السلام عليكم ورحمة الله وبركاته :22:
شحالكن خواتي شخباركن ياللي تدورن على الحركات والرومنسيه اظني رياييل الخليج هاليومين اللي زوجاتهم يدشن عالم حواء عايشين بنعيم ورومانسيه ومستغربين شو السالفه خخخخخخخخخخخخخخخ
المهم ندش بالمهم :26:
خواتي تذكرون موضوعي (دلعته اهتميت فيه وشوفو شو النتيجه خخخخخخخخ ) في خوات دشن موضوعي وتسائلن عن نوعيه الدلع يعني يقولن كيف تدلعون ازواجكم ؟؟؟
الموضوع جدا بسيط
شفتي عيالك كيف تهتمين فيهم وتلبين طلباتهم وتدلعيهم خلي زوجك نفس عيالك
مثلا وهو راد من الدوام استقبليه بابتسامه ورحبي فيه مثلا هلا بنور البيت او هلا والله بالغالي ... تو مانور البيت ... يعطيك العافيه حبيبي يعني استقبليه بوحده من هالعبارات مب تكرينهن كلهن مره وحده ورا بعض :eek: خخخخخخخخخخخ لا بس ابتسمي واختاري لك جمله حلوه
انتظريه وتغدي معاه انتي والعيال لا تخلينه يتغدى او يتعشى بروحه يعني ولو حبكت وايد وذبحك الجوع صبري نفسك والعيال بتفاحه او سندويش جبن صغييييييييييير عشان لا تبينون شبعانين وتنفظحون خخخخخخخخخ :hahaha:
تصدقون كنا في بيت اهل زوجي قبل لا ننتقل لبيتنا كل واحد اول مايوصل يحط غداه ويتغدى حتى ام زوجي يعني ماينتظرون اي حد حتى لو حاطين الغدا وباقي على جيت زوجي او جيتي او جيت احد من العيال نص ساعه ماينتظرونه فما كنا نجتمع الا بالاجازه على الاكل طبعا هالشي كان خلاص طبع وعاده في بيت اهل زوجي والكل مرتاح ومريح على قولتهم حتى زوجي كان يقولي لا تنتظريني تغدي !!! بس لما انتقلنا قررت اني اغير هالشي واعود عيالي وابوهم على اللمه والصبر لانه في بيت اهلي تقعد امي تنظر الكل لين يوصل وبعدين يتغدون مع بعض ماترضى تتغدا وحد من عيالها او حريم عيالها مب موجوده فقلت خلني اجرب وبالفعل اول شي كان يقولي تغدو انا بتأخر وايد ويمكن تجوعون بس بعدين خلاص تعود والعيال تعودو ومره تغدينا قبله وزعل وقالي يعني ماقدرتو تنتظروني شو اللحين اتغدا بروحي ؟؟؟!!!
هنيه يحس بلذة الجمعه ويحس بقيمته ومكانته بين عياله وخلوها فرصه وقعده حلوه ولمه حلوه تتبادلون فيها الاخبار والسوالفه شو صار طول اليوم وفرصه تدلعينه فيها وتحطين له في صحنه وتقربين له السلطه وتحثينه ياكل وتقولين له كنه واحد من العيال ليش ماتاكل شكلك ضعفان هاليويمن بس انتبهي اذا كان دب لا نقولين له لااااااااااااااااااااااااااااا كثري السلطه في صحنه وقللي العيش ( الرز) وسبلي له عيونك وقولي له حبيبي عشان صحتك هو بيحس باهتمامك وخوفك عليه
إذا كان زوجك متعود على نمط معين يعني مثلا يحب يشرب شاي بعد الغدا أو يحب يحلي بعد الاكل لا تنتظرين لين هو يقولك وينادي عليك ياااااااااااافلانه سوي لي شاي او هاتي لي حلو لا انتي جهزي الشاي بطريقه حلوه وحطي معاه حلو سويه بيدك او حتى جاهز بس قدميه بطريقه حلوه مثلا اذا خذتي كيكه قطعيها بطريقه حلوه وبصحن مزين
سوي مساج حق زوجك بدون ما يطلب منك يعني قاعد على الكنبه مريح سوي له مساج لرقبته او رجوله او ظهره مافي رجال مايحب المساج
او قعدي جنبه ولعبي بشعره واسأليه عن يومه كيف كان وممكن اذا شكله تعبان قولي له يعطيك العافيه شكلك تعبوك اليوم وبتلقينه بروحه يقولك هيه والله كرفوني اليوم او رحت كذا مكان او سويت كذا شغله قولي له عيل قوم ارتاح وتكوني مجهزه له فراشه مرتبتنه ومعطرتنه ومبخره الغرفه وطافيه النور ومسكته العيال :22: او منيمتنهم او تاخذينهم لغرفتهم وتوصيهم ان ابوهم تعبان وماتبغين اي ازعاج
قصي له اظافره وبرديه له زوجي من تزوجنا وانا اللي اقص له أظافره تخيلو حتى لو اكون مب موجوده او مشغوله ينتظرني لين ارجع وافضى واقصهن له وهاي الحركه ولو هي بسيطه وتشوفينها مالها قيمه بس صدقيني تأثر في الرجال يحس نفسه انك مهتمه فيه وطفل كبير الرجال بطبعه يحب الدلع ويرتاح من دور الرجوله والشده وهاي الحركه ماتصدقين انها تنفع حتى بايام الزعل يعني اذا معوده ريلج تقصين له اظافره او تبخرينه قبل لا يطلع او تبخرين سيارته او تستقبلينه بطريقه معينه خصوصا القبله ساعة الاستقبال صدقيني لما تتخاصمون يفتقد هالشي ويتمنى ينتهي الزعل عشان ترد له امتيازاته اللي فقدها لما زعلك
وهاي حصلت لي مره كنا متزاعلين انا وزوجي وكان يبغي يقص اظافره بس كانت الزعله كبيره وما هانت عليه عزته وكبريائه انه يطلب مني مع انه كذا مره طلب مني لما نكون متزاعلين اني اقص له اظافره ويلقاها فرصه عشان يعتذر او يمسكني ويسألني ليش زعلانه ويراضيني بس ذيك المره كانت المشكله كبيره فقص اظافره بروحه ولما تراضينا تخيلو من بين العتب يقولي حتى اظافري قصيتهن بروحي ولا سالتي عني !!!!! خخخخخخخخخ قلت له بس هذا اللي كسر ظهرك وايد تعبتك يوم قصيت اظافرك بروحي قالي لا بس انتي تعرفين اني ماحب اقص اظافري بروحي واحب انك انتي تقصيهن لي خلاص تعودت
يعني لا تعتبرون مثل هالاشياء تافهه وماتهم ترا مع العاده تصير شي اساسي
حاولي تساعدينه في لبس ملابسه وتجهيزهن يعني رتبيهن واذا كان من النوع العسكري مثلا له لبس خاص بالدوام خليهن دوم مرتبات ومعطرات ومبخرات ونظاف مره مسؤول زوجي في الدوام قاله الصبح اول ماشافه فلان تعال ابغيك بسألك هالعطر وهالريحه الحلوه شو اسم البخور والعطر اللي تحطه قاله سيدي هاي الحرمه تبخر ثيابي وتعطرهن قاله اليوم مستعد اعطيك اللي تبغي اجازه اي شي بس تجيب لي من هالريحه اللي حاطنهاا وتخيلو فرحتي وفخره فيني يوم رجع وقالي حسيته صدق مستانس :arb:
فترت العصر لما يقوم من النوم جهزي له شي حلو شاي عصير قهوه مع حلى بسييط لان كل واحد منا لما يقوم العصر يحب يغير ريقه بشي معين انتي شوفي زوجك شو يحب وسويه
امتدحيه لما يسوي شي ويتعب فيه وافرحي لفرحه واحزني لحزنه لا تقعدين تدققين في اخطاءه لا بالعكس اوقفي معاه وانصحيه بطريقه ماتنفره يعني في البدايه اذا سوى شي غلط حسسيه انك حاسه بشعوره وواسيه وازعلي لزعله وبعدين خليه يتكلم ويعبر عن اللي بداخله بدون الحاح يعني في رجال مايحبون يتكلمون على طول يحب يهدى وبعدين يجيك بروحه ويتكلم او في نوع ثاني يحب يحس باهتمامك بزعله ويحب يسمعك تسألينه فلان شو فيك بكذا يحس انك حاسه فيه وكاشفته والزوجه اللي تحب زوجها على طول من تشوفه تعرف اذا خاطره متكدر او فرحان من وجهه ببس لا تلحين عليه خليه براحته وبنفس الوقت لا تهملينه اساليه واذا مارضى يتكلم خليه فتره وقولي له اذا حبيت تتكلم تعال وقولي بسمعك وخليه يتكلم لين ينتهي يعني لا تقاطعينه خليه يفضفض ويعبر عن اللي فيه وبعدين شوي شوي ابدي رايك
خلي لسانك يتعود على كلمة حبيبي روحي حياتي الغالي عمري غناتي وووو لا تعودين السانك على الصراخ والسب وقسوة الالفاظ تراه يسلك على هالشي وتلقين نفسك ماتقدرين تسيطرين عليه تعودي مع عيالك الاسلوب الهادي وعدم الصراخ والسب والدعاوي الرجال يحب يشوف زوجته رقيقه وهاديه وعاقله بتعاملها مع عيالها وبنفس الوقت مسيطره على الوضع ومثل ماانتي تزعلين لما يهاوش حد من العيال او يضربه او يسبه ويعصب عليه هو بعد يحب عياله وما يحب يشوفك على كل شي ضربتيهم او سبيتيهم او صارختي عليهم
ثقفي نفسك وشوفي احسن اساليب التربيه والسيطره على الاطفال لا تخلين بيتك مكان حرب ومعارك وتبادل اتهامات بينك وبين عيالك وزوجك خليه واحه هاديه وعوديهم يستقبلون ابوهم باحلى استقبال يبوسون راسه او خشمه ويبدونه بالسلام وعوديهم على نظام معين سواء في المدارس او في الاجازات يعني ماله داعي السهر لوقت متأخر وااااااااااااااااايد لقرب الفجر وابوهم عليه دوام ويبغي ينام
لا خليه يشتاق يرد البيت
ايام العيد والمناسبات اهديه وتذكريه شفتي يوم تجهزين نفسك لمناسبه او لعيد انتي وعيالك جهزي زوجك معاك اشتري له لوازمه او مثلا كرمتي نعال او شماغ ( غتره ) او عطر او فصلي له عند خياطه اللي متعود يفصل معاه وكذا يعني حسسيه باهتمامك باناقته وشكله
تصدقون تعبت :09: بكمل لكم بعدين اذا عجبكم الموضوع
الله يجعلك من الحور العين في عينين زوجك دنيا واخرة..
موضوعك قمة في الروعة وقدوة للاخوات المتزوجات..
انا عجبتني حكاية اللمة في الاكل.. وحكاية قص الاظافر..
شكلي بتفلسف عليه وافتح صالون بيديكير له من حين لاخر.. خخخخخخخ
الله يسعدك ويسعد كل المتزوجات المسلمات المتحببات لازواجهن..
وبانتظار مزيدك يا غالية :)