أتعبنيـ غروريـ :

أول شي أحب أباركلكم عالتجمع الرابع و‘نشاءالله يكون فاتحة خير عالجميع وثانياً حبيت أبشركم ولدت بيوم29/10/1431 وجبت أحلى بنوته وسميتها بسومه بحكي لكم قصة ولادتي طبعاً أنا كنت فاتحه ملف الحمل بالمواساه يومها كنت جايه زياره عند أهلي وماكنت أدري إني حامل لأن الدوره عندي مو منتظمه ورحت المستشفى عشان أنزلها لأني كنت مره تعبانه بس الدكتوره طلبت تحليل حمل بالأول والنتيجه طلعت حامل وإستانست ومن الفرحه زوجي قعد إسبوع وجا خذانا لجده لني ساكنه هناك وصرت أراجع هناك طبعاً إحنا متفقين بولد عند أمي ولما قربت الولاده جابني عند أهلي وفتحت لي ملف بمستشفى الروضه لأن كثير خوفوني من الولاده بالمواساه وكنت شايله من بالي إني أولد بالولاده والأطفال لأني جربتهم بولادتي الأولى فكنت ناويه أولد بمستشفى تداوي لأن كثير كان يمدحونه لي فلما دخلت التاسع فتحت لي ملف عند الدكتوره تازين عسوله مره عشان لو جاني الطلق أروح لها تخيلوا بنات من كنت بالثامن وأنا كل يوم أمشي لمدةنص ساعه أو أكثر عشان تتسهل ولادتي ومن دخلت التاسع من أول يوم وأنا قاعده أشرب قرفه وأسوي تمارين وكل شي نصحوني فيه لتسهيل الولاده طبعاً كل المستشفيات اللي كنت أراجع فيها حددوا تاريخ ولادتي 24/10 فلما قرب الموعد المحتوم بديت آخذ محرضات الولاد طبعاً أخذتها من المنتدى وإستخدمتها وبعد فتره يمكن يومين تقريباً حسيت بآلآم خفيفه على طول قلت لزوجي تعبانه وبروح المستشفى بيومها كان عندي وداني على طول الروضه وأقعد أنتظر دوري ساعه ونص وأخيراً دخلت عند الدكتوره أمل قلتلها عندي طلق وكشفت علي قالت لأ لسه بدري الرحم مسكر بس إذا رحتي البيت إمشي كثير وإذا زاد الألم روحي المستشفى اللي بتولدين فيها طبعاً طلعت من عندها وأنا بقمة الألم بس قلت أستحمل يمكن طلقي بارد لأني كنت آكل ثلج مثل مايقولون وكان باقي على موعد الولاده يومين زوجي سافر اليوم الثاني وأنا إنهبلت كنت أبيه يكون جنبي لما أولد عشان يهون علي بس للأسف الشغل مايخلي أحد والحمدالله أمي كانت موجوده قعدت أحسب االتاريخ أبي الولاده تجيني بسرعه لأني كنت أتعب على طول وماأحب أروح المستشفى وعديت التاريخ اللي حددوا لي إياه المستشفى وبدا معاي طلق قوي وأنا كنت مواعده نفسي إني أتحمل الألم مهما كان عشان مابي بنتي تشوفني وتتأثر كنت كل ماأروح لمستشفى تقولي الرحم مسكر وإنتي طوفتي عن موعد ولادتك ولازمك طلق صناعي وأنا أخاف وأرجع البيت وأقول متى ماربي كتب بيجي مع إن الألم لكان لايحتمل لدرجة إني ماأقدر لاأقعد ولاأمشي ولاأدخل الحمام وإنتوا بكرامه وبس أبكي كنت أحس براسها تحت خلاص شوي وبتنزل والظغط كل يوم مرتفع رحت الولاده مارضوا يدخلوني تخيلوا قالتلي روحي البيت إذا جاك طلق قوي ونزلت عليك المويه تعالي بندخلك آآه تخيلوا صارلي إسبوع كامل بالطلق وبكل برود ترجعني وقبل لاأدخل لدكتوره تهاوشت أنا والممرضه اللي تاخذ قياس الظغط والحراره أنا فيني طلق وهي تهاوشني ليش أجي ولسه مانزلت المويه وعلى طول إنهرت عليها وهي خافت لما شافت الظغط عندي مرتفع على طول تبي تهديني بس بعد ماطلعت حلفت ماأدخل هالمستشفى مره ثانيه حتى لو أولد بالبيت من عمايلهم حشى مو مستشفى الحكومه مستشفى أبوهم ولما رجعت البيت قعدت أبكي عند أبوي وقلتله خلاص ابي أولد بالبيت كرهت المستشفيات وهو مسكين يحاول يهدي فيني بس مشكلتي عنيده وأصريت وقعد يومين ماأقوم من عالفراش من الطلق ولاأبي المستشفى والله العظيم يابنات إن حتى بنتي صرت مو طايقتها ولاأبي أحد من إخواني يكلمني ولا إختي ولاآكل ولاأشرب ولاشي حتى كرهت اليوم اللي عرفت فيه إني حامل إذا الوحده ماتتحمل الطلق يوم واحد إشلون إسبوع كامل من الجمعه للجمعه وهي تطلق وأخيراًجا يوم الخميس وطبعاً قررت مع نفسي إني أوافق عالطلق الصناعي أهم شي أخلص من الألم ماعاد فيني حيل وقبل لاأروح دقيت عالدكتوره وردت علي الممرضه وقالتلي دكتوره تازين عندها عمليه على طول قلت لأخوي بأروح المواساه بدون تفكير ودقيت على أمي وقلتلها بأمرك عشان نروح المستشفى لأنها كانت بالدوام وقعدت بنتي وروشتها وجهزتها وطلعنا كنت حاسه إني راح أولد اليوم دخلت عند الدكتوره حنان الساعه 10 هي على طول أول مافتحت ملفي قالت إنتي موعد ولادتك بكره 29/10 زين ماخذيتي طلق صناعي فقلتلها أنا لي إسبوع حاسه بطلق ولما كشفت علي قالت إنتي عندك ولاده الرحم مفتوح 3سم تخيلوا من الفرحه كان ودي أقوم أبوسها بس أشوه مسكت نفسي قلت الحمدالله سوت لي دخول على طول وطلبت تحليل للدم عشان ماأحتاج دم زي ولادتي الأولى والحمدالله ماإحتجت دم كان نسبته 8 المهم أمي وأخوي خذوا بنتي وراحوا البيت بعد ماتطمنوا علي وقالت أمي لو صار شي كلميني وبجي على طول مسكينه ماإرتاحت بهذلتها معاي بعد ماراحوا حاولت أنام وماقدرت مع حوست التحاليل وشوي أكل شوي شاي أو حليب شوي عصير وأنا مو طايقه حتى نفسي وقمت أمشي يمكن الطلق يزيدالرحم ويتوسع وأولد ماعاد أبي أستنى أكثر جاء موعد الزياره وجوا أمي وأخوي وإختي وبنتي قعدوا عندي للمغرب إلا أنا خلاص وصلت حدي من الألم وكنت مستحيه عشان أخوي موجود عالمغرب قمت رحت الحمام إلا تنزل مني إفرازات وإنتوا بكرامه ويزيد معاي الطلق ناديت أمي وقلتلها فراحت تنادي الممرضه طبعاً هي قعدت معاي والباقي راحوا البيت على أساس ولاده خلاص جات تكشف علي قالت 4سم بس لازم أدخل غرفة الولاده رحنا غرفة الإنتظار حقت الولاده وخذيت أمي معاي على أساس بأمشي كنت كل شوي أمشي من الساعه7 لي الساعه9 إلا شوي يدخلون وحده تولد وأسمع صراخها ويجيني الخوف أكثر وأكثر وكن ربي يهون علي الألم بس كنت كل ماخفت أستغفر أكثر وأكثر وأدعي لها ربي يسهلها وأنا أبي اللي يدعيلي لما جت الساعه10 زاد الألم ودخلتني الممرضه غرفة الولاده وكنت ٌقاعده أدعي إني أولد بنفس اليوم عشان تولدني دكتوره مابي دكتور وطبعاً اللي كانت يومها بالتوليد الأخصائيه د.سهى طيبه مره وعسوله وعلى طول تذكرك بالدعاء وتهون عليك وإسلوبها بالتعامل معاك مره محترم المهم دخلت غرفة التوليد وعلى طول تركبلي المغذي والتخطيط وخلتني نايمه على جنب وتقول كذا الرحم يفتح بسرعه كانت أمي معاي داخله كل ماحسيت بالألم يزيد مسكت يدها وربي أحس كن شي يخفف عني ساعتها لأأبي زوجي ولاشي كنت كارهته هو سبب اللي أنا فيه وهو مسكين شايل همي كل شوي يدق علي وكل شوي يصلي ركعتين مسكين كل نص ساعه جت الممرضه تطمن علي وجت الساعه11 وأنا لسه ما ولدت جات تكشف علي قالت 5سم بتفتح موية الراس بس المثانه مليانه الله يعزكم ولازم أروح الحمام قمت بكيت لأني مو قادره أمشي للحمام قالت لأتخافين ماما هذا حمام عندك أثاري كرسي الحمام عند راسي تخيلوا بعد مابلت أعزكم الله حسيت شي بينزل قعدت أصيح أقول لأمي بولد خلاص مو قادره أقوم وهي تهديني جات هي والممرضه يساعدوني عشان أطلع عالسرير وعلى طولت فتحت موية الراس والألم يصير أقوى وتقولي 7سم طبعاً من الألم قلتلها تعطيني كمام خلاص بأموت ماقدر أستحمل وأمي مسكينه قاعده تقرى علي وتدعي لي وكل ماأشوفها ودمعتها بعينها ماأستحمل الألم عطتني كمام وقعدت أشفط فيه زي المدمنين وأدوخ ماأحس بنفسي ماحسيت إلا والدكتوره تولدني طبعا من قوة الطلق أصحى تخيلوا وأنا كل مأدف كان الجنين يرجع يطلع فوق وكانوا خايفين يسوون عمليه وأنا من قوة المُخدر كل ماصحيت قلت أبي عمليه لأن مو راضيه تنزل فقالت الدكتوره للمرضات يدفونها على تحت مسكوا يد بعض مثل علامة الأكس ويظغطون على بطني ويدفونها على تحت وتقولي الدكتوره دفي معاهم قسم بالله بغيت أموت أخيراً طلعت الساعه1:24 جاء دكتورها وفحصها عندي وهي توها تخيطني وهذا اللي ماحبيته فيهم طبعا وبعدين خذوها على طول ولاقدرت أشوفها أهم شي أمي شافتها من الألم حطيت راسي وأمي قامت تصيح ندمت دخلتها معاي قطعت قلبها للحين أتذكرها مأأسامح نفسي بعدها خيطوني وقعدت شوي ودوني غرفتي طبعاُ جابوها لي بعد ساعتين أو ثلاث تقريباً خلوها عندي للساعه7 وبعدين جو خذوها تعاملهم جداً رائع وتعاملهم مع البيبي جدا حلو ومرقيق مافيه إهمال يجبونه لك في الوقت اللي تطلبينه طبعاً أنا دخلت الخميس ولدت الجمعه وطلعت السبت يقدمون لك هدايا وكيكة تهنئة بالمولود مايقصرون معاك بأي شي.. آسفه طولت عليكم كتبت لكم قصة حياتي بس قررت أسوي ربط أوآخذ إبر لمدة3سنين شنو تنصحوني فيه؟!! ملاحظه: أنا حملي الأول ببنتي ماكنت أمشي ولاكنت آخذ مسهلات للولاده ولاشي والحمدالله ماطولت بالطلق وولادة كانت جداً سهله وهذا الحمل مشيت وخذيت مسهلات ومحرضات للولاده وتمارين وحاله وتعسرت ولادتي وطولت كثير إكتشفت إن التساهيل من رب العالمين واللي كاتبه بيصير إحنا علينا الدعاء آسفه مره ثانيه للإطاله تحياتي للجميع

أول شي أحب أباركلكم عالتجمع الرابع و‘نشاءالله يكون فاتحة خير عالجميع وثانياً حبيت أبشركم ولدت...