى وراه ده هيفيدك كتير..واى استفسار تانى اسألى يا ستى و احنا فى الخدمة:)

هو الملف ده عن ايه بى الظبت يا جماعه