يا مرحبا يا مرحبا
صباح الخير عليكم

الفجر000
لساتك على الضيقة؟
حبيبتي اصرخي وليش كلتمة بنفسك
روحي فوق السطح وسوي الي تبية ماحد راح يسمعك ان شاء الله
وهوني على نفسك اشوي اشفيكي حبيبتي
ومثل ماقلت لك حاولي تغيرين جو عشان النفسية تتغير ان شاء الله
والواحد بعض الايام تجية حالة ملل وطفش وضيقة
انا تجيني هالحالة لما اجلس بروحي خاصة بالليل
اذا كان ابو الشباب اخر ليل ياربي ماقدر اوصف حالي وانا بروحي
كل اشوي اروح اناظر بنافدة الشارع ابي اشوف شي
لدرجة بعض الاحيان اصير مثل المجنونة ابكي مادري اشحقة
ماحب الوحدة ابد ابد ابد

فاتن000
شخبارك حبيبتي
هاااة 00بشرينا خلصتي اغراض العيد والا لسى؟

غلاوي000
شخبارك حبيبتي
مايصير شدية تختفين عن الملف
كلش ولا غلاوي مانستغنى عنها
اشعذرج الحين ماكو مدارس يعني راحة في راحة
واذا ابو الشباب يشتغل حكومي يا بختك على الاجازات الحين اجازة العيد
مو مثل الشركات مو بكيفهم الاجازات

احلام وسارونة ونور الرياض وانجل ومادري انضمت معاهم نور علي والا لسى
طمنونا عنكن لازلتوا بالكرشة والا خلاص اتخلصتوا منها

غلاها000
عاد هذا وقت الوحم كان صبر عليكي لبعد العيد
يا كرهي للوحم
الله يعينك حبيبتي

الهيبة000
حبيبتي
طمنينا عنك ياعمري
يعني انتي رحتي لد/ لواء وقالت لك هذا الكلام
يعني اكتشفت بالسونار والا شلون؟
حبيبتي انتبهي لنفسك وحاولي ترتاحين بقد ما تقدرين
الله يتمم عليكي حبيبتي
وماتشوفين شر


فنانة حب000

الحمدلله انك مافيكي شئ
لا تحاتين انتي بس لا تكثرين سكر وايد
ودايما لما تحللين للسكر اسأليها عن النسبة عشان تطمنين
حاولي يكون اكلك صحي بقد ماتقدرين حبيبتي
واهم شئ لا توسوسين
وتقصدين بتعملي سونار ثلاثي والا رباعي ؟


انامل000
وينك حبيبتي
الله يعينك شكلك لاهية بالنونو الحلو
عيدكم هالسنة غير يا انامل
مع النونو احلى
يمحلاه وهو يصيح بالبيت ويصرخ
مو احلى من الهدووووووووووووء >>>>تراني اكرة الهدوء يصدع لي راسي
عشان شدية ما احب الشتاء بالليل بس لانة يكون هدوووووء لا صوت تكيف ولا مروحة ولاحتى سيارة تمر بجنبك
بالليل ماتسمعين غير تك تك تك تك تك عرفتو شنهو>>>>صوت ساعة المنبة خخخخخ
مو شئ يصدع الراس ؟!!!!

يالله قايمة اسوي لي فطور وجاية احكيلكم تقرير الموعد امس
ماقدرت ادخل امس بعد ماجيت من المستشفى
جيت على الساعة 4 ونصف وعلى طول على السرير بدون تفاهم
بعدها صحيت على الساعة 8 المغرب وعلى طول صليت ولبست وطلعت
ورجعنا البيت على الساعة 2 الليل وعلى طول نمنا ولساعة 6 الصباح يعني قبل ساعة صحيت
وكاني معاكم >>>> الله يعينكم على كثر القرقة مني

يالله انا رايحة احد يبي فطور معاي ترى اهم وجبة عندي الفطور
لو ما اكل كل الوجبات الا الفطور مادري اشحقة >>>>خخخخخ

الحمدلله رب العالمين
كيفكم انتو ماقلتوا تبون فطور معاي خلاص تم القضاء علية>>>>خخخخ احس اني اتكلم مع نفسي
كفاياكــــــــــــم نوم خلاص

والان اليكم تفاصيل نشرة الموعد بالامس نوافيكم بها بعد قليل على قناة حواء الصباحية
ومعنا تقرير حي وبث مباشر في عيادة د/ حمدان في مستشفى سعد التخصصي
ومع مراسلنا مصطفى الاغا على قناتنا الاجمل والافضل والاكمل>>>>>خخخخخخ
ياثقل دمي على الصبح
مو شسوي ماعندي احد اقرق معاة وابو الشباب في سابع نومة
مالي الا انتو تحملوني


_________________________________

وهذا التقرير000

دخلت على د/ حمدان اخصائي الدم طبعا عشان كانت نسبة الدم نازلة ومو عارفين من شنهو
عمل لي في الموعد السابق تحاليل للوراثة ومزرعة ومدري ايش عشان يبي يعرف ليش حجم الكريات الحمراء صغيرة ماتكبر
حتى مع الحبوب الي اشربها فقال لازم من التحاليل عشان نعرف السبب وفعلا طلعت التحاليل
قال لي000
الحديد عندك ممتاز >>> لاحظوا قال الحديد مو نسبة الحديد
لان هنا يتكلم عن مميزات الدم والحديد الطبيعية مو عن النسبة
وقال كمان الحمدلله ماعند مشاكل في الدم ولاوراثة ولا تلاسيميا
بس فية مشكلة بسيطة انتي ماتحسي فيها لانك ما تعانين منها الا فقط في وقت الحمل
وقال اسم مصطلح صراحة صعب ماقدرت احفظة وسألتة عنة
ماشاء الله علية جاب لي دفتر وقلم وقام يشرح لي بالصور
يرسم ويوريني
المهم اتضح انو عندي مشكلة في حجم الدم انة صغير وهي مشكلة وراثية مثل ماقال لكن مو بمعنى انها مرضية
بس هي اشوي تبين في الحامل
لان هذي المشكلة تخلي الدم مايرتفع الا بدرجة بسيطة يعني انا المفروض في الاحوال الطبيعية يكون نسبة دمي 10
وهو ما يرتفع اكثر من كدة>>>طبعا مو الدم العادي الي مايرتفع اكثر من كدة لا انا اقصد دمي
وفي الحمل المفترض في الاحوال الطبيعية ينزل بنسبة وحدة يعني بيكون دمي 9
واحنا نبي نحافظ علية بين 10 و 9 عشان ماينزل اكثر وعشان ما احتاج الى نقل دم لا سمح الله
ونسبة حجم الدم او الدم >>مش الحديد لاحظوا المصطلحات عشان لا تلخبطو كأنا جالسين في درس احياء خخخ
نسبة الدم تكون 80 وانا واصلة الى 28 بس والان يبيها توصل الى اكثر من كدة عشان المعدل الطبيعي
الحمدلله قلل لي من عدد الحبوب يعني اشرب 2 حديد بدل 3
بس استمر على الفوليك اسد وعلى الفيتامين اظن فيتامين د
وعطاني تحليلين واحد علشان يبي يعرف كم مستوى الوراثة او الجين الوراثي الي احملة عشان يعرف نسبة
او حجم الدم بالضبط وبكذا يعرف كم اقدر او احاول ازيد مستوى الدم >>>مش الحديد مثل ما قلنا لانة سبق وقال الحديد كويس بس المشكلة في الدم

وكمان عطاني تحليل اعملة الموعد الجاي اعمل التحليل بعدين ادخل لة

وطبعا الموعد الشهر الجاي
وخلاص هذي تفاصيل الموعد

بس عند جد دكتور شااااااطر
ا

صباح الخيرات والليرات
كيف الجميع منورة فضولية من الصبحية
..................................
رحت بروكير امس كان هدوووء على الساعة 4
والحمدلله قال الدكتور لازم حمية ورياضة ولازم نشوف التحليل التراكمي للسكر ونقرر تاخذين حبوب او لا
بنات قيمة التحليل هذا 350 موب صاحين .. وننتظر ربنا يكرمنا بالشفاء ..

..................................
وعيد سعيد مقدماااااااااااااااااااااااااا *

اقول زهقااانه حيل وين اروح ؟؟

حتى ملابس عيد ماشريت

هلا والله بنخلة
شخبارك؟
بس ما قلتي لنا سألتي الدكتور عن السكر عرضي والا لا
الله يكفيكي شرة وتفتكين منة

وياكثر المجمعات يا نخلة
في كل مكان تلاقين مجمع يعني ماراح تحتارين ان شاء الله
وانا لسى كمان ما جهزت شئ

صباح الخير على الحلوات

ولو انه واضح انه مافي حلوه صاحيه غيري

فضوليه

حبيبتي انتي والله وانا مااستغنى عن اي وحده فيكم

خلصت المدارس وبدت الاجازه لكن احنا ماعندنا اجازات ابدا(الامهات) والله اننا نحن حتى الرجال لهم اجازات

سنويه وبالاعياد واحنا دوامنا 24 على 24 حتى لو سافرنا مكان الام تشيل وتحط وتلبس وتأكل وتجهز

ويــــــــــــــــــن الاجازه ياحسره<<<قلبتي علي المواجع

احيانا احس اني ابغى مكان مافيه احد ابدا لا زوج ولا عيال بس شلالات ومرتفعات خضراء وبرااااااد

<<<<توني كنت اتفرج على فيلم افريكانو فتأثرت بالطبيعه

ونفسي اسوي مســـــــاج يريح اعصابي احس اني متوتره طول الوقت واعصابي مشدوده

زوجي يشتغل بمؤسسه يعني مو شغل حكومي ...واحسن انه مو حكومي كان لقيته كل يوم

طالع مع اصحابه خليه كذه<<<<حاقده عليه



بعد كل هالقرقره نسيت اقولك الحمدلله ان تحاليلك كويسه وان اللي عندك بالدم مو شي يخوف

ننتظر التقرير القادم ان شالله


نخله ثابته

الحمدلله انها جت على كذه وباذن واحد احد يروح السكر مع الحميه والرياضه انا بشجعك

<<<تبي تنحف

اما الاسعار خليها على الله كل يوم يزيدونها

والله دعيت لك امس وانا صايمه من قلبي انه يروح منك ودعيت لكل التواسع باساميهم احلام ذهبيه وسارونه@ ونور الرياض1 ولنجديه بثبات الحمل

ولفجووووره بزوال الهم ولفاتن بالوظيفه ولفضوليه وشهد العسل وفنانة حب و noor aliبمرور الحمل على خير وسلامه ونشوفهم بالتاسع

ومانسيت عروس حايسه بالشفا وصلاح ولدها هي وانامل ناعمه

وعممت بكل اللي في الملف ونسيت اساميهم وكل المنتدى يـــــــــارب

لحد يزعل لو نسيت اسم والله دعيت للكل


على فكره انا اصوم هالايام الفضيله وكل يوم بذكركم بدعواتي عسى الله يتقبلها مني ويتقبل صيامي

وانتوا كمان لاتنسوني من دعواتكم