باب ماجاء في نصح وإرشاد (المهبوله خلف إرضاء الحموله)=))
كثرت الشكوى وعظمت البلوى
كيف ارضيهم
ودي اكسبهم
عطيتهم ومابين بعينهم
ومن هذا المنبر نقولتس اقضبي ارضتس والله لو تشنقين روحتس بمروحة صالتهم عشان خاطرهم مارضوا عليتس
ان رحتي لهم دايم. قالوا نشبه
وان قللتي الروحات قالوا قطوع ماتربت
ان دخلتي ويدتس فاضيه قالوا ماتستحي
وان جبتي معتس شيء قالوا البيت مليان ابحلتنا او عسى ماتكلفت هذا شيء يسوى تدخل به
ان تكلمتي بالمجالس قالوا قرقه وتميلح
وان سكتي قالوا ماتعرف تكلم وكمخه
ان كشختي قالوا مهايطيه وخسرت ولدنا
وان تبهذلتي او صرتي بسيطه قالوا فشلتنا ماتعرف تلبس
ان فزعتي لهم بالعزايم قالوا تميلح مسويه سنعه
وان تركتيهم بدون فزعه قالوا ماتستحي كنها غريبه تجي تاكل وتطلع
ان ارسلتي عيالتس قالوا تبي الفكه تخليهم يحوسون بيتنا
واذا ماارسلتيهم قالوا تعلمهم من الحين على القطاعه
ان علمتيهم باخبارتس واخبارر اهلتس قالوا خراره
وان سكتي. قالوا جحود تجي تاخذ اخبار وتطلع
عزيزتي المهبوله خلف ارضاء الحموله هذا غيض من فيض
ان زعلوا على سلفتس رفعوا بتس وطيروتس بالسما عشان يقهرونها
واذا رضوا عليها سفطوتس على جنب هذا اذا ماقلبوا عليتس
ان حضرتي كل عزايمهم قالوا مشفحوحه ماتفوت شيء
وان تعذرتي قالوا لو اهلها وجبتهم وجت
ان صار لسانتس زين معهم قالوا لواقه ولسان بس.
وان صرتي سلام عليكم السلام قالوا رسميه وحاطه حدود وماعندها اسلوب
غلطه وحده منتس تنسف تاريختس كله
يسامحون اليهود بس مايسامحونتس كل كلمه تقولينها ببراءة تتفسر الف تفسير
تدخلين فجأه تلقين الخشش مميله وانتي ياغافل لك الله
وبعدين يجيتس العلم انتس قايله كلمه من هنا ولا من هنا وحطوها بروسهم وانتي ماتقصدين فيها شيء
عندهم فوبيا منتس حتى لو انتي بنت نعمة يحسون ان كل مصايبهم من وراتس وان عينتس تجدع الطير:/
مايهابونتس ولا يحطون لتس قيمه الا لاحسوا ان ولدهم حاشمتس وموقفهم عند حدهم({})
المهبوووووله<=-P
الله يعافيتس ولا يبلانا
والعاقلات يكملون القائمة وترى التعميم لغة الحمقى ومن جعل الله همه كفاه الله ما أهمه الله لايجعلهم أكبر همنا O:)
والله العظيم هذا الكلام فينا وكل عائلة سعودية والي تقول غير كذا كذابه
الا مااااااااااااقل