سموحة حبيبتى
اخبارك ايه دلوقتى
يارب تكونى بخير وسعادة وباطلب منك تسمحى نصيحة كهرمانة وعليكى بالدعاء والصلاة لتهدئة النفس
نودى ميرسى على مشاركتك برايك الجميل وانت فعلا عاقلة جدا بس يا ريت كلنا نضع كلام ام ابيها فى اعتبارنا ونحاول ما نغضبش ربنا ولا اهلنا لان رضاهم مهم جدا

ام ابيها
اذاى تقولى ما حدش سأل علية؟؟؟؟
ده احنا مرة نقول ام ابيها ومرة برايد وعاملين ندور علينا. احنا ما نقدرش على زعلك يا جميل بعدين تحرمنا من كلامك الى ذى السكر
انا كمان على فكرة ناوية اجيب الطرحة وورد الشعر وبوكيه الورد والفستان والجيبونة علشان فعلا احتفظ بهم للذكرى
ودى حاجات تكلفتها بسيطة جدا بس بتفرح قوى
يعنى فرق كبير لما تصحى تانى يوم تودى الحاجة للكوافير ولما تصحى ترصيهم فى دولابك وتتفرجى عليهم وتفرحى بهم
وبعدين البنت الشاطرة تلف كويس وتدور على الحاجة الرخيصة وجميلة فى نفس وما تنخدعش بالاماكن اللى اسعارها عالية على الفاضى لان فى السوارية بالذات الحاجة بتكون ذى بعضها بس المحلات بتستغل العرايس وتضرب فى الاسعار حسب المنطقة
عارفين الطرحة مثلا شوفتها بامانة فى طييبة مول ب700 جنيه وهى هى فى ممر الكونتينتال ب 200 جنيه وفى الموسكى مش هتصدقوا


ب 60 جنية

انا مسكت فى طرحة واحدة هى هى نفس الخامة والتطريز والمقاس مع انها مش عجبانى قوى بس قلت اقارن اسعارها فى كل الاماكن ودى كانت النتيجة بس لسة ما قررتش برده هشترى طرحة شكلها ايه
عاوزة بس اقول لكم ان اللى معاه فلوس كتير بيعملوا له محلات غالية علشان يصرف فيها فلوسه دى واللى على قده هيلاقى نفس الحاجة بسعر معقول
كمان ورد الشعر ده ب 10 جنيه فقط ال7 وردات اللى بيتحطوا فى الفورمة يعنى مش حاجة خالص
وافضل كتير من انك تستعملى ورد دخل شعر واحدة تانية. غير ان الورد الابيض بيدبهدل بسرعة ومش بيكون زاهى ذى الجديد. (على فكرة المحجبة بتستخدم الورد برده فى الطرحة فوق لفة الشعر واحدة صحبتى عملت كدة وكانت جميلة)
وكمان با نودى خلى بالك من موضوع اول لبسة ده لان صدقينى هو بياخذ تكلفة الفستان بالكامل وبمكسب كمان وبعدين بترجيعه تانى له يستفيد به هو
دى حركة استغلال علشان عارفين ان بنات كتير هيصدقوا الموضوع ده
انت ممكن بنفس التكلفة تشترى فستان ويبقى ليكى بعد كدة ولو هتقولى هاعمل ايه تانى بفستان الفرح هاقولك حتى لو مش عاوزة تشليه للذكرى ممكن تتبرعى به لجمعية خيرية ذى ما واحدة فى المنتدى هنا قالت لنا قبل كدة
او تبقى تسلفيه مثلا لقريبة او صديقة محتاجة
يعنى ده رأيى فى موضوع الفستان وكل واحدة برده لها رايها
بالنسبة للجيبونة ماما اشتريتها لى احسن جيبونة ب 70 جنيه فى الخطوبة وانا شيلاها عندى للزفاف باذن الله
يعنى كل لبسة ب 35 جنية ثمن التأجير. ههههههههههه
بس والله فرق كبير . الجيبونة بالذات بتدبهدل قوى من كتر اللبس وكمان بتأخذ مقاس الوسط وبتوسع.
وانا معاكىلا يا ام ابيها ان دى اول فرحة واول واخر زفاف باذن الله وانها ليلة لازم تفضل ذكرى جميلة مش بالذنوب استغفر الله لكن بالقلوب الجميلة المحبة ورضا الاهل والزوج فى نفس الوقت

مروة
مش هترجعى تنورى موضوعك تانى ولا ايه؟؟؟؟؟

ام باسل وحستينى بجد

اسفة جدا يا جماعة على الاطالة

هيه مروة جت مروة جت
ازيك يا حبيبة قلبى وحشتينا بجد بنورك علينا
انا نزلت وسط البلد اول امبارح بس ذى ما قلت لك خيبة وما عرفتش اوصل شارع قصر النيل بس دخلت ممر الكونتينتال ولقيت محل بيبيع كل مستلزمات العروسة ولقيت عندهم البرا السوارية المصرى الناشف اللى قلتى عليه مش حلو وفعلا ب 30 جنيه بس ماش عندهم المستورد التريمف
طبعا دخت من اللف وروحت ولمبارح ما اقدرتش اروح فى اى مكان لانى كنت مرهقة جداااااااا
المهم هاحاول اروح النهاردة قصر النيل من خلال طلعت حرب وادور على المحل واقول لكم الاخبار

حبيبتى سكرة هانم
انا متشكرة ليكى قوى انك بتفكرى فى موضوع اختى انا فعلا والله نفسى انصحها بس ما اقدرشششششششش ابدا
لانها مش بتسمح كلام اى حد فى الدنيا غير ماما والباقى بالنسبة ليها رايهم مش مهم اطالاقا لدرجة انهم حكموا خالى فى الموضوع لان اخويا كان مش موافق وماما واختى اتفقوا ان رايه هو اللى هيمشى مهما كان لانه محايد وما لوش مصلحة مش ذى اعمامى وعماتى اللى ماما بتشك فيهم على طول!!!!
تخيلوا خالى سمع من اخوية ومن كل الاطراف ومن ماما وفى الاخر قال لاختى اخوكى معاه حق والرجل ده غير مناسب ليكى وماما ملهاش خبرة كبيرة فى الناس ومن الافضل ما تخديش برأيها لوحده!!!!!
تصدقوا قالوا ان اخوية ضحك عليه وملا دماغه وماما ثبتت على رايها واختى طبعا طاعة عمياءءءءءءءءء بجد!!!!
هو فعلا مش وحش ولا حاجة يعنى بيصلى وبيصوم واخلاقه كويسة واصله كويس ولا يدخن ابدا اى شئ وملتزم
يعنى دينه كويس وخلقه برده كويس وده فعلا اهم حاجة وعلشان كدة ماما مقتنعة به

بس انا حاسة انه غلس ودمه تقيل لانه بيحاول يبان دمه خفيف وحاسة انه بيمثل ودى اكتر حاجة تخوف لان ما تعرفيش هيظهر منه ايه بعد كدة وكمان مغرور جداااااااااااااااا ومتظاهر
تصوروا يا جماعة عمل حاجة مكسوفة حتى انى احكى لكم عليها......
تخيلوا بعد يومين بس من الخطوبة حصلت مشكلة عائلية صغيرة كان سببها انه قال لاختى حاجة والحاجة دى كانت اصلا نميمة على ناس تانيين وانتقلت لهم وحصلت مشكلة بس هايفة جدا
المهم تخيلوا انه قال لاختى لو قلتك حاجة وخرجت برة هاخلع الدبلة دى ومش هلبسها تانى ابدا!!!!!!!!!
تخيلوا حد يقول كلمة ذى دى بعد يومين من الخطوبة دى كلمة تطلع من البنت بالعافية وتتعذر فيها لان من حقها تدلع على خطيبها لكن هو يقول كدة ليه هو فاكر ان احنا هنموت عليه!!!
بس تخيلوا اختى خافت قوى على زعله وما لامتوش خالص على الكلمة دى وقالت له حاضر حاضر ما تزعلش.
ايه العبط ده!!!
احنا اصلا مستخصرين اختى فيه وهو فاكر نفسه حاجة قوى
وحركات كتير كدة بيعملها سخيفة بس اختى شغالة بنظام حبيبك يبلع لك الظلط!!!

المهم يمكن هو عاجب اختى كدة وانا احسن لى اطلع نفسى منها ومش هاقدر انصحها غير بالاستخارة فعلا
وربنا يوفقها
بس انا فعلا مش طيققققققققققققققاه
بس لو لقيت الموضوع مشى يبقى ربنا يتمم لهم بخير وهاعصر على نفسى لمونة واستحمله

عقلك كبير فعلا يا سكرة ما شاء الله عليكى
انا كان رايى من رايك بس الله يسامحهم قاريبى حاسة انى هاسمع منهم كلام بايخ كتير لو كل حاجة مش كاملة
بس برده هاعمل حل وسط واجيب الضروريات الاول
والله يكون فى عوننا وعون اهلينا
انا باعتمد على نفسى كتير علشان والدى متوفى الله يرحمه واى فلوس باخدها من اى حد باحس انى باستلفها علشان كدة مش باكتر فى الطلبات
وربنا معانا كلنا

ما شاء الله عليكى يا Blond Dove
تسلم ايديكى بما كتبتى ويارب سماح تهدأ وترتاح
وميرسى على الرسالة الخاصة