الموت حق وكـل نفـسٍ تذوقـه .. مير البلا من ذاق موته ولا مـات

الموت حق وكـل نفـسٍ تذوقـه .. مير البلا من ذاق موته ولا مـات
من واحدن قلب المعنـى يسوقـه .. وبـدل ليالينـا الهنيـه بـونـات
الله مـن قلـبٍ وسـاعٍ فتوقـه .. هيهات يامن يدرك الصبر هيهات
والعين عيـت نومهـا لا تذوقـه .. ونفسي طموحه للامور البعيـدات
والنفس من سبة هواها محروقه .. ولاشفت وياه الهنا بضع ساعـات
غديت مثل اللي محـارب مذوقـه .. او مثل من يندب على فايتٍ فـات
ياصاحبي كلـك حـلاوه ولوقـه .. ياعشقتي من بـد كـل العفيفـات
حبك جرح قلبي ويبـس عروقـه .. ومن عقبكم لاكل ولا شرب ولابات
باغيك مير الوقت تصعب طروقـه .. وليا صفا مره غدر عشر مـرات
انا حسبـت ان الليالـي صدوقـه .. واثر الليالي تبدل الونس حسـرات
ياعل حبٍ عـاق قلبـي يعوقـه .. كود يتذكر مامضى وكـل مافـات


القصيده الثانيه لشاعره لم يرد اسمها

يابوي قلبي كل همٍ يسوقـه .. و انا أقاسي في حياتي معانـاة
قامت تجدد كل يومٍ فتوقـه .. و الوقت ما جالي على كل مشهاة
حتى عيوني للمدامع شفوقـه .. والليل كله بين هـمٍ وآهـات
لا أقبل عليّه نومها ما تذوقـه .. ينام من حولي وأنا دوم ما بـات
يا ما انتظرت الصبح وارجي شروقه .. كـن الدقايق فوق قلبـي ثقيلات
ويـن السـحاب اللي فقدنا بروقـه .. لـين القفر غطّى جميع المساحات
الارض عـطشى والنفوس امحروقـه .. على الذبول اللي غشاها بلحـظـات
ما للمطر طاري وقفت سبوقـه .. مع الذي راح وتركني بمتاهــات
الشايب اللي غاب عنّا شـروقـه .. وش به تركني في ظروفٍ صعيبات
الضيـم اشـوفه كل ساعة واذوقه .. و ذقت الألم من يوم ما عودنا مات
ودي بشوفه مير صعبٍ طروقـه .. من راح .. راح وكل شيٍ وقد فات
نفسي على اللي راح دايم شفوقه .. أحـتاج لك ياابوي هالوقت بالــذات
مـا دام قلبي كل هـمٍ يطوقـه .. و حـنّا بقينا دايم الدوم بأشتات
ليت الذي تحت الثرى صار فوقـه .. حتى يشوف إش صابني بعد ما مات
(( والموت حق وكل نفسٍ تذوقـه .. مير البلا من ذاق موته ولا مـات))



أتمنى أن أ كون قد وفقت فيما سبق وأن ينال الموضوع رضاكم واستحسانكم ...

خـا نتـنـــــي دمووووعــــــــــــــــي ...!؟